​ដំណើរការ​ពិនិត្យ​បញ្ជី​ឈ្មោះ​-​ការចុះឈ្មោះ​បោះឆ្នោត​ឆ្នាំ​២០២០​គ​.​ជ​.​បទ​ទួល​ពាក្យបណ្តឹង​ចំនួន​៨

ដោយៈ មុនី​រ័ត្ន​/​ភ្នំពេញៈ គណកម្មាធិការ​ជាតិ​រៀបចំ​ការបោះឆ្នោត (​គជប​) បាន​ឲ្យ​ដឹងថា ដំណើរការ​ពិនិត្យ​បញ្ជី​ឈ្មោះ និង​ការចុះឈ្មោះ​បោះឆ្នោត ឆ្នាំ​២០២០ គ​.​ជ​.​ប បានទទួល​ពាក្យបណ្តឹង​សរុប​ចំនួន ៨ បណ្តឹង​។ ក្នុងចំណោម​ពាក្យបណ្តឹង​ទាំង ៨ នោះ មាន​២​បណ្តឹង ត្រូវបាន​ប្តឹងទៅ​ក្រុមប្រឹក្សាឃុំ សង្កាត់ (​កបឃ​.​ស​) ជា​ពាក្យបណ្តឹង​សុំឱ្យ​ផ្តន្ទាទោស និង ៦​បណ្តឹង ប្តឹង​ផ្ទាល់​ទៅ​គណៈកម្មាធិការ​ជាតិ​រៀបចំ​ការបោះឆ្នោត (​គ​.​ជ​.​ប​) ជា​ករណី​ប្តឹង​សមាសភាព កបឃ​.​ស ។ បណ្តឹង​ទាំង​៨ គឺ​ប្តឹង​ដោយ​ភ្នាក់ងារ និង​មន្ត្រី​គណបក្ស​សម្ព័ន្ធ​ដើម្បី​ប្រជាធិបតេយ្យ​។​

​គ​.​ជ​.​ប បាន​បន្តថា បណ្តឹង​ទាំងអស់ ត្រូវបាន​ដោះស្រាយ​ដូចជាៈ នៅ​ខេត្តកំពង់ចាម មាន ១​បណ្តឹង កំពុង​ដោះស្រាយ​។ រាជធានី​ភ្នំពេញ មាន ១​បណ្តឹង បាន​ផ្សះផ្សា​សះជា​។ នៅ​ខេត្តក្រចេះ មាន ១​បណ្តឹង កំពុង​ដោះស្រាយ​។ នៅ​ខេត្តព្រៃវែង មាន ១​បណ្តឹង កំពុង​ដោះស្រាយ​។ នៅ​ខេត្តសៀមរាប មាន ៤​បណ្តឹង កំពុង​ដោះស្រាយ​ទាំង​៤​បណ្តឹង​។​

​គ​.​ជ​.​ប បាន​បញ្ជាក់ថា ការដាក់ ការទទួល និង​ការដោះស្រាយ​ពាក្យបណ្តឹង​នៅ គ​.​ជ​.​ប មាន​បី​ដំណាក់កាល​រួមមាន​៖ ដោះស្រាយ​នៅ​ថ្នាក់​ក្រុមប្រឹក្សាឃុំ សង្កាត់ (​កបឃ​.​ស​) ដោះស្រាយ​នៅ គ​.​ជ​.​ប និង​ដោះស្រាយ​នៅ​ក្រុមប្រឹក្សាធម្មនុញ្ញ (​សេចក្តីសម្រេច​របស់​ក្រុមប្រឹក្សាធម្មនុញ្ញ ជា​សេចក្តីសម្រេច​ស្ថាពរ​បិទផ្លូវ​តវ៉ា​)៕S/​

ទីតាំងផ្សាយពាណិជ្ជកម្ម

- Advertisment -

Most Popular