Home ព័ត៌មានជាតិ សន្តិសុខ ជិះ​ម៉ូតូ​បុក...

ជិះ​ម៉ូតូ​បុក​ឡាន​ពីក្រោយ​ហើយ បែរជា​ប្តឹង​ទារ​សំណង​រហូតដល់​១​ម៉ឺន​ដុល្លារ​, ព្រះរាជអាជ្ញា​ចុះ​ដល់​កន្លែងកើតហេតុ​ផ្ទាល់ ដើម្បី​ស្វែងរក​ការពិត​

ដោយ​៖ ឆាយា​នាថ / កណ្តាល​៖ បុរស​ម្នាក់​ឈ្មោះ សៀង វុទ្ធី ជិះ​ម៉ូតូ​មិនមាន​ការប្រុងប្រយ័ត្ន ជ្រុល​ទៅបុក​ឡាន​ពីក្រោយ​ដែល​កំពុងធ្វើដំណើរ​តាមផ្លូវ បណ្តាលឲ្យ​រងរបួស​ធ្ងន់​ខ្លួនឯង​។ ប៉ុន្តែ​អ្វី​ជាការ​ហួសចិត្ត​នោះ បែរជា​ក្រុមគ្រួសារ​ខាង​ម៉ូតូ ប្តឹង​ទាមទារ​សំណង​ពី​ភាគី​ខាង​ឡាន​ដែល​មិន​ខុស​អ្វី​សោះ រហូតដល់​១​ម៉ឺន​ដុល្លារទៅវិញ​។​

​ដើម្បី​បង្ហាញ​ការពិត​នៃ​រឿង​គ្រោះថ្នាក់​ចរាចរណ៍​នេះ លោក ឯក ស៊ុន​រស្មី ព្រះរាជអាជ្ញារង​អម​សាលាដំបូង​ខេត្តកណ្តាល បាន​ចុះ​ដល់​កន្លែងកើតហេតុ​។ ជា​លទ្ធផល បង្ហាញថា គ្រោះថ្នាក់​ចរាចរណ៍​នេះ បណ្តាលមកពី​ភាគី​ខាង​ម៉ូតូ បើកបរ​ធ្វេសប្រហែស ខ្ជីខ្ជា​មិន​ប្រុងប្រយ័ត្ន មិន​ពិនិត្យមើល​ស្ថានភាព​ផ្លូវ​ខាងមុខ​ឲ្យ​បានច្បាស់លាស់​ពេល​កំពុង​បើកបរ​។

​យោងតាម​របាយការណ៍​ពី​អធិការដ្ឋាន​នគរបាល​ស្រុក​កៀនស្វាយ ដែល​ទើប​ទទួលបាន​នៅ​ថ្ងៃទី​៩ ខែតុលា ឆ្នាំ​២០២០ នេះ បង្ហាញថា គ្រោះថ្នាក់​ចរាចរណ៍​នេះ បានកើត​ឡើងកាលពី​ថ្ងៃទី​១៦ ខែកញ្ញា ឆ្នាំ​២០២០ កន្លងទៅ វេលា​ម៉ោង​១៥៖៤០​នាទី លើ​ចំណុច​ផ្លូវ​លេខ​១១០ ភូមិ​ព្រែក​ស្វាយ ឃុំ​ឈើទាល ស្រុក​កៀនស្វាយ ខេត្តកណ្តាល​។​

​សមត្ថកិច្ច អះអាងថា មាន​រថយន្ត​មួយគ្រឿង​ម៉ាក កាមរី បា​ឡែ​ន ពណ៌​ទឹកប្រាក់ ពាក់​ផ្លាក​លេខ ភ្នំពេញ 2AH-6810 បើកបរ​ដោយ​ឈ្មោះ ឡៃ ភី ភេទ​ប្រុស អាយុ​៤១​ឆ្នាំ មាន​ទីលំនៅ​ភូមិ​កណ្តឹង​ធំ ឃុំ​កណ្តឹង​ធំ ស្រុក​បាទី ខេត្តតាកែវ មុខរបរ​កសិករ បើកបរ ទិសដៅ​ពី​លិច​មក​កើត ពោលគឺពី​ភ្នំពេញ​ទៅ​ស្អាង​។​

