កិច្ចពិភាក្សា​លើ​ការពង្រឹង​ការអភិរក្ស និង​ការគ្រប់គ្រង​ប្រព័ន្ធ តំបន់ការពារធម្មជាតិ​

ដោយៈ មូល​សម្បត្តិ / ភ្នំពេញៈ «​ពង្រឹង​ការអភិរក្ស និង​ការគ្រប់គ្រង​ប្រព័ន្ធ​តំបន់ការពារធម្មជាតិ​» គឺជា​ប្រធានបទ នៃ​កិច្ចពិភាក្សា និង​វាយតម្លៃ រៀបចំឡើង​ដោយ អគ្គនាយកដ្ឋាន រដ្ឋបាល​ការពារ និង​អភិរក្ស​ធម្មជាតិ សម្រាប់​សន្និបាត​បូកសរុប លទ្ធផល​ការងារ​បរិស្ថាន ឆ្នាំ​២០២០ និង​ទិសដៅ​ការងារ​បរិស្ថាន ឆ្នាំ​២០២១ ។ នេះ​បើតាម​គេហទំព័រ (​វេ​ប​សាយ​) របស់ក្រសួងបរិស្ថាន បានផ្សព្វផ្សាយ នៅ​ថ្ងៃទី​៦ ខែតុលា នេះ​។​

សិក្ខាសាលា​នេះ បាន​ប្រារព្ធ​ឡើង នា​ថ្ងៃទី​៦-៧ ខែតុលា ឆ្នាំ​២០២០ នៅ​រាជធានី​ភ្នំពេញ ក្រោម​អធិបតីភាព លោក ស្រ៊ុន ដា​រិ​ទិ្ធ រដ្ឋលេខាធិការ ក្រសួងបរិស្ថាន និង​មានការ​ចូលរួម ពី​ថ្នាក់ដឹកនាំ មន្ត្រី​ជំនាញ តំណាង ក្រសួង ស្ថាប័ន​ពាក់ព័ន្ធ គណៈ​អភិបាល​រាជធានី​-​ខេត្ត រដ្ឋបាល​ថ្នាក់ក្រោម​ជាតិ តំណាង​វិស័យ​ឯកជន ដៃគូ​អភិវឌ្ឍន៍ អ្នកស្រាវជ្រាវ និង​សហគមន៍​មូលដ្ឋាន ជាច្រើន​នាក់​។

កិច្ចពិភាក្សា​លើ​ការពង្រឹង​ការអភិរក្ស និង​ការគ្រប់គ្រង​ប្រព័ន្ធ តំបន់ការពារធម្មជាតិ​

​លោក គឹម ណុង អគ្គនាយក នៃ​អគ្គនាយកដ្ឋាន រដ្ឋបាល​ការពារ និង​អភិរក្ស​ធម្មជាតិ ក្រសួងបរិស្ថាន បានឱ្យដឹងថាៈ ក្រោម​អនុសាសន៍ ដ៏​ខ្ពង់ខ្ពស់​របស់ លោក​សាយ សំ​អាល់ រដ្ឋមន្ត្រី​ក្រសួងបរិស្ថាន ក្នុងន័យ​រក្សា​ឱ្យបាន នូវ​តុល្យភាព ទាំង​ការអភិរក្ស និង​ការអភិវឌ្ឍន៍ កាត់បន្ថយ​សម្ពាធ លើ​ការប្រើប្រាស់ ធនធានធម្មជាតិ និង​ជីវៈចម្រុះ ក៏ដូចជា ការជំរុញ​លើកកម្ពស់ ជីវភាព​រស់នៅ​របស់ ប្រជា​សហគមន៍​មូលដ្ឋាន នៅតាម​តំបន់ការពារធម្មជាតិ​នីមួយៗ សិក្ខាសាលា រយៈពេល​ពីរ​ថ្ងៃនេះ នឹង​ផ្តល់ឱកាស​ឱ្យ​អ្នកពាក់ព័ន្ធ ក៏ដូចជា អ្នកចូលរួម​ទាំងអស់ ដែលជា​អ្នកការពារ ថែរក្សា បរិស្ថាន និង​ធនធានធម្មជាតិ រួមគ្នា​គិត និង​រួមគ្នា​ធ្វើ​សកម្មភាព ឱ្យបាន​ព្រម​គ្នា ដើម្បី​ជំរុញ​កិច្ចការពារ និង​ថែរក្សា​ប្រព័ន្ធ តំបន់ការពារធម្មជាតិ ឱ្យបាន​កាន់តែ​ប្រសើរ ក្នុង​គោលដៅ​ធានា​គុណភាព​បរិស្ថាន សុវត្ថិភាព នៃ​ប្រព័ន្ធ​សេវាកម្ម​អេកូឡូស៊ី និង​ការរស់នៅ ប្រកបដោយ​ភាពសុខដុមរមនា សម្រាប់​មនុស្ស​គ្រប់​ជំនាន់ ទាំង​ក្នុង​ក្របខ​ណ្ឌ័​សង្គមជាតិ និង​សកលលោក​។​

