ដោយ: ប.ខុន / ភ្នំពេញ: ទ្វារទឹកអាងកំពីងពួយត្រូវបានក្រុមអ្នកប្រចាំការ២៤ម៉ោង មានគ្នា១១នាក់ធ្វើការបើកទាំងកណ្តាលយប់ បន្ទាប់ពីកម្ពស់ទឹកក្នុងអាងបានឡើងដល់កម្ពស់ ២៤,៦៨ម៉ែត្រ គឺលើសកម្រិតត្រូវរក្សា ទុក០,១៨ម៉ែត្ររួចមក។ អាងនេះ មានទឹក១៥០លានម៉ែត្រគុប បើគ្រប់គ្រងមិនបានល្អទេ អាចនឹងបាក់ ធ្វើឱ្យប៉ះពាល់ និងខូចខាតច្រើនជាងការបាក់ទំនប់បាសាក់នៅរុក្ខគិរីរាប់សិបដង។
លោក ឡុង ផល្គុណ ប្រធានមន្ទីរធនធានទឹកនិងឧតុនិយម បានប្រាប់ឱ្យរស្មីកម្ពុជាដឹងនៅថ្ងៃទី១៣ខែតុលាឆ្នាំ២០២០ ថា “បន្ទាប់ពីកម្ពស់នៅទឹកអាងកំពីងពួយ បានឡើងដល់កម្ពស់២៤,៦៨ម៉ែត្រ គឺលើសពីកម្រិតត្រូវរក្សាទុក០,១៦ម៉ែត្រ (ទឹកត្រូវរក្សាទុក២៤,៥០ម៉ែត្រ) ហើយនៅតែបន្តហក់ឡើងខ្លាំងថែមមកទៀត យើង(ផល្គុណ)បានសម្រេចឱ្យក្រុមអ្នកប្រចាំការ២៤ម៉ោង ដែលមានគ្នាចំនួន១១នាក់ ធ្វើការបើកទ្វារ ទឹកទាំង៤គោលដៅ នៅពេលរំលងអធ្រាត្រដើមថ្ងៃទី១៣ខែតុលា ដើម្បីបន្ថយការប្រឈមដល់ទំនប់របស់អាងនេះ”។
ប្រធានមន្ទីរដែលនៅជាប់ជាមួយនឹងការប្រចាំការនេះ បាននិយាយឱ្យដឹងទៀតថា “អាងកំពីងពួយត្រូវបានកំណត់រក្សាទឹកទុកនៅកម្ពស់២៤,៥០ម៉ែត្រ ដែលមានបរិមាណទឹកស្មើប្រមាណ១៥០លានម៉ែត្រគុប។ កាលពីយប់មិញទឹកបានហក់ឡើងដល់កម្រិត២៤,៦៨ម៉ែត្រ ហើយទឹកនៅបន្តហក់ឡើងលឿនទៀត ទើបបានសម្រេចឱ្យបង្ហើបទ្វារទឹកគ្រប់គោលដៅរហូតមកដល់ព្រឹកថ្ងៃទី១៣ ទឹកបានស្រកចុះ០,០៥ម៉ែត្រទៅវិញ តែទឹកហូរចូលអាងនៅតែមានសភាពខ្លាំង ត្រូវបន្តបើកទ្វារនៅថ្ងៃនេះទៀត”។
លោក ឡុង ផល្គុណ បាននិយាយឱ្យដឹងទៀតថា ប្រភពទឹកចូលមកអាងកំពីងពួយ មានមកពីតាមច្រកព្រៃធំ, អូរដូនតា និងប្រឡាយអូរដូនពៅ(តាហែន)។ ប្រឡាយអូរដូនពៅ បានបិទបីថ្ងៃមកហើយ មិនឱ្យមានទឹកហូរចូលមកកាន់អាងកំពីងពួយទៀតទេ តែអូរជ្រៃធំនិងអូរដូនតា ដែលជាផ្លូវទឹកធម្មជាតិនៅបន្តហូរមក។ ស្ថានភាពទឹកនៅផ្នែកខាងលើនៃស្ទឹងបរវេលបានស្រកហើយ តែមកឡើងខ្លាំងនៅកំពីងពួយ បើមិនធ្វើការបើកបិទតាមបច្ចេកទេស ទំនប់អាងកំពីងពួយ អាចនឹងបាក់ដូចទំនប់អាងបាសាក់។
លោក ឡុង ផល្គុណ បានបញ្ជាក់ថា ការបើកទ្វារទឹកអាងកំពីងពួយម្តង២៥សន្លឹកទ្វារព្រមគ្នា ក្នុងពេលតែមួយនៅផ្នែកខាងក្រោមកំពុងមានទឹកច្រើនស្រាប់ គឺបានធ្វើឱ្យមានការប៉ះពាល់ខ្លះហើយ តែបើមិនបានបើកទាន់ពេលទេ ទំនប់អាងកំពីងពួយអាចនឹងបាក់ ប្រសិនបើបាក់ការខូចខាតនៅផ្នែកខាងក្រោមអាងមានច្រើនជាងអាងបាសាក់រាប់សិបដង ព្រោះអាងកំពីងពួយមិនមែនមានទឹកជាង ១០លានម៉ែត្រគុបដូចអាងបាសាក់ទេ គឺ១៥០លានម៉ែត្រគុប មានផ្ទៃដីដំណាំស្រូវច្រើនម៉ឺនហិកតា និងមានភូមិជាច្រើន នៅពីក្រោមអាងនេះ៕ ល/Ha
