ទេសរដ្ឋមន្ត្រី ស៊ុន ចាន់ថុល​៖ បន្ទាប់ពី​ការអនុវត្ត​រឹតបន្តឹង​ច្បាប់​ចរាចរណ៍​ផ្លូវគោក ប្រជាពលរដ្ឋ មានការ​ភ្ញាក់រ​ឮ​ក​ច្រើន​

ដោយ​: សុផល / ភ្នំពេញ​: លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ​និង​ដឹកជញ្ជូន បាន​មានប្រសាសន៍​ឱ្យដឹងថា បន្ទាប់ពី​ការអនុវត្ត​រឹតបន្តឹង​ការអនុវត្ត​ច្បាប់​ចរាចរណ៍​ផ្លូវគោក ប្រជាពលរដ្ឋ​មានការ​ភ្ញាក់រ​ឮ​ក​ច្រើន ហើយ​បច្ចុប្បន្ននេះ​មាន​ទិន្នន័យ​យានយន្ត​ផុត​សុពលភាព​ត្រួតពិនិត្យ​លក្ខណៈ​បច្ចេកទេស​ប្រមាណ ២៨%​។ លោក​បានបញ្ជាក់​ផងដែរ​ថា មកទល់ពេលនេះ ក្រសួង​បានធ្វើ​ការផ្ញើ​សារ SMS ចេញទៅ​ក្រើនរម្លឹក​ម្ចាស់​យានយន្ត​ប្រមាណ​១២,០០០​នាក់​ហើយ ហើយ​យើង​ក៏​បន្ត​ផ្ញើ​សារ​នេះ ដើម្បី​ជូនដំណឹង​ទៅកាន់​ពួកគាត់​ផងដែរ សំដៅ​ចូលរួម​កាត់បន្ថយ​គ្រោះថ្នាក់​ចរាចរណ៍​។​

​សូមជម្រាបថា ដើម្បី​ជួយ​សម្រួល​និង​ផ្តល់​ភាពងាយស្រួល​ដល់​ប្រជាពលរដ្ឋ ក្រសួង​សាធារណការ​និង​ដឹកជញ្ជូន​សហការ​ជាមួយ​វិស័យ​ឯកជន បាន​បង្កើត​មណ្ឌល​ឆៀក​យានយន្ត​បានជា​ច្រើន​កន្លែង​។ បច្ចុប្បន្ននេះ មាន​មណ្ឌល​ឆៀក​យានយន្ត​សរុប​ចំនួន ១៥​កន្លែង និង​ឆៀក​ចល័ត ៣​គ្រឿង ក្នុងនោះ​រាជធានី​ភ្នំពេញ​មាន ៦​កន្លែង និង​៩​កន្លែង​នៅតាម​ខេត្ត​ចំនួន​៩​ដូចជា​៖ ខេត្តបាត់ដំបង កំពង់ចាម សៀមរាប ព្រះសីហនុ កំពង់ស្ពឺ កំពង់ឆ្នាំង ក្រចេះ រតនគិរី និង​ខេត្តព្រះវិហារ ដោយឡែក​ឆៀក​ចល័ត​៣​គ្រឿង​កំពុង​ធ្វើ ប្រតិបត្តិការ​ឆៀក​របស់ខ្លួន​នៅតាម​ខេត្ត​ឆ្ងាយៗ​មួយចំនួន​ដែល​មិនទាន់មាន​មណ្ឌល​ឆៀក និង​គ្រោង​ស្ថាបនា​ទីតាំង​ចំនួន​៤​កន្លែង​ទៀត​នៅ​ឆ្នាំ​២០២១ និង​២០២២ នៅតាម​បណ្តា​នានា​ដូចជា​៖ ខេត្តកំពង់ធំ ស្វាយរៀង បន្ទាយមានជ័យ និង​ខេត្តកំពត​។ កាលពី​ថ្ងៃទី​៧ តុលា មជ្ឈមណ្ឌល​ត្រួតពិនិត្យ​លក្ខណៈ​បច្ចេកទេស​យានយន្ត​(​ឆៀក​) មួយទៀត​នៅ​កំបូល រាជធានី​ភ្នំពេញ ត្រូវបាន​សម្ពោធ​បើក​ឱ្យប្រើ​ប្រាស់​ជា​ផ្លូវការ​។

