​សមត្ថកិច្ច​ចាប់​រថយន្ត​ធំ​១​គ្រឿង​បង្កប់​ឈើ​ពីក្រោម​ដាក់​បាវ​ធ្យូង​និង​បាវ​អង្កាម​ពីលើ​

215
ចែករម្លែក

ដោយ​សៅ​វ៉ាន់ឌី​/​ព្រះវិហារ​៖​កម្លាំង​ទីចាត់ការ​ដែនជម្រកសត្វព្រៃ​គូលែន​ព្រហ្ម​ទេព​នៃ​មន្ទីរ​បរិស្ថាន​ខេត្តព្រះវិហារ​បាន​ចាប់​រថយន្ត​ធុន​ធំ​មួយគ្រឿង​ដែល​ដាក់​បាវ​ធ្យូង​និង​បាវ​អង្កាម​ពីលើ​និង​បង្កប់​ឈើ​ល្មើសច្បាប់​ពីក្រោម​ប៉ុន្តែ​តៃកុង​រថយន្ត​នេះ​បាន​គេចខ្លួនបាត់​។​

​មន្ត្រី​ក្នុង​រង្វង់​ប្រតិបត្តិការ​បានឱ្យដឹងថាៈ​ការចុះ​ចាប់​រថយន្ត​ធំ​ដឹក​ជ​ញ្ជូ​ឈើ​គ្មាន​ច្បាប់​អនុញ្ញាត​១​គ្រឿង​នេះ បានធ្វើ​ឡើង​កាលពី​ថ្ងៃទី​១១​តុលា​ឆ្នាំ​២០២០​។​ពេល​រថយន្ត​នេះ​កំពុង​ធ្វើ​ចរាចរណ៍​លើ​ដងផ្លូវ នៅ​ចំណុច​ព្រៃ​ស្មាច់ ស្ថិតនៅ​ក្នុងភូមិ​គូលែន​ត្បូង ឃុំ​គូលែន​ត្បូង ស្រុក​គូលែន ខេត្តព្រះវិហារ​។​

​លោក សុង ច័ន្ទ​សុជាតិ​ប្រធានស្តីទី នៃ​មន្ទីរ​បរិស្ថាន​ខេត្តព្រះវិហារ បាន​ប្រាប់​ឱ្យដឹងថាៈ កម្លាំង​ទី​ចាត់ ការ​ដែនជម្រកសត្វព្រៃ​គូលែន​ព្រហ្ម​ទេព​នៃ​មន្ទីរ​បរិស្ថាន​ខេត្តព្រះវិហារ​ពិតជា​បាន​ចុះ​ចាប់​រថយន្ត​ខ្នាត​ធំ​១​គ្រឿង​។​រថយន្ត​នេះ​បាន​លួច​ដឹកជញ្ជូន​ឈើ​ល្មើសច្បាប់ ដោយ​រថយន្ត​នេះ​បានដាក់​បាវ​ធ្យូង និង​បាវ​អង្កាម​ពីលើ និង​បាន​បង្កប់​ឈើ​ពីក្រោម​។

​លោក​បាន​បន្តថា រថយន្ត​ដែល​ចាប់បាន​នេះ ជា​ប្រភេទ​វេ​អង ពណ៌​ខៀវ​លា​យស ពាក់​ស្លាក​លេខ តាកែវ 3A-0393 រថយន្ត​នេះ​បានធ្វើ​សកម្មភាព ចូលទៅ​លើក​ឈើ នៅ​ចំណុច​ព្រៃ​ស្មាច់ និង​នៅតាម​ផ្ទះ​ប្រជាពលរដ្ឋ នៅក្នុង​ភូមិ​គូលែន​ត្បូង​គ្រោង​ធ្វើ ចរាចរណ៍​ចាកចេញ​ពី​តំបន់​នោះ​។​ប៉ុន្តែ កម្លាំង​បរិស្ថាន​បានដឹង និង​ចុះ​ឃាត់​ភ្លាមៗ រីឯ​តៃកុង​រថយន្ត​នេះ បានគេច​ខ្លួន​បាត់ស្រមោល​។​

​លោក សុង ច័ន្ទ​សុជាតិ បាន​បញ្ជាក់ថា ក្រោយ​ការបង្ក្រាប រថយន្ត​ដឹកឈើ​ខ្នាត​នេះ ត្រូវបាន​នាំយកមក​រក្សាទុក នៅ​ទីចាត់ការ​ដែនជម្រកសត្វព្រៃ​គូលែន​ព្រហ្ម​ទេព « តា​កឹង » ។​រហូតមក ទល់នឹង​ពេលនេះ ឈើ​នៅក្នុង​រថយន្ត​នោះ មិនទាន់បាន​រើចេញ និង​ក៏​មិនទាន់​ដឹងថា ឈើ​ទាំងនោះ​មាន ប៉ុន្មាន​ប្រភេទ និង​ប៉ុន្មាន​ម៉ែត្រគូប​នោះទេ​។ ព្រោះ​កម្លាំង​បរិស្ថាន​ជាប់រវល់​ឡើង​ភ្នំ​ត្បែង ដោយ​មិនអាច​ដក ឃ្លា​មក​វាស់វែង​បាន​នៅឡើយ​ឡើយ​។ លោក​បាន​បញ្ជាក់ទៀតថា មន្ត្រី​ជំនាញ​នឹង​រើ​ឈើ​នោះ​ចេញពី​រថយន្ត ព្រមទាំង​រាប់ និង​វាស់ នៅពេល​ខាងមុខនេះ ដើម្បី​កសាង​សំណុំរឿង ចាត់ការ​តាមច្បាប់ ៕S/​

ទីតាំងផ្សាយពាណិជ្ជកម្ម