​អាជ្ញាធរ​រាជធានី​ប្រជុំពិភាក្សា​រក​ដំណោះស្រាយ​ដើម្បី​គ្រប់គ្រង​ការប្រមូល​សំរាម​ឱ្យបាន​ល្អ​

ដោយ​៖​រ៉ា​ម៉ន​/​ភ្នំពេញ​៖​ខណៈដែល​កម្មករ​កម្ម​ការិនី​ក្រុមហ៊ុន​ស៊ីន​ទ្រី​នៅតែ​បន្ត​ការធ្វើ​កូដកម្ម​មិន​ព្រម​ដឹកជញ្ជូន​សំរាម​ទៅ​ចា​ក់នៅ​ទីលាន​នោះ អាជ្ញាធរ​រាជធានី​ភ្នំពេញ​បាន​ប្រឹងប្រែង​យ៉ាងខ្លាំង​ណាស់ ដើម្បី​ធ្វើយ៉ាងណា​ប្រមូល​សំរាម​ឱ្យបាន​អស់ពី​រាជធានី​ភ្នំពេញ​។

​ប៉ុន្តែ​យើង​ប្រមូល​សំរាម​មិនបាន​អស់​ដូច​អ្វីដែល​យើង​ចង់បាន​នោះទេ​។​ដូច្នេះ​ដើម្បីឱ្យ​ដំណើរការ​ក្នុង​ប្រតិបត្តិការ​នៃ​ការប្រមូល​សំរាម​នេះ​ទទួលបាន​លទ្ធផល​ល្អប្រសើរ​ថែមទៀត នៅ​រសៀល​ថ្ងៃទី ១២​ខែតុលា​នេះ​លោក​ឃួ​ង​ស្រេង​អភិបាល​រាជធានី​ភ្នំពេញ​បាន​កោះអញ្ជើញ​អាជ្ញាធរ​ខណ្ឌ​ទាំង​១៤​និង​មន្ទីរ​ពាក់ព័ន្ធ​មួយចំនួនទៀត​មក​ប្រជុំពិភាក្សា​រក​ដំណោះស្រាយ ថា​តើ​ធ្វើយ៉ាងណា​ដើម្បី​គ្រប់គ្រង ការប្រមូល​សំរាម​ឱ្យ​បានល្អ​ប្រសើរឡើង​មួយកំរិត​ទៀត​។​

​លោក​ឃួ​ង ស្រេង បាន​មានប្រសាសន៍ថា ៖​កម្មករ​ក្រុមហ៊ុន​ស៊ីន​ទ្រី ពិសេស​អ្នកបើកបរ​រថយន្ត មាន​ចេតនា​មិន​ព្រម​ចូលធ្វើការ​វិញ​នោះទេ​បើទោះបី​ក្រុមប្រឹក្សា​អាជ្ញាកណ្ដាល​ចេញ​លិខិត​អោយ​ពួកគាត់​ចូល​បម្រើ​ការងារ​វិញ​នៅ​ថ្ងៃទី​១០​ខែតុលា​កន្លង​ក៏ដោយ ក៏​ពួកគាត់​មិន​ព្រម​ចូលធ្វើការ​វិញ​ដែរ​។ បញ្ហា​នេះ​រដ្ឋបាល​រាជធានី​ភ្នំពេញ​អាជ្ញាធរ​ខណ្ឌ​ទាំង​១៤​និង​មន្ទីរ​សាធារណការ​និង​ដឹកជញ្ជូន​រាជធានី​ភ្នំពេញ​និង​មន្ទីរ​ពាក់ព័ន្ធ​មួយចំនួនទៀត បាន​សហការ រួមគ្នា លើ​ការប្រមូល​សំរាម​នេះ ឲ្យ​បានល្អ បើទោះបី​យើង​ប្រមូល​ទាន់​មិន​អស់​ក៏ដោយ ។

​លោក​បញ្ជាក់ថា ៖​ថ្ងៃ​ដំបូង យើង​ប្រមូល​សំរាម​បានត្រឹមតែ​៣០០​តោន​ប៉ុណ្ណោះ​ក្នុង​មួយថ្ងៃ ប៉ុន្តែ​មកដល់ពេលនេះ យើង​ប្រមូល​សំរាម​បាន​រហូត​ទៅដល់​២៥០០​តោន​ក្នុង​មួយថ្ងៃ ខណៈ​ដែរ​សំរាម​មាននៅ​ក្នុង​រាជធានី​ភ្នំពេញ​ក្នុង​មួយថ្ងៃ​ប្រមាណ​ជាង​២៨០០​តោន​។​
ពាក់ព័ន្ធ​នឹង​ការប្រមូល​សំរាម​នេះដែរ លោក​ឃួ​ង ស្រេង បាន​ជំរុញ​ឲ្យ​អាជ្ញាធរ​ខណ្ឌ សង្កាត់​ជ្រើសរើស​កម្មករ​បន្ថែម ដោយ​ឧបត្ថម្ភ​ក្នុង​ម្នាក់​១០​ដុល្លារ​ក្នុង​មួយថ្ងៃ ដើម្បី​ជួយ​សម្រួល​លើ​ការងារ​ការប្រមូល​សំរាម​នេះ​កាន់តែ​ល្អប្រសើរ​ឡើង​។​

​លោក​ឃួ​ង ស្រេង​ក៏បាន​បញ្ជាក់​ផងដែរ​ថា ៖​ចំពោះ​កម្លាំងប្រដាប់អាវុធ មាន​ប៉ូលីស​អន្តរាគមន៍ កម្លាំង​កងរាជអាវុធហត្ថ និង កង​អង្គរក្ស​សរុប​ចំនួន​២០០០​នាក់​ដែល​ត្រូវ​បញ្ជូនមក ដើម្បី​ប្រមូល​សំរាម​នៅក្នុង​រាជធានី​ភ្នំពេញ យើង​មិនទាន់​ត្រូវការ​ទេ ចាំ​ពេលណា​ដែរ រដ្ឋបាល​រាជធានី​ភ្នំពេញ​ប្រមូល​សំរាម​បាន​អស់ហើយ យើង​យក​កម្លាំង​ទាំង​២០០០​នាក់​នេះ​មក​ធ្វើ​ពិធី លាង​សម្អាត​ថ្នល់​តែម្តង​៕S/​

ទីតាំងផ្សាយពាណិជ្ជកម្ម

- Advertisment -

Most Popular