រថយន្តបុក​ម៉ូតូ​អូស​ជាង​១០​ម៉ែត្រ បណ្តាល​ឲ្យ​ស្លាប់​មនុស្ស​ម្នាក់

257
ចែករម្លែក

ដោយ​: សុខ​សុ​ភ័​ណ្ឌ / កំពង់ស្ពឺ​: គ្រោះថ្នាក់​ចរាចរ​រវាង​រថយន្ត​សណ្តោង​រ៉ឺម៉ក​ដឹក​ទូ​កុងតឺន័រ បុក​ជាមួយ​ម៉ូតូ​អូស​ជាង​១០​ម៉ែត្រ បណ្តាល​ឲ្យ​ស្លាប់​មនុស្ស​ម្នាក់​ភ្លាមៗ នៅនឹងកន្លែង​កើតហេតុ​។​ ហេតុការណ៍​នេះ បង្ក​ឲ្យ​មានការ​ភ្ញាក់ផ្អើល​កាលពី​វេ​ល​ម៉ោង​៥​ល្ងាច​ថ្ងៃទី​១០​ខែតុលា​ឆ្នាំ​២០២០ នៅតាម​បណ្តោយ​ផ្លូវជាតិ​លេខ​៥ ចន្លោះ​គីឡូម៉ែត្រ​លេខ​៣៩​និង​៤០ ស្ថិត​ក្នុងភូមិ​ក្រាំង​ពន្លៃ ឃុំ​វាំង​ចាស់ ស្រុក​ឧដុង្គ​ខេត្តកំពង់ស្ពឺ​។​

​មន្ត្រីនគរបាល​ស្រុក​ឧដុង្គ​បាន​ឲ្យ​ដឹងថា មុន​កើតហេតុ​គេ​ឃើញ​រថយន្ត​មួយ គ្រឿង​ម៉ាក HINO ពណ៌​ស ពាក់​ស្លាក​លេខ ភ្នំពេញ 3E 7323 សណ្តោង​រ៉ឺម៉ក ពណ៌​ក្រហម ពាក់​ស្លាក​លេខ ព្រះសីហនុ 4A 1139 ដឹក​កុងតឺន័រ​។​

​បើកបរ​ដោយ​ឈ្មោះ រឹម ជីវាន់ ភេទ​ប្រុស អាយុ ២៩​ឆ្នាំ រស់នៅ​ភូមិ​ក្បាលដំរី ឃុំ​ត្រពាំង​ផ្លុ​ង ស្រុក​ពញាក្រែក ខេត្ត​ត្បូងឃ្មុំ បើកបរ​ពី​លិចទៅ​កើត លុះ​បើក​មកដល់​ចំណុច​ខាងលើ​បាន​បើក​វ៉ា​ជែង​រថយន្ត មួយគ្រឿង​ទៀត​ដែល​កំពុង​បើកបរ​ក្នុងទិសដៅ​ស្របគ្នា ហើយ​បាន​ជ្រុល​ទៅបុក​ម៉ូតូ​មួយគ្រឿង ម៉ាក HONDA សេ​១២៥​សេរី​២០១៩ ពណ៌​ខ្មៅ ពាក់​ស្លាក​លេខ កណ្តាល 1AB.7466​។​

​ប្រភព​បាន​បន្តថា អ្នកបើកបរ​ម៉ូតូ​មានឈ្មោះ ប្រាំង ច​ន្ធូ ភេទ​ស្រី អាយុ ២៥​ឆ្នាំ​(​ស្លាប់​) រស់នៅ​ភូមិ​ពោធិ៍​តូច ឃុំ​កំពង់ហ្លួង ស្រុក​ពញាឮ ខេត្តកណ្ដាល ដែល​កំពុង​បើកបរ​ក្នុងទិសដៅ​បញ្ច្រាស​គ្នា​យ៉ាង​ពេញទំហឹង​អូស​កិន​ស្ត្រី​រងគ្រោះ​ជាមួយ​ម៉ូតូ​ជាង​១០​ម៉ែត្រ​។​

​ក្រោយ​កើតហេតុ សព​ស្ត្រី​ខាងលើ​ត្រូវបាន​សាច់ញាតិ​យកទៅ​ធ្វើបុណ្យ​តាម​ប្រពៃណី​។ ចំណែក​អ្នកបើករថយន្ត​បង្ក ត្រូវ​សមត្ថកិច្ច​ឃាត់ខ្លួន រួមទាំង​វត្ថុតាង​យកមក​អធិការដ្ឋាន​នគរបាល​ស្រុក​ឧដុង្គ ដើម្បី​កសាង​សំណុំរឿង​ចាត់ការ​តាម​នីតិវិធី​៕

ទីតាំងផ្សាយពាណិជ្ជកម្ម