កិច្ចពិភាក្សា​លើ​ការពង្រឹង​ការអភិរក្ស និង​ការគ្រប់គ្រង​ប្រព័ន្ធ តំបន់ការពារធម្មជាតិ​

​នៅក្នុង​ឱកាស​នេះ លោក ស្រ៊ុន ដា​រិ​ទ្ធិ រដ្ឋលេខាធិការ​ក្រសួងបរិស្ថាន បានបញ្ជាក់​ថាៈ រាជរដ្ឋាភិបាល​កម្ពុជា បានអនុញ្ញាត​ឱ្យ ក្រសួងបរិស្ថាន កំណត់​ទស្សនៈវិស័យ គ្រប់គ្រង​ព្រៃឈើ រយៈពេល​វែង តាមរយៈ «​ការកាត់បន្ថយ ការ​បំ​ភាយ​ឧស្ម័ន​ផ្ទះ​កញ្ចក់ ពី​វិស័យ​ព្រៃឈើ នៅ​កម្រិត ០% មុន​ឆ្នាំ​២០៤០» ដោយ​ឈរលើ​ការអនុវត្ត ទិសដៅ​ជា​យុទ្ធសាស្ត្រ ចំនួន ៣​គឺ​៖ ១.​ធានាបាន​នូវ​តុល្យភាព រវាង​ការ​បំ​ភាយ និង​ការ​ស្រូប​ឧស្ម័ន ផ្ទះ​កញ្ចក់​ពី​វិស័យ​ព្រៃឈើ ។ ២.​បង្កើន​កម្រិតជីវភាព​រស់នៅ របស់​ប្រជា​សហគមន៍​មូលដ្ឋាន ដើម្បី​កាត់បន្ថយ ការពឹង​ផ្អែកលើ​ការ អាស្រ័យ​ផល​ពី​ព្រៃឈើ ។ ៣. ពង្រឹង​ប្រភព​ផ្គត់ផ្គង់​ផលិតផល​ឈើ និង​ឈើ​ថាមពល ចេញពី​ចម្ការ​ឈើ​ដាំ ដោយ​ត្រូវការពារ​ព្រៃ​ធម្មជាតិ​។​

​លោក​បាន​បញ្ជាក់ថាៈ បច្ចុប្បន្ន ក្រសួងបរិស្ថាន កំពុង​អនុវត្ត​គម្រោង​រេ​ដ​បូក (REDD+) ចំនួន​បី​កន្លែង​គឺ​៖ ១. នៅក្នុង​ដែនជម្រកសត្វព្រៃ​កែវ​សីមា ខេត្ត​ម​ណ្ដ​ល​គិរី​។ ២. នៅ​ដែនជម្រកសត្វព្រៃ​ទ្ប​ង់ ខេត្តស្ទឹងត្រែង និង ៣. នៅ​តំបន់​ឧទ្យាន​ជួរ​ភ្នំក្រវាញ ខេត្តពោធិ៍សាត់ និង​កោះកុង​។

