លោក អំ សំ​អូន «​ម្ចាស់​គម្រោង​ដី​ឡូ​តិ៍​ក្រុង​តាខ្មៅ​ថ្មី​» មិន​បានធ្វើ​ប្លង់រឹង​ជូន​អតិថិជន តាម​ការសន្យា​ជាង​២​ឆ្នាំ​មកហើយ​

164
ចែករម្លែក

ដោយ​: ឆាយា​នាថ / កណ្តាល​: ប្រជាពលរដ្ឋ​ជាច្រើន​នាក់​រស់នៅ​ភូមិ​ព្រែកត្រែង សង្កាត់​សិត្បូ ក្រុង​តាខ្មៅ ខេត្តកណ្តាល និង​ជា​អតិថិជន​ដែល​បាន​ទិញ​ដី​ឡូ​តិ៍​ពី​លោក អំ សំ​អូន សមាជិក​ក្រុមប្រឹក្សា​ខេត្តកណ្តាល និង​ជា «​ម្ចាស់​គម្រោង​ដី​ឡូ​តិ៍​ក្រុង​តាខ្មៅ​ថ្មី​» បានទាមទារ​ឲ្យ​លោក អំ សំ​អូន ធ្វើ​ប្លង់រឹង​ជូន​ពលរដ្ឋ តាម​ការសន្យា ព្រោះ​ខកខាន​រយៈពេល​ជាង​២​ឆ្នាំ​មកហើយ រហូត​មានការ​ប្រមូល​ផ្តុំគ្នា​មុខ​សាលា​ខេត្តកណ្តាល នាពេល​ថ្មីៗ​នេះផងដែរ ដើម្បី​ទាមទារ​ដំណោះស្រាយ ពី​លោក​អភិបាលខេត្ត​កណ្តាល​។​

​លោក រឿន រ៉ែ​ន តំណាង​ប្រជាពលរដ្ឋ ថ្លែង​ប្រាប់ថា រហូតមកទល់​ពេលនេះ ប្រជាពលរដ្ឋ​នៅ​ពុំទាន់​ទទួលបាន​ដំណោះស្រាយ​ពី​អាជ្ញាធរ​នៅឡើយ​ទេ ខណៈ​លោក​អភិបាលខេត្ត​កណ្តាល ក៏​ពុំទាន់​អញ្ជើញ​ប្រជាពលរដ្ឋ ដើម្បី​ជួប​ច​រចាបញ្ហា​នេះដែរ​។

​លោក រឿន រ៉ែ​ន បន្តថា ប្រជាពលរដ្ឋ​បានដាក់​ញត្តិ​ជូន​ខុទ្ទកាល័យ​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា រួចរាល់​ហើយ ដើម្បី​ឲ្យ​សម្តេច​ជួយ​អន្តរាគមន៍​បញ្ហា​នេះ​។ តំណាង​ពលរដ្ឋ​បន្តថា លោក អំ សំ​អូន គឺមាន​ចេតនា​មិន​ធ្វើ​ប្លង់រឹង​ជូន​ប្រជាពលរដ្ឋ តាម​ការសន្យា​ឡើយ​។

​ឆ្លើយតប​បញ្ហា​នេះ លោក គង់ សោ​ភ័​ណ្ឌ អភិបាលខេត្ត​កណ្តាល ថ្លែងប្រាប់កាលពី​ថ្ងៃទី​៣០ ខែកញ្ញា ឆ្នាំ​២០២០ កន្លងទៅ ថា អាជ្ញាធរ​កំពុង​ពិនិត្យ​លើ​ឯកសារ​ពាក់ព័ន្ធ ហើយនឹង​អញ្ជើញ​ប្រជាពលរដ្ឋ​បាន​ជួបពិភាក្សា​គ្នាជុំវិញ​បញ្ហា​នេះ នាពេល​ខាងមុខនេះ​។​

​យោងតាម​ពាក្យបណ្តឹង​របស់​ប្រជាពលរដ្ឋ បាន​ឲ្យ​ដឹងថា លោក អំ សំ​អូន បានទទួល​ប្រាក់​ពី​ប្រជាពលរដ្ឋ​ទាំងអស់គ្នា ខ្លះ​បានផ្តល់​ឲ្យ​គ្រប់​ចំនួន រីឯ​ខ្លះទៀត​នៅសល់​បន្តិចបន្តួច និង​ចាំ​ទទួលបាន​ប្លង់រឹង​ទើប​ឲ្យ​ប្រាក់​បង្គ្រប់​។

​គ្រប់​ដី​ឡូ​តិ៍​នីមួយៗ គឺ​ទទួលបាន​ការសន្យា​ពី​ឈ្មោះ សុខ វិចិត្រ ដែលជា​តំណាង​លោក អំ សំ​អូន ថា រយៈពេល​៣​ទៅ​៦​ខែ នឹង​ទទួលបាន​ប័ណ្ណកម្មសិទ្ធិ​ប្លង់រឹង ក្រោម​ការរៀបចំ​ឯកសា​រកា​ត់​ប្លង់ និង​ចេញ​បង្កាន់ដៃ​ដោយ​លោក ម៉ែន សា​មិទ្ធ មន្ត្រី​សូ​រិ​យោ​ដី​ស្រុក​ស្អាង​។ ប៉ុន្តែ មកដល់​ថ្ងៃទី​១ ខែកក្កដា ឆ្នាំ​២០២០ ប្រជាពលរដ្ឋ​នៅតែ​ពុំទាន់​ទទួលបាន​ប័ណ្ណកម្មសិទ្ធិ​ប្លង់រឹង​នៅឡើយ​ទេ​៕ ល​/Ha

ទីតាំងផ្សាយពាណិជ្ជកម្ម