Home ព័ត៌មានអន្តរជាតិ អាម៉េរិក​ព្រម...

អាម៉េរិក​ព្រមាន​កុំឲ្យ​ចិន​វាយប្រហារ​កោះ​តៃវ៉ាន់ ព្រោះ​ចម្លើយ​តប​របស់​អាម៉េរិក​មាន​ច្រើនតែ​…

​ទីប្រឹក្សា​សន្តិសុខ​ជាតិ​អាម៉េរិក កាលពី​ថ្ងៃ​ពុធ​ទី​០៧​តុលា បាន​ព្រមាន​កុំឲ្យ​ចិន​ធ្វើ​ការប៉ុនប៉ង​ណាមួយ​ដើម្បី​ចាប់​យក​កោះ​តៃវ៉ាន់​តាមរយៈ​កម្លាំងយោធា ដោយ​លោក​បាន​បញ្ជាក់ថា ការ​វាយ​ឡើង​គោក​​ពិតជា​មាន​ការលំបាក រីឯ​ចម្លើយ​តប​របស់​សហរដ្ឋ​អាម៉េរិក​មាន​ភាពមិនច្បាស់លាស់​ច្រើន​។​

​លោក រ៉ូ​ប៊ឺត អូ​ប្រាយ​អ៊ឹន ​ទីប្រឹក្សា​សន្តិសុខ​ជាតិ​អាម៉េរិក

​លោក រ៉ូ​ប៊ឺត អូ​ប្រាយ​អ៊ឹន​(Robert O’Brien)​បាន​ប្រាប់​ពិធី​មួយ​នៅ​សកល​វិទ្យាល័យ​ណេវ៉ា​ដា​ក្នុង​ទីក្រុ​ងឡាស វេ​ហ្កា ថា​​ ចិន​បាន​បង្កើន​កម្លាំង​ទ័ពជើងទឹក​ដ៏​ធំ​សម្បើម ដែល​ប្រហែល​ជា​មិន​ត្រូវបាន​គេ​​ធ្លាប់​ឃើញ​ចាប់តាំងពី​អាឡឺម៉ង់​ព្យាយាម​ប្រជែង​ជាមួយ​កងទ័ពជើងទឹក​អង់គ្លេស​នៅមុន​សង្គ្រាម​លោក​លើក​ទី​១​។​

​លោក​បាន​បន្តថា «​ជា​ផ្នែក​នៃ​ការបង្កើន​កម្លាំង​ទ័ព​នេះ អាច​ឲ្យ​ចិន​រុញ​ពួកយើង​ចេញពី​ប៉ាស៊ីហ្វិក​ខាងលិច និង​អនុញ្ញាត​ឲ្យ​គេ​វាយប្រហារ​ឡើងគោក​ចូល​កោះ​តៃវ៉ាន់​។​បញ្ហា​គឺ​នៅត្រង់ថា ការ​វាយ​​ឡើងគោក​មាន​ការលំបាក​ខ្លាំង​។​ពី​ឆ្នេរ​ចិនដីគោក​ទៅ​កោះ​តៃវ៉ាន់​មាន​ចម្ងាយ​១៦០​គីឡូម៉ែត្រ​» ។​

​នៅពេល​ត្រូវ​បាន​សួរថា​តើ​អាម៉េរិក​មាន​ជម្រើស​អ្វីខ្លះ​បើ​ចិន​ព្យាយាម​លេប​យក​តៃវ៉ាន់ លោក អូ​ប្រាយ​អ៊ឹន​ បាន​និយាយថា «​វា​មិន​ជា​ការងារ​ងាយស្រួល​ទេ​និង​ក៏​អាច​មាន​ចម្លើយ​តប​មិន​ច្បាស់លាស់​ច្រើន​​ពី​សហរដ្ឋ​អាម៉េរិក ចំពោះ​ការវាយប្រហារ​របស់​ចិន​លើ​កោះ​តៃវ៉ាន់​»​។​

​លោក អូ​ប្រាយ​អ៊ឹន និយាយ​ដល់​គោលនយោបាយ​អាម៉េរិក​ជា​យូរ​មក​ហើយ​ស្តីពី​«​ភាព​មាន​ន័យ​មិន​ពិតប្រាកដ​ខាង​យុទ្ធសាស្ត្រ​» អំពី​បញ្ហា​ថា​តើ​ខ្លួន​នឹង​អន្តរាគមន៍​ការពារ​តៃវ៉ាន់​យ៉ាងណា ។​