​ជាមួយគ្នានេះ លោក​ស្រ៊ុន ដា​រិ​ទ្ធិ បាន​លើកទឹកចិត្ត ឱ្យ​អ្នកចូលរួម​ទាំងអស ក្នុង​សិក្ខាសាលា ពីរ​ថ្ងៃនេះ ជា​ឱកាស​សម្រាប់​អ្នកចូលរួម​ទាំងអស់ លើកយក​បទពិសោធន៍ និង​បញ្ហា​ប្រឈម​នានា មក​ពិភាក្សា ផ្លាស់ប្តូ​រមតិ យោបល់ ដើម្បី​បន្ត​រួមគ្នា​រក​ធាតុ​ចូល​សំខាន់ និង​ជា​គន្លឹះ សម្រាប់​ដាក់ចេញ​ជា យុទ្ធសាស្ត្រ​រួម ក្នុងការ​គ្រប់គ្រង​ប្រព័ន្ធ តំបន់ការពារធម្មជាតិ ក្នុង​ព្រះរាជាណាចក្រ​កម្ពុជា ឱ្យ​ទទួលបាន​ជោគជ័យ និង​មាន​ប្រសិទ្ធភាព​ខ្ពស់ សម្រាប់​ជា​ឧ​ត្ត​ម​ប្រយោជន៍ ជូន​ដល់​ប្រទេសជាតិ និង​សកលលោក​ទាំងមូល​ផងដែរ​។​

កិច្ចពិភាក្សា​លើ​ការពង្រឹង​ការអភិរក្ស និង​ការគ្រប់គ្រង​ប្រព័ន្ធ តំបន់ការពារធម្មជាតិ​

​សូមបញ្ជាក់ថា សិក្ខាសាលា​ស្តីពី «​ការពង្រឹង​ការអភិរក្ស និង​គ្រប់គ្រង​ប្រព័ន្ធ​តំបន់ការពារធម្មជាតិ​» សម្រាប់​សន្និបាត​បូកសរុប លទ្ធផល​ការងារ​បរិស្ថាន ឆ្នាំ​២០២០ និង​លើក​ទិសដៅ​ការងារ ឆ្នាំ​២០២១ រៀបចំឡើង រយៈពេល ២​ថ្ងៃ ចាប់ពី​ថ្ងៃទី​០៦-០៧ ខែតុលា ឆ្នាំ​២០២០ ដោយ​ពិនិត្យ និង​វាយតម្លៃ លើ​ការអនុវត្ត​ផែនការ​យុទ្ធសាស្ត្រ​ជាតិ និង​ផែនការ​សកម្មភាព សម្រាប់​គ្រប់គ្រង​តំបន់ការពារធម្មជាតិ និង​ការគ្រប់គ្រង និង​អភិរក្ស​ធនធានធម្មជាតិ និង​ជីវៈចម្រុះ នៅតាម​ប្រព័ន្ធ​ភូមិសាស្ត្រ នៃ​តំបន់ការពារធម្មជាតិ ដែល​ក្នុងនោះ​រួមមាន​៖ ១.​ការអភិរក្ស​តំបន់​ការពារ ធម្មជាតិ​ដីគោក ខាងកើត​ទន្លេមេគង្គ ។ ២.​ការអភិរក្ស​តំបន់ការពារធម្មជាតិ​ដីគោក ខាងជើង​បឹង​ទន្លេសាប​។ ៣.​ការអភិរក្ស​តំបន់​ការពារ ធម្មជាតិ​ដីគោក ខាងត្បូង​បឹង​ទន្លេសាប ។ ៤.​ការអភិរក្ស​តំបន់ដីសើម​ទឹកសាប​។ ៥. ការអភិរក្ស​តំបន់ឆ្នេរ និង​សមុទ្រ និង​៦.​ការពង្រឹង​អនុវត្ត​ច្បាប់ នៅតាម​តំបន់ការពារធម្មជាតិ និង​របៀង​អភិរក្ស​ជីវៈចម្រុះ សម្រាប់​ដាក់ចេញ​ទិសដៅ​ការងារ ជា​យុទ្ធសាស្ត្រ ឱ្យបាន​កាន់តែ​ល្អប្រសើរ​បន្ថែមទៀត​៕​/V

ទីតាំងផ្សាយពាណិជ្ជកម្ម

- Advertisment -

Most Popular

ប្រជាពលរដ្ឋ​ងាយ​រងគ្រោះ​ច...

ដោយ​: ទេ​ពក​ង្រី / កំពង់ឆ...

រដ្ឋបាល​ខណ្ឌ​ពោធិ៍​សែន​ជ័...

ដោយ​៖ រ៉ា​ម៉ន / ភ្នំពេញ​៖...

បុរស​ម្នាក់​ចាប់រំលោភ​កូន...

​ដោយ​: សម្បត្តិ / ភ្នំពេញ...

ប៉ូលិស​បង្ក្រាប​ក្រុម​ជួញ...

​ដោយ​: មុនី​រ័ត្ន / ភ្នំព...