​អ្នកនាំពាក្យ​ខេត្តៈ គិត​ត្រឹម​ថ្ងៃទី​១២ តុលា ក្រុង​ស្រុក​ចំនួន​៦ នៅក្នុង​ខេត្តពោធិ៍សាត់ កំពុង​រង​ផលប៉ះពាល់ ដោយ​ជំនន់​ទឹកភ្លៀង​

128
ចែករម្លែក

ដោយៈ រិ​ទ្ធិ​សែន / ពោធិ៍សាត់ៈ អ្នកនាំពាក្យ​រដ្ឋបាលខេត្តពោធិ៍សាត់ បានប្រកាស​ជូនដំណឹង​ថា គិត​ត្រឹម​ថ្ងៃទី​១២ តុលា ក្រុង​ស្រុក​ចំនួន​៦ នៅក្នុង​ខេត្តពោធិ៍សាត់ កំពុង​រង​ផលប៉ះពាល់ដោយ​ជំនន់​ទឹកភ្លៀង​។​

​បើ​យោងតាម​លិខិត​ជូនដំណឹង របស់​អ្នកនាំពាក្យ រដ្ឋបាលខេត្ត​ពោធិ៍សាត់ នៅ​ថ្ងៃទី​១២ តុលា នេះ​ថាៈ បន្ទាប់ពី​ទទួលរង នូវ​ឥ​ទិ្ធ​ពល​ព្យុះ និង​ភ្លៀង​ធ្លាក់យ៉ាងខ្លាំង រយៈពេល​ប៉ុន្មាន​ថ្ងៃ ជាប់ៗ​គ្នា នៅក្នុង​ភូមិសាស្ត្រ ខេត្តពោធិ៍សាត់ ដោយ​គិត​ត្រឹម​ថ្ងៃទី​១២ ខែតុលា ឆ្នាំ​២០២០ នេះ បានទទួល​រងគ្រោះ​ធម្មជាតិ ដោយសារ​ទឹកជំនន់ ដែល​ហូរ​ធ្លាក់ពី​ស្រុក​វាលវែង និង​ស្រុក​ភ្នំក្រវាញ ធ្វើឱ្យ​រង​នូវ​ផលប៉ះពាល់ ដល់​ប្រជាពលរដ្ឋ ចំនួន​១២.៨៤១​គ្រួសារ នៅក្នុង​៦​ក្រុង​និង​ស្រុក ក្នុងនោះ​មាន ស្រុក​វាលវែង ស្រុក​ភ្នំក្រវាញ ស្រុក​បាកាន ស្រុក​កណ្តៀង ស្រុក​តា​លោ​សែន​ជ័យ និង​ក្រុង​ពោធិ៍សាត់ ស្មើនឹង ៣៤ ឃុំ និង​សង្កាត់​, ព្រមទាំង​បាន​ប៉ះពាល់ ដល់​ដំណាំ​កសិកម្ម និង​ហេដ្ឋារចនាសម្ព័ន្ធ មួយចំនួន​ដូចជា​៖ ស្រូវ​ចំនួន ១៤.៣១៤ ហិកតា ដំណាំ​កសិឧស្សាហកម្ម ចំនួន​២.៥៧១​ហិកតា​, ខូចខាត​ដំណាំ​រួមផ្សំគ្រប់​ប្រភេទ សរុប​ចំនួន ៩៦៣​ហិកតា ទឹក​លិច​ផ្លូវ (​ផ្លូវ​កៅស៊ូ​, ក្រួស​ក្រហម និង​ផ្លូវ​ដីស​) សរុប​ចំនួន​១០០​ខ្សែ ស្មើនឹង​៨០.៦៧០​ម៉ែត្រ​, ដាច់​ផ្លូវ​ចំនួន ៤​កន្លែង មាន​ប្រវែង​១.៤០៥ ម៉ែត្រ​, ខូច​ស្ពាន​ចំនួន​៩​កន្លែង ខូច​លូ​ចំនួន​២២​កន្លែង​, បាក់​ទំនប់​ចំនួន ៣​កន្លែង ផ្ទះប្រជាពលរដ្ឋ ខូចខាត​ទាំងស្រុង ចំនួន​២៣​ខ្នង ជម្លៀស​ប្រជាពលរដ្ឋ ទៅកាន់​ទួល​សុវត្ថិភាព ចំនួន​១៩៧​គ្រួសារ លិច​សាលារៀន ចំនួន​២៦​កន្លែង លិច​វត្ដ​អារាម ចំនួន​៣៣​កន្លែង លិច​មណ្ឌល​សុខភាព ចំនួន​៣​កន្លែង និង​មាន​ករណី​លង់ទឹកស្លាប់​មនុស្ស ចំនួន​២​នាក់ ផងដែរ​។​