​លោក​ទេសរដ្ឋមន្ត្រី ក៏បាន​គូសបញ្ជាក់​អំពី​គោលនយោបាយ​របស់​រាជ​រដ្ឋាភិបាល​ក្នុង​ការផ្តល់​សេវាសាធារណៈ សេវា​ចាំបាច់ ប្រកបដោយ​តម្លាភាព ប្រសិទ្ធភាព និង​ឆាប់រហ័ស ជូន​បងប្អូន​ប្រជាពលរដ្ឋ ការដាក់ឱ្យ​ដំណើរការ​មណ្ឌល​ប្តូរ ឬ​ពន្យារ​បណ្ណ​បើកបរ​នៅ​ផ្សារ​ទំនើប​អ៊ី​អន​១ អ៊ី​អន ២ និង​ផ្សារ​ទំនើប​ជីបម៉ុង​ណូ​រ៉ូ​ម៉​ល ដើម្បី​បង្ខិត​សេវា​នេះ​ទៅ​កៀក​ប្រជាពលរដ្ឋ​ផ្តល់​ភាពងាយស្រួល​ដល់​បងប្អូន​ប្រជាពលរដ្ឋ​ដែលមាន​បំណង​ចង់​ប្តូរ ឬ​ពន្យារ​បណ្ណ​បើកបរ ការដាក់ឱ្យ​ប្រើប្រាស់​ប្រព័ន្ធ​អន​ឡាញ​ចុះបញ្ជី​យានយន្ត ការដាក់​ពាក្យស្នើសុំ​ត្រួតពិនិត្យ​លក្ខណៈ​បច្ចេកទេស​យានយន្ត​តាម​ប្រព័ន្ធ​អន​ឡាញ ការរៀបចំ​កម្មវិធី​ប​ប្រឡង​យក​បណ្ណ​បើកបរ ការលក់​លេខ​ចុះបញ្ជី​ពិសេស​ផ្ទាល់ខ្លួន​សម្រាប់​យានយន្ត ការផ្ទេរកម្មសិទ្ធិ​យានយន្ត ដែល អាចឱ្យ​ប្រជាពលរដ្ឋ​ងាយស្រួល​ក្នុងការ​ស្នើសុំ​សេវា ស្របតាម​ប្រសាសន៍​ដ៏​ខ្ពង់ខ្ពស់​សម្ដេច​តេ​ជោ​នាយក រដ្ឋមន្ត្រី​គឺ ធ្វើឱ្យបាន​លឿន ធ្វើឱ្យមាន​ប្រសិទ្ធភាព និង​ធ្វើឱ្យមាន​តម្លាភាព​។​

​ជាមួយគ្នានេះ លោក​ទេសរដ្ឋមន្ត្រី​បាន​បន្ថែមថា ក្រសួង​នឹង​បន្ត​ខិតខំ​រក​នីតិវិធី​ផ្សេងទៀត​ដើម្បី ផ្តល់​សេវា​ងាយស្រួល​ជូន​បងប្អូន​ប្រជាពលរដ្ឋ​និង​បន្ត​សាងសង់​ប្រព័ន្ធ​ហេដ្ឋារចនាសម្ព័ន្ធ​បន្ថែមទៀត ដូចជា​៖ ការពង្រីក​និង​ពង្រឹងគុណភាព​ផ្លូវ ការសាងសង់​ស្ពាន និង​កំពង់ផែ​ជាដើម ដើម្បីឱ្យ​ប្រព័ន្ធ​ដឹក ជញ្ជូន​មាន​ភាព​ប្រកួតប្រជែង អាច​ដឹកជញ្ជូន​បាន​ក្នុង​តម្លៃថោក និង​អាច​ទាក់ទាញ​វិនិយោគិន​បង្កើត ការងារ​ធ្វើ បង្កើន​ប្រាក់ចំណូល​ជូន​ប្រជាពលរដ្ឋ​ផងដែរ​។​

​លោក​បាន​គូសបញ្ជាក់​ផងដែរ​ថា​៖ ទោះបី​ប្រទេស​យើង​ក៏​ដូច​សកលលោក​កំពុង​ប្រឈម​នឹង​បញ្ហា​ជំងឺ​កូ​វីដ​-១៩​យ៉ាងណាក្ដី ក៏​រាជរដ្ឋាភិបាល​នៅតែ​បន្ត​ស្ថាបនា​ហេ​ដ្ឋា​រចនា សម្ព័ន្ធ​ដឹកជញ្ជូន​ទាំង​ផ្លូវគោក ផ្លូវទឹក ផ្លូវដែក ស្ពាន និង​កំពង់ផែ​ឥតឈប់ឈរ​ឡើយ​។​

​លោក​ទេសរដ្ឋមន្ត្រី​បាន​អំពាវនាវ​ដល់​បងប្អូន​ប្រជាពលរដ្ឋ និង​ក្រុមហ៊ុន​ដឹកជញ្ជូន ដែល​មិនទាន់បាន យក​យានយន្ត​របស់ខ្លួន​ទៅ​ត្រួតពិនិត្យ​លក្ខណៈ​បច្ចេកទេស​សូម​យក​យានយន្ត​របស់ខ្លួន ទៅ​ត្រួតពិនិត្យ​លក្ខណៈ​បច្ចេកទេស​តាមច្បាប់​កំណត់​មុន​នឹងធ្វើ​ចរាចរណ៍​ដើម្បី​ចូលរួមចំណែក​ក្នុងការ កាត់បន្ថយ​គ្រោះថ្នាក់​ចរាចរណ៍ មិនត្រូវ​ដឹកជញ្ជូន​ទំនិញ​លើស​ទម្ងន់​កម្រិត​កំណត់ និង​បាន​សំណូមពរ​ឱ្យ អ្នកប្រើប្រាស់​ផ្លូវថ្នល់​ទាំងអស់​គោរព​ច្បាប់​ចរាចរណ៍​ឱ្យបាន​ខ្ជាប់ខ្ជួន មិនត្រូវ​បើកបរ​លើស​ល្បឿន​កំណត់ មិនត្រូវ​ប្រើ គ្រឿង​ស្រវឹង និង​ទូរស័ព្ទ​ពេល​កំពុង​បើកបរ ដើម្បី​កាត់បន្ថយ​គ្រោះថ្នាក់​ចរាចរណ៍​នៅតាម​ដងផ្លូវ​៕ ល​

ទីតាំងផ្សាយពាណិជ្ជកម្ម

- Advertisment -

Most Popular