ដោយៈ ប,ជ័យ / បន្ទាយមានជ័យៈ ទឹកស្ទឹងមង្គលបូរី បានបន្តហក់ឡើងជាថ្មី ឯទឹកនៅស្រុកថ្មពួក ស្រកចុះ មកលិចនៅស្វាយស្វាយចេក។ នេះជាស្ថានភាព ទឹកជំនន់ គិតត្រឹមថ្ងៃទី៧ ខែតុលា ឆ្នាំ២០២០ ។
លោក រ័ត្ន ដាស៊ីណង់ អភិបាលស្រុកមង្គលបូរី បានអោយដឹង នៅថ្ងៃទី៧ តុលានេះថាៈ ស្ថានភាពទឹកស្ទឹងមង្គលបូរី បានហក់ឡើងបន្ថែម ៥ ហ៊ុនទៀត បើប្រៀបធៀប នៅពេលព្រឹក ម្សិលមិញ ពោលគឺវាហក់ឡើងជាងកន្លះម៉ែត្រឡើងវិញ នៅ ២-៣ ថ្ងៃចុងក្រោយនេះ ។
ចំណែករដ្ឋបាលឃុំស្លក្រាម ស្រុកស្វាយចេក បានអោយដឹងនៅថ្ងៃទី៧តុលា នេះដែរថាៈ ស្ថានភាពទឹក ក្នុងឃុំស្លក្រាម នៅថ្ងៃនេះ ត្រង់ចំណុចផ្លូវកៅស៊ូ ពីភូមិខ្លែងពណ៌ ទៅភូមិទ័ពសៀម គឺថា ទឹកឡើងលឿន ប៉ប្រះថ្នល់ខ្លះហើយៗកន្លែងខ្លះ បានលិច ។ ទឹកនោះបានស្រកចុះ ពីភូមិសាស្ត្រស្រុកថ្មពួក តាមស្ទឹងស្វាយចេក ។
ឯលោក ឌៀប ឈួន អភិបាលស្រុកថ្មពួក បានអោយដឹង នៅថ្ងៃទី៧ តុលា នេះដែរថាៈ ស្ថានភាពទឺកទំនប់តាឆាយ នៅឃុំគោករមៀត (ជាប់ស្ទឹងគោករមៀត ស្វាយចេក) នាថ្ងៃនេះ បានស្រកចុះជាង ១ តឹក ពោលគឺវាមិនទាន់រងគ្រោះអី នៅឡើយទេ ។ ទឹកនេះ ក៏ជាផ្នែកខ្លះ នៃទឹកធ្លាក់ពីច្រមុះជួរភ្នំដងរែក នៃប្រទេសថៃ ផងដែរ៕S/
រូបថត ៖ ទឹកស្ទឹងមង្គលបូរីបន្តហក់ឡើងជាថ្មី ;ឯទឹកនៅស្រុកថ្មពួកស្រុងចុះ ហើយមកហៀររាចនៅស្វាយស្វាយចេក (រូប ៖ ប,ជ័យ )