​បើ​យោងតាម​ការតាមដាន ស្ថានភាព​កម្ពស់​ទឹកស្ទឹង​ពោធិ៍សាត់ នៅក្នុង​ថ្ងៃនេះ ឃើញថា ទឹកស្ទឹង​ស្រុក​ភ្នំក្រវាញ មាន​កម្ពស់ ៦,១៩ ម៉ែត្រ (​ថយចុះ ០,៤៣ ម​.), ស្ទឹង​ស្រុក​វាលវែង មាន​កម្ពស់ ៣,៧៥ ម៉ែត្រ (​ថយចុះ ០,២៥​ម​.), ស្ទឹង​ពោធិ៍សាត់ មាន​កម្ពស់​ចំនួន ៥,៤៧ ម៉ែត្រ (​ថយចុះ ០,៤០​ម​.) និង​ទន្លេ​កំពង់​លួង មាន​កម្ពស់ ៤,១៦ ម៉ែត្រ (​កើនឡើង ០,១២ ម​.) ។​

​ដោយសារ​កម្ពស់​ទឹកស្ទឹង នៅតែ​បន្តឡើង ខេត្ត ក្រុង ស្រុក បានធ្វើការ​អំពាវនាវ ដល់​បងប្អូន​ប្រជាពលរដ្ឋ ទាំងអស់ ដែល​រស់​នៅតាម​ដងស្ទឹង និង​តំបន់​ផ្សេងៗ​ទៀត ដែល​រង​ការលិចលង់ សូម​មានការ​ប្រុងប្រយ័ត្ន​ខ្ពស់ ចំពោះ​ហានិភ័យ​ផ្សេងៗ ដែល​កើតឡើង ក្នុងនោះត្រូវ​យកចិត្តទុកដាក់ លើ​កុមារ​តូច កុំ​ទុក​គាត់​ចោល ហើយ​ពិសេស​នោះ គឺ​សត្វ​អាសិរ្ពិស និង​ជំងឺ​ផ្សេងៗ ដែល​ត្រូវ​រួមគ្នា ធ្វើការ​ទប់ស្កាត់ ដែល​នឹង​កើតឡើង នៅពេល​ទឹក​ស្រក ទៅវិញ នៅពេល​ខាងមុខ​៕​/V/Ha

អ្នកនាំពាក្យ​ខេត្តៈ គិត​ត្រឹម​ថ្ងៃទី​១២ តុលា ក្រុង​ស្រុក​ចំនួន​៦ នៅក្នុង​ខេត្តពោធិ៍សាត់ កំពុង​រង​ផលប៉ះពាល់ ដោយ​ជំនន់​ទឹកភ្លៀង​
អ្នកនាំពាក្យ​ខេត្តៈ គិត​ត្រឹម​ថ្ងៃទី​១២ តុលា ក្រុង​ស្រុក​ចំនួន​៦ នៅក្នុង​ខេត្តពោធិ៍សាត់ កំពុង​រង​ផលប៉ះពាល់ ដោយ​ជំនន់​ទឹកភ្លៀង​
អ្នកនាំពាក្យ​ខេត្តៈ គិត​ត្រឹម​ថ្ងៃទី​១២ តុលា ក្រុង​ស្រុក​ចំនួន​៦ នៅក្នុង​ខេត្តពោធិ៍សាត់ កំពុង​រង​ផលប៉ះពាល់ ដោយ​ជំនន់​ទឹកភ្លៀង​
កងកម្លាំងប្រដាប់អាវុធ ចុះជួយអន្តរាគមន៍ ក្នុងការទប់ទឹកជំនន់់
រដ្ឋបាលខេត្តពោធិសាត់ ចុះចែកអំណោយជូនប្រជាពលរដ្ឋរងគ្រោះ
រដ្ឋបាលខេត្តពោធិសាត់ ចុះចែកអំណោយជូនប្រជាពលរដ្ឋរងគ្រោះ

ទីតាំងផ្សាយពាណិជ្ជកម្ម