សហប្រជាជាតិ​៖ គ្រោះ​ធម្មជាត​កំពុង​ប្រែក្លាយ​ពិភពលោក​ទៅ​ជា​ឋាននរក​ដែល​មនុស្ស​ពិបាក​រស់នៅ​

363
ចែករម្លែក

​ចំនួន​គ្រោះធម្មជាតិ​នៅ​ជុំវិញ​ពិភពលោក​បាន​កើន​ទ្វេ​ដង​ចាប់តាំងពី​ការចូល​សតវត្សរ៍​ទី​២១​នេះ ដោយ​ការប្រែប្រួល​អាកាសធាតុ​ត្រូវបាន​បន្ទោស​ខ្លាំងជាងគេ នេះ​បើ​តាម​របាយការណ៍​របស់​អង្គការ​​សហប្រជាជាតិ​។​

​ថ្លែង​កាលពី​ថ្ងៃ​ចន្ទ​ទី​១២​តុលា ការិយាល័យ​អង្គការសហប្រជាជាតិ​សំរាប់​ការកាត់បន្ថយ​ការ​ប្រឈម​គ្រោះថ្នាក់ បាន​និយាយថា​មនុស្ស​១,២៣​លាន​នាក់​ត្រូវបាន​សម្លាប់ នៅក្នុង​គ្រោះធម្មជាតិ​ចាប់​តាំង​​ពី​ឆ្នាំ​២០០០​មក​។​

​នៅ​ជុំវិញ​ពិភពលោក គ្រោះមហន្តរាយ​ចំនួន​៧.៣៤៨​លើក រួម​មាន​រញ្ជួយ​ដី រលក​ស៊ូ​ណា​មី និង​ភាពរាំងស្ងួត បាន​បង្ក​ការបំផ្លិចបំផ្លាញ​ខូចខាត​គិត​ជា​ទឹកប្រាក់​ប្រមាណ​៣​លាន​លាន​ដុល្លារ គឺ​កើនឡើង​ជិត​២​ដង​សំរាប់​រយៈពេល​២០​ឆ្នាំ​មកនេះ​។​

​ចំនួន​គ្រោះធម្មជាតិ​នៅ​ជុំវិញ​ពិភពលោក​បាន​កើតឡើង​ទ្វេ​ចាប់តាំងពី​ដើម​សតវត្សរ៍​នេះ ។​រូប​នេះ​ជា​ផល​បង្កឡើង​ដោយ​រលក​ស៊ូ​ណា​មី​នៅ​ឥណ្ឌូនេស៊ី​កាលពី​ឆ្នាំ​២០០៤

​អ្នកជំនាញ​ម្នាក់​បាន​និយាយថា ការប្រែប្រួល​អាកាសធាតុ កំពុង​ប្រែក្លាយ​ពិភពលោក​ទៅ​ជា «​ឋាននរក​ដែល​មនុស្ស​ពិបាក​រស់នៅ​»​។​

​ម៉ា​មី មី​ហ៊ុយ​តូ​រី តំណាង​ពិសេស​របស់​អគ្គលេខា​អង្គការសហប្រជាជាតិ​ទទួលបន្ទុក​ការកាត់បន្ថយ​ការ​ប្រឈម​គ្រោះមហន្តរាយ បាន​និយាយថា «​យើង​បំផ្លាញ​ខ្លួនឯង​។​នេះ​ជា​ការសន្និដ្ឋាន​តែ​មួយ​ដែល​យើង​​អាចធ្វើ​»​។​

​ចិន​មាន​ហេតុការណ៍​គ្រោះមហន្តរាយ​ចំនួន​៥៧៧ អាម៉េរិក​៤៦៧ និង​ឥណ្ឌា​ចំនួន​៣២១​ចាប់ពី​ឆ្នាំ​២០០០​ដល់​២០១៩​។​គ្រោះ​ធម្មជាត​ធំ​បំផុត​ចំនួន​៨​ក្នុងចំណោម​គ្រោះធម្មជាតិ​ធំ​បំផុត​១០​លើ​លោក ស្ថិត​​នៅ​អាស៊ី​។​

​ការិយាល័យ​បាន​និយាយទៀតថា ទឹកជំនន់​ធំៗ បាន​កើន​ឡើង​ជាង​ទ្វេដង រីឯ​ភាពរាំងស្ងួត ភ្លើង​ឆេះ​ព្រៃ និង​សីតុណ្ហភាព​ឡើង​កំដៅ​ខ្លាំង​ក៏​កើន​ឡើង​ផងដែរ​។​

​ក្នុងចំណោម​គ្រោះធម្មជាតិ​ធំ​បំផុត​នៅ​២០​ឆ្នាំ​មកនេះ គឺ​រលក​ស៊ូ​ណា​មី​ឆ្នាំ​២០០៤​ដែល​បំផ្លាញ​ឥណ្ឌូនេស៊ី​និង​បណ្តា​ប្រទេស​ជុំវិញ​ធ្ងន់ធ្ងរ រញ្ជួយ​ដី​ឆ្នាំ​២០០៥​នៅ​កា​ស្មៀ និង​រញ្ជួយ​ដី​នៅ​ហៃ​ទី​នា​ឆ្នាំ​២០១០​។​

​នៅក្នុង​បុព្វកថា​រួមគ្នា​មួយ​ក្នុង​របាយការណ៍​សហប្រជាជាតិ​លោក​ម៉ា​មី មី​ហ៊ុយ​តូ​រី បាន​កត់សំគាល់ថា បណ្តា​ទីភ្នាក់ងារ​គ្រប់គ្រង​គ្រោះមហន្តរាយ អាចជួយ​អាយុជីវិត​មនុស្ស​បាន​ច្រើន​តាមរយៈ​ការត្រៀម​​បំរុង​បាន​ល្អប្រសើរ​៕​ប្រែ​សម្រួល​៖​វាសនា​

ទីតាំងផ្សាយពាណិជ្ជកម្ម