​ចិន​ចាត់ទុក​កោះ​តៃវ៉ាន់​ជា​ខេត្ត​មួយ​របស់​ខ្លួន និង​បាន​ប្តេជ្ញា​បង្រួបបង្រួម​វា​ឡើង​វិញ​ជាមួយ​ចិនដីគោក ដោយ​អាច​ប្រើ​កម្លាំងយោធា​ផង​បើ​ចាំបាច់​។​តែ​សហរដ្ឋ​អាម៉េរិក​តម្រូវ​ដោយ​ច្បាប់​របស់​ខ្លួន គឺ​ការពារ​​កោះ​តៃវ៉ាន់ តាម​មធ្យោបាយ​ការពារ​ខ្លួន តែ​មិន​បាន​បញ្ជាក់​ច្បាស់​ថា​ខ្លួន​នឹង​ចូល​អន្តរាគមន៍​យោធា​ដែរ​ឬ​អត់​នៅក្នុង​ព្រឹត្តិការណ៍​ដែល​ចិន​វាយប្រហា​រកោះ​នេះ ។​

​ការព្រមាន​របស់​ទីប្រឹក្សា​សន្តិសុខ​ជាតិ​រូបនេះ កើត​ឡើង​នៅ​ពេល​ចិន​បង្កើន​សកម្មភាព​យោធា​នៅ​ជិត​កោះ​តៃវ៉ាន់​និង​នៅ​ពេល​ទំនាក់ទំនង​ចិន​-​អាម៉េរិក​ធ្លាក់ចុះ​ដល់​កម្រិត​ទាប​បំផុត​មិន​ដែល​ធ្លាប់មាន​​នៅ​រយៈពេល​ប៉ុន្មាន​ទសវត្សរ៍​មក​នេះ នៅមុន​អាម៉េរិក​ធ្វើ​ការបោះឆ្នោត​ជ្រើសរើស​ប្រធានាធិបតី​នៅ​ថ្ងៃ​៣​វិច្ឆិកា​។​

​អូ​ប្រា​អ៊ឹន​បាន​ធ្វើ​ការអំពាវនាវ​ជា​ថ្មី​ឲ្យ​តៃវ៉ាន់​ចំណាយលុយ​ច្រើន​ថែមទៀត​លើ​មធ្យោបាយ​ការពារ​ខ្លួន​និង​ធ្វើ​កំណែ​ទម្រង់​យោធា ដើម្បី​ធ្វើ​ឲ្យប្រាកដថា​ចិន​នឹង​ប្រថុយ​ធំ​បើ​ហ៊ាន​ចូលលុកលុយ​តៃវ៉ាន់​។​

​កាលពី​ថ្ងៃ​អង្គារ មន្ត្រី​យោធា​ជាន់ខ្ពស់​អាម៉េរិក​ទទួល​បន្ទុក​អាស៊ី​បូព៌ា បាន​ហៅ​ការបង្កើន​ចំណាយ​យោធា​របស់​តៃវ៉ាន់​ចំនួន​១,៤​ពាន់​លាន​ដុល្លារ​សម្រាប់​ឆ្នាំក្រោយ ថា​មិន​គ្រប់គ្រាន់​។​លោក​ថា តៃវ៉ាន់​ត្រូវ​​វិនិយោគ​លើ​សមត្ថភាព​ការពារ​កាំជ្រួច​បណ្តែត មីន​ក្នុង​សមុទ្រ យាន​វាយប្រហារ​លឿន កងកាំភ្លើងធំ​ចល័ត និង​យាន​ស៊ើបការណ៍​ទំនើប​៕​ប្រែ​សម្រួល​៖​វាសនា​/Ha

ទីតាំងផ្សាយពាណិជ្ជកម្ម

- Advertisment -

Most Popular

ប្រជាពលរដ្ឋ​ងាយ​រងគ្រោះ​ច...

ដោយ​: ទេ​ពក​ង្រី / កំពង់ឆ...

រដ្ឋបាល​ខណ្ឌ​ពោធិ៍​សែន​ជ័...

ដោយ​៖ រ៉ា​ម៉ន / ភ្នំពេញ​៖...

បុរស​ម្នាក់​ចាប់រំលោភ​កូន...

​ដោយ​: សម្បត្តិ / ភ្នំពេញ...

ប៉ូលិស​បង្ក្រាប​ក្រុម​ជួញ...

​ដោយ​: មុនី​រ័ត្ន / ភ្នំព...