​គ​.​ជ​.​ប អំពាវនាវ​ប្រជាពលរដ្ឋ​ទៅពិនិត្យ​បញ្ជី​ឈ្មោះ និង​ចុះឈ្មោះ​បោះឆ្នោត​

206
ចែករម្លែក

​ដោយៈ មុនី​រ័ត្ន​/​ភ្នំពេញៈ បើទោះបីជា​រយៈពេល​ប្រាំពីរ​ថ្ងៃ​នៃ​ការពិនិត្យ​បញ្ជី​ឈ្មោះ និង​ការចុះឈ្មោះ​បោះឆ្នោត មាន​អ្នក​ចុះឈ្មោះ​បោះឆ្នោត​ថ្មី សរុប​ចំនួន ១០៤.៦៩១​នាក់ ស្មើនឹង ៣៤,៨៥​ភាគរយ​។ អ្នក​លុប​ចេញពី​បញ្ជី មាន​ចំនួន ៣៥.៧១០ នាក់ អ្នក​កែតម្រូវ​ទិន្នន័យ មាន​ចំនួន ៣០.៣៦៣​នាក់ និង​អ្នក​ផ្ទេរ​ចូល មាន​ចំនួន ២៩.៣៧៩ នាក់ ក៏ដោយ គ​.​ជ​.​ប នៅតែ​បន្ត​អំពាវនាវ​ដល់​ប្រជាពលរដ្ឋ ឱ្យមក​ចូលរួម​ក្នុងការ​ពិនិត្យ​បញ្ជី​ឈ្មោះ និង​ការចុះឈ្មោះ​បោះឆ្នោត​។​

​នៅក្នុង​កិច្ចប្រជុំ​ជាមួយ​ភាគី​ពាក់ព័ន្ធ​កាលពី​ព្រឹក​ថ្ងៃទី​៩ ខែតុលា ឆ្នាំ​២០២០ លោក ឌុ​ច សុន សមាជិក គ​.​ជ​.​ប បាន​បញ្ជាក់ថា ក្នុង​រយៈពេល​ប្រាំពីរ​ថ្ងៃនេះ​នៅតាម​បណ្តា​ឃុំ សង្កាត់​មួយចំនួន​នៃ​រាជធានី ខេត្ត​ទូទាំងប្រទេស​បាន​ជួបប្រទះ​នូវ​បញ្ហា​អាកាសធាតុ និង​បញ្ហា​ប្រឈម​មួយចំនួនទៀត ប៉ុន្តែ​មិនបាន​ធ្វើឱ្យ​រាំងស្ទះ​ដល់​ដំណើរការ​ពិនិត្យ​បញ្ជី​ឈ្មោះ និង​ការចុះឈ្មោះ​បោះឆ្នោត​ឡើយ​។


​ទាំងនេះ​គឺ​ដោយសារ​មាន​កិច្ចសហការ​យ៉ាង​ស្អិតរ​មួ​ត​រវាង​អ្នកបច្ចេកទេស​ថ្នាក់ជាតិ លេខាធិការដ្ឋាន​រាជធានី ខេត្ត​រៀបចំ​ការបោះឆ្នោត ក្រុមប្រឹក្សាឃុំ សង្កាត់ ក្រុម​ចុះឈ្មោះ និង​ភាគី​ពាក់ព័ន្ធ​ផ្សេងទៀត បាន​ដោះស្រាយ​ទាន់ពេលវេលា​។
​តាម​ផែនការ ក្រុម​ចុះឈ្មោះ​បោះឆ្នោត ត្រូវ​ចល័ត​ការិយាល័យ​ចុះឈ្មោះ​ទៅតាម​ភូមិ​មួយចំនួន​ក្នុង​ឃុំ សង្កាត់ ដើម្បី​បង្ខិត​សេវា​ចុះឈ្មោះ​បោះឆ្នោតឱ្យ​កាន់តែ​ខិតជិត​លំនៅឋាន​របស់​ប្រជាពលរដ្ឋ​។
​ការ​ចល័ត​នេះ​មាន​រយៈពេល ១០​ថ្ងៃ ចាប់ពី​ថ្ងៃទី​៥ រហូតដល់​ថ្ងៃទី​១៤ ខែតុលា ឆ្នាំ​២០២០ ហើយនឹង​វិល​ត្រឡប់មក​ចុះឈ្មោះ​នៅតាម​សាលាឃុំ សង្កាត់​វិញ នៅ​ថ្ងៃទី​១៥ ដល់​ថ្ងៃទី​១៩ ខែតុលា ឆ្នាំ​២០២០​។