​ពេលមកដល់​ចំណុចកើតហេតុ ក៏​ឈប់​រថយន្ត​បន្តិច​រង់ចាំ រថយន្ត​បើក​ទិសដៅ​ផ្ទុយ​ឆ្លងស្ពាន​ព្រែក​ហាស ក៏មាន​ម៉ូតូ​ម៉ាក HONDA WAVE ពណ៌​ក្រហម​លាយ​ខ្មៅ ពាក់​ផ្លាក​លេខ​ភ្នំពេញ 1AF-9496 បើកបរ​ដោយ​ឈ្មោះ សៀង វុទ្ធី ភេទ​ប្រុស អាយុ​៤២​ឆ្នាំ មាន​ទីលំនៅ ភូមិ​ព្រែក​ដូង ឃុំ​កំពង់ស្វាយ ស្រុក​កៀនស្វាយ ខេត្តកណ្តាល មុខរបរ​កសិករ រងរបួស​ធ្ងន់ មាន​ទិសដៅ​ស្រប​ទិស​មក​បុក​ចំ​ពីក្រោយ​រថយន្ត កាមរី បណ្តាល​ឲ្យ​អ្នកបើកបរ​ម៉ូតូ​ដួល​ទៅលើ​ទ្រូងផ្លូវ​ចូល​ចំណែក​ផ្លូវ​រថយន្ត​ម៉ាក TOYOTA Highlander ពណ៌​ទឹកប្រាក់ ពាក់​ផ្លាក​លេខ ភ្នំពេញ 2AB-7578 បើកបរ​ដោយ​ឈ្មោះ គឹម ឆាយ​រ៉ា ភេទ​ប្រុស អាយុ​៣៥​ឆ្នាំ មាន​លំនៅ​ភូមិ​ព្រែក​សំរោង សង្កាត់​តាខ្មៅ ក្រុង​តាខ្មៅ ខេត្តកណ្តាល មុខរបរ​បុគ្គលិក​ក្រុមហ៊ុន​។

​ករណីនេះ បណ្តាល​ឲ្យ​ម៉ូតូ​ខូចខាត​ធ្ងន់​១​គ្រឿង​, រថយន្ត​ខូចខាត​ស្រាល​២​គ្រឿង ត្រូវបាន​កម្លាំង​ជំនាញ​ចុះ​វាស់វែង​យកទៅ​រក្សា​ទុកជា​ភស្តុតាង នៅ​អធិការដ្ឋាន​នគរបាល​ស្រុក​កៀនស្វាយ ដើម្បី​បន្ត​នីតិវិធី​។​

​សមត្ថកិច្ច​សន្និដ្ឋានថា គ្រោះថ្នាក់​ចរាចរណ៍​នេះ បណ្តាលមកពី​ភាគី​ខាង​ម៉ូតូ​បើកបរ​ធ្វេសប្រហែស ខ្ជីខ្ជា​មិន​ប្រុងប្រយ័ត្ន មិន​ពិនិត្យមើល​ស្ថានភាព​ផ្លូវ​ខាងមុខ​ឲ្យ​បានច្បាស់លាស់​ពេល​កំពុង​បើកបរ​។

​ទោះបីយ៉ាងណា ពេលនេះ បែរជា​ភាគី​ខាង​ម៉ូតូ​ប្តឹង​ទាមទារ​សំណង​ពី​ខាង​ភាគី​ឡាន​ទាំង​២​គ្រឿង រហូតដល់​ចំនួន​១​ម៉ឺន​ដុល្លារ​។ ប៉ុន្តែ ក្នុងការជួប​ចរចា​គ្នា កាលពី​រសៀល​ថ្ងៃទី​៨ ខែតុលា ឆ្នាំ​២០២០ នៅ​តុលាការ​ខេត្តកណ្តាល ភាគី​ខាង​ម៉ូតូ​បានទាមទារ​សំណង​ត្រឹម​៥​ពាន់​ដុល្លារ​វិញ ខណៈ​ខាង​ភាគី​ឡាន​ជួយ​ជា​លុយ​សប្បុរសធម៌​ចំនួន​១​ពាន់​ដុល្លារ តែ​ភាគី​ខាង​ម៉ូតូ​នៅតែ​មិន​ព្រម​។​

​អ្វី​ជា​ចំណុច​សំខាន់​នោះ ភាគី​ខាង​ឡាន​បានដាក់​ពាក្យសុំ​ឡាន​ពី​ខាង​តុលាការ​ខេត្តកណ្តាល ដើម្បី​ប្រើប្រាស់​បម្រើ​ឲ្យ​ជីវភាព​ប្រចាំថ្ងៃ​។ ចំពោះ​នីតិវិធី​យ៉ាងណា​នោះ ភាគី​ខាង​ឡានសន្យាថា នឹង​ចូលខ្លួន​បំភ្លឺ​គ្រប់ពេលវេលា ដោយ​មិន​គេចវេះ​ឡើយ​។​

​បញ្ហា​នេះ ភាគី​ខាង​ឡាន សំណូមពរ​ដល់​លោក ឯក ស៊ុន​រស្មី ព្រះរាជអាជ្ញារង​អម​សាលាដំបូង​ខេត្តកណ្តាល មេត្តា​ប្រគល់​ឡាន​ទាំង​២​គ្រឿង ឲ្យ​មក​ពួកគេ​ប្រើប្រាស់​វិញ​ផង ដោយ​ក្តី​អនុគ្រោះ​៕ ល​/Ha

ទីតាំងផ្សាយពាណិជ្ជកម្ម

- Advertisment -

Most Popular