​ព្រឹក​ថ្ងៃនេះ​កិច្ចព្រមព្រៀង​ពាណិជ្ជ កម្ម​សេរី​កម្ពុជា ចិន នឹង​ត្រូវបាន​ចុះហត្ថលេខា​ជា​ផ្លូវការ

301
ចែករម្លែក

ដោយ​៖​តារា​រិ​ទ្ធ​/​ភ្នំពេញ​៖​នៅវេលា​ម៉ោង​១១​ព្រឹក​ថ្ងៃទី​១២ ខែតុលា​ឆ្នាំ​២០២០ ​ប្រមុខ​រាជរដ្ឋាភិបាល​កម្ពុជា សម្តេច​អគ្គមហាសេនាបតី​តេ​ជោ ហ៊ុន សែន នឹង​អនុញ្ញាត​ឲ្យលោក វ៉ាង យី រដ្ឋមន្ត្រីការបរទេស​ចិន​ចូលជួប​សម្ដែង​ការគួរសម​និង​ពិភាក្សា​ការងារ​នៅ​ទីស្តីការ​នាយករដ្ឋមន្ត្រី​។​បន្ទាប់ពី​ជំនួប​នោះ ​សម្តេច​តេ​ជោ ហ៊ុន សែន នឹង​អញ្ជើញជា​អធិបតីភាព​ក្នុងពិធី​ចុះហត្ថលេខា​លើ​កិច្ចព្រមព្រៀង​ចំនួន​៣ ដែល​ក្នុងនោះ​ ​រួម​មាន​កិច្ចព្រមព្រៀង​ពាណិជ្ជកម្ម​សេរី​កម្ពុជា​-​ចិន​ផងដែរ ។​

​លោក វ៉ាង យី ទីប្រឹក្សា​រដ្ឋ​និង​ជា​រដ្ឋមន្ត្រី​ក្រសួងការបរទេស​ចិន​បាន​អញ្ជើញ​មកដល់​​ ប្រទេស​កម្ពុជា​នៅវេលា​ម៉ោង​៥ ល្ងាច​ថ្ងៃទី​១១​ខែតុលា​ឆ្នាំ​២០២០​ ។បន្ទាប់ពី​បានមកដល់​ភ្លាម​ លោក វ៉ាង យី បាន​ជួបពិភាក្សា​ការងារ​ជាមួយ​លោក​ឧបនាយករដ្ឋមន្ត្រី ហោ ណាំ ហុង សហប្រធាន​គណ​:​ក​ម្មា​ធិ​ការសម្របសម្រួល​អន្តរ​រដ្ឋាភិបាល​កម្ពុជា-​ចិន ​ស្តីពី​ភាពជា​ដៃគូ​យុទ្ធសាស្ត្រ​គ្រប់​ជ្រុងជ្រោយ​និង​សហគមន៍​វាសនា​រួម​កម្ពុជា​-​ចិន​ នៅ​សណ្ឋាគារ​សូ​ហ្វី​តែ​ល​ ល្ងាច​ថ្ងៃទី​១១ ខែតុលា ឆ្នាំ​២០២០​នេះ​។​

​នៅ​ព្រឹក​នេះ ​លោក វ៉ាង យី នឹង​ជួបចរចា​ទ្វេ​ភាគី​ជាមួយ​លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រី​ក្រសួងការបរទេស​និង​សហប្រតិបត្តិការ​អន្តរជាតិ ​មុនពេល​ជួប​ជួបសម្ដែង​ការគួរសម​ជាមួយ​សម្តេច​អគ្គមហាសេនាបតី​តេ​ជោ ហ៊ុន សែន​។​ក្រោយ​ជំនួប​លោក វ៉ាង យី ក៏​នឹង​អញ្ជើញ​មានការ​ចុះហត្ថលេខា​លើ​កិច្ចព្រមព្រៀង​ពាណិជ្ជកម្ម សេរី​កម្ពុជា​-​ចិន និង​ឯកសារ​សំខាន់​០២​ទៀត​រួមមាន​៖​ លិខិត​ប្ដូរ​សារ​ស្ដីពី​ការសិក្សា​លទ្ធភាព​គម្រោង​ធ្វើឱ្យ​ប្រសើរឡើង​មន្ទីរពេទ្យបង្អែក​ខេត្ត​ព្រះសីហនុ​និង​លិខិត​ប្ដូរ​សារស្ដីពី​ការសិក្សា​លទ្ធភាព​គម្រោង​អភិវឌ្ឍន៍​ហេដ្ឋារចនាសម្ព័ន្ធ​ប្រព័ន្ធ​លូ​និង​ប្រព្រឹត្ត​កម្ម​ទឹក​កខ្វក់​នៅ​ខេត្ត​ព្រះសីហនុ​។​

​លោក វ៉ាង យី បាន​ដឹកនាំ​គណៈប្រតិភូ​ជាន់ខ្ពស់​មក​បំពេញ​ទស្សនកិច្ច​នៅកម្ពុជា​រយៈពេល​២ ថ្ងៃ​ពីថ្ងៃ​ទី១១ដល់ថ្ងៃទី១២​ខែតុលា២០២០។លោក វ៉ាង យី គឺជា​រដ្ឋមន្ត្រីការបរទេស​នៃ​ប្រទេស​ជា​មិត្ត​ទី​២​ហើយ​ដែល​បានមក​បំពេញ​ទស្សនកិច្ច​ផ្លូវការ​នៅ​ប្រទេស​កម្ពុជា​ក្នុងអំឡុងពេល​វិបត្តិ​កូ​វីដ​កូ​វីដ​១៩ក្នុង​ឆ្នាំ២០២០​នេះ ​បន្ទាប់ពីលោកម៉ូ​តេ​ហ្គី តូ​ស៊ី​មី​ត្សឹ រដ្ឋមន្រ្តីការបរទេស​ជប៉ុន កាលពី​ខែសីហា​កន្លងទៅនេះ​។​

​ក្រសួងការបរទេស​ក​ម្ពុ​ជា​បានបង្ហាញ​ការកត់សម្គាល់ថា ​ដំណើរ​ទស្សនកិច្ច​ផ្លូវការ​របស់ លោក វ៉ាង យី មកកាន់​កម្ពុជា​លើក​នេះ​នឹង​បន្ត​ពង្រឹង​បន្ថែម​នូវ​ចំណងមិត្តភាព​ជា ប្រពៃណី​ដ៏​យូរលង់​ សាមគ្គីភាព ភាតរភាព​និង​កិច្ចសហប្រតិបត្តិការ​ប្រកប​ដោយ​ផ្លែផ្កា​រវាង​កម្ពុជា​និង​ចិន​ក្នុង​បរិបទ​នៃ​បញ្ហា​ប្រឈម​ជាស​កល​នៃ​ជំងឺ​កូ​វីដ​១៩ ដែល​ពុំធ្លាប់ មាន​ពីមុន​៕​BR/Ha

ទីតាំងផ្សាយពាណិជ្ជកម្ម