​ឆ្លៀត​ក្នុងឱកាស​នេះ លោក ឌុ​ច សុន​បាន​អំពាវនាវ​ឱ្យ​ប្រជាពលរដ្ឋ​មក​ចូលរួម​ពិនិត្យមើល​ឈ្មោះ និង​ចុះឈ្មោះ​បោះឆ្នោត​ឱ្យបាន​គ្រប់ៗ​គ្នា​។ ការិយាល័យ​ចុះឈ្មោះ​បោះឆ្នោត បើក​ធ្វើការ​ជា​រៀងរាល់ថ្ងៃ គិត​ទាំង​ថ្ងៃ​សៅរ៍ និង​ថ្ងៃអាទិត្យ ពេលព្រឹក​ចាប់ពី​ម៉ោង ៧:០០​នាទី ដល់​ម៉ោង ១១:៣០​នាទី​ថ្ងៃត្រង់ និង​ពេល​រសៀល​ចាប់ពី​ម៉ោង ២:០០​នាទី ដល់​ម៉ោង ៥:៣០​នាទី​ល្ងាច​។​គ​.​ជ​.​ប​មាន​យន្តការ​ការងារ​ចំនួន​បី​ក្នុងការ​ដោះស្រាយ​រាល់​បញ្ហា​ដែល​កើតមានឡើង​ក្នុង​ដំណើរ​ការងារ​នៅពេលនេះ​រួមមាន ៖ យន្តការ​នៃ​កិច្ចប្រជុំ​ជាមួយ​ភាគី​ពាក់ព័ន្ធ យន្តការ​តាមរយៈ​លិខិត​រដ្ឋបាល យន្តការ​បណ្តឹង​តាមច្បាប់​ជា​ធរមាន​។​

​សូម​ជម្រាបជូន​ថា ការពិនិត្យ​បញ្ជី​ឈ្មោះ និង​ការចុះឈ្មោះ​បោះឆ្នោត ឆ្នាំ​២០២០ នេះ គឺជា​លើក​ទី​៥ នៃ​ការធ្វើ​បច្ចុប្បន្នភាព​បញ្ជី​បោះឆ្នោត​តាម​ប្រព័ន្ធ​កុំព្យូទ័រ ដែលជា​ប្រព័ន្ធ​ទំនើប បើ​គិត​ចាប់តាំងពី​ឆ្នាំ​២០១៦​មក​។ កម្មវិធី​នេះ ទទួលបាន​តម្លាភាព ប្រសិទ្ធភាព និង​មាន​ផល​វិជ្ជមាន ដូចជាៈ ការធានា​នូវ​ការ​ដៅ​សម្គាល់​អត្តសញ្ញាណ​របស់​អ្នកបោះឆ្នោត ដែលមាន​តែមួយគត់​ក្នុង​បញ្ជី​បោះឆ្នោត តាមរយៈ​ការរក្សា​ទុក​ខ្ចៅដៃ រូបថត លេខ​អត្តសញ្ញាណប័ណ្ណ​សញ្ជាតិ​ខ្មែរ និង​អត្តលេខ​របស់​សាមីខ្លួន ក្នុង​ប្រព័ន្ធ​កុំព្យូទ័រ និង​បញ្ជី​បោះឆ្នោត​។ ធានាថា អ្នកបោះឆ្នោត​ម្នាក់ៗ​មានឈ្មោះ​តែមួយគត់​នៅក្នុង​បញ្ជី​បោះឆ្នោត​។


​ធានាថា គុណភាព​នៃ​បញ្ជី​បោះឆ្នោត​មាន​សុក្រឹត្យភាព ភាព​ពេញលេញ ភាពត្រឹមត្រូវ និង​បច្ចុប្បន្នភាព​។​ងាយស្រួល​ក្នុងការ​ស្វែងរក​ឈ្មោះ​ទិន្នន័យ​និង​ទីតាំង​ការិយាល័យ​របស់​អ្នកបោះឆ្នោត​តាម​ប្រព័ន្ធ​កុំព្យូទ័រ គេហទំព័រ គ​.​ជ​.​ប ឬ​កម្មវិធី​ទូរស័ព្ទដៃ (Mobile App)​។ ធ្វើឱ្យ​កាន់តែ​មាន​ជំនឿ​ទុកចិត្ត​លើ​ប្រព័ន្ធ​បោះឆ្នោត និង​លើ គ​.​ជ​.​ប​៕S/

ទីតាំងផ្សាយពាណិជ្ជកម្ម