Home ព័ត៌មានជាតិ សង្គម បញ្ចប់​ការជួស...

បញ្ចប់​ការជួសជុល​ផ្លូវ អាកាសយានដ្ឋាន អន្តរជាតិ​កងកេង ដោយ​ពិធីសូត្រមន្ត​ប្រោះព្រំ​

ដោយៈ​វណ្ណៈ​ / ព្រះសីហនុៈ ការងារ​ពង្រីក និង​ជួសជុល​ផ្លូវ​រត់ នៅ​អាកាសយានដ្ឋាន អន្តរជាតិ​ខេត្ត​ព្រះសីហនុ (​កងកេង​) បានបញ្ចប់​ជា​ស្ថាពរ​ហើយ នៅ​ព្រឹក​ថ្ងៃទី​១៣ ខែតុលា ឆ្នាំ​២០២០ នេះ ហើយ​ក្នុងឱកាស​នេះ លេខាធិការដ្ឋាន អាកាសចរណ៍​ស៊ីវិល​កម្ពុជា ក៏បាន​រៀបចំ​ពិធី តាម​ទំនៀមទម្លាប់ ព្រះពុទ្ធសាសនា ដោយ​និមន្ត​ព្រះសង្ឃ សូត្រមន្ត​ប្រោះព្រំ ដើម្បី​រៀបចំ​ដាក់​ឲ្យ​ដំណើរការ ជា​ផ្លូវការ នូវ​ផ្លូវ​រត់ នៃ​អាកាសយានដ្ឋាន​នេះ ដែល​អាច​ឲ្យ​យន្តហោះ ប្រភេទ​ធំៗ ចុះចត​បាន​។​

​ពិធី​នេះ បាន​ប្រព្រឹត្តទៅ ក្រោម​វត្តមាន​លោក ម៉ៅ ហាវ​ណ្ណា​ល់ រដ្ឋមន្ត្រី​ទទួលបន្ទុក រដ្ឋលេខាធិការ អាកាសចរណ៍​ស៊ីវិល​កម្ពុជា​, លោក គួច ចំរើន អភិបាលខេត្ត ព្រះសីហនុ ព្រមទាំង​មានការ​ចូលរួម​ពី​មន្ត្រី​អាជ្ញា​ធរមាន​សមត្ថកិច្ច ពាក់ព័ន្ធ​ជុំវិញ​ខេត្ត ជាច្រើន​ទៀត ។​

​លោក ម៉ៅ ហាវ​ណ្ណា​ល់ បាន​មាន​ប្រសា​ន៍​ថាៈ សមិទ្ធផល​នេះ បាន​ឆ្លើយតប​ទៅនឹង​កំណើន​សេដ្ឋកិច្ចជាតិ និង​កំណើន នៃ​អ្នកធ្វើដំណើរ តាម​ជើងហោះហើរ ពី​បណ្តា​ប្រទេស​នានា មក​ខេត្ត​ព្រះសីហនុ ប្រទេស​កម្ពុជា ជា​បន្តបន្ទាប់ ។​

​ចំណែក​លោក គួច ចំរើន បាន​មានប្រសាសន៍ថាៈ ការរីកចំរើន ខាង​វិស័យ​អាកាសចរណ៍​នេះ នឹង​បំពេញបន្ថែម បម្រើ​ដល់​ការអភិវឌ្ឍ ក្នុង​ខេត្ត​ព្រះសីហនុ ស្រប​ពេលដែល រាជរដ្ឋាភិបាល​កម្ពុជា ដឹកនាំ​ដោយ​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ផ្តល់​ថវិកា​កសាង​ផ្លូវថ្នល់ និង​ហេដ្ឋារចនាសម្ព័ន្ធ ជាច្រើន​ទៀត ក្នុង​ខេត្ត​ព្រះសីហនុ​។​

​មន្ត្រី​នៅ​អាកាសយានដ្ឋាន​អន្តរជាតិ ខេត្ត​ព្រះសីហនុ ឲ្យ​បណ្តាញ​ផ្សព្វផ្សាយ​ដឹង​ដែរ​ថាៈ ក្រុមហ៊ុន​ខេ​ម​បូ​ឌា អ៊ែរ​ផត ដែល​គ្រប់គ្រង​វិនិយោគ អាកាសយានដ្ឋាន​អន្តរជាតិ នៅ​កម្ពុជា បាន​ចំណាយ​ថវិកា ប្រមាណ ២១ លាន​ដុល្លា​អាមេរិក លើ​ការពង្រីក​ផ្លូវ​រត់ នៅ​អាកាសយានដ្ឋាន​អន្តរជាតិ ខេត្ត​ព្រះសីហនុ ដែល​គម្រោង​ពង្រីក​ផ្លូវ​រត់ នៅ​អាកាសយានដ្ឋាន​អន្តរជាតិ​នេះ បានចាប់ផ្តើម​បើក​ការដ្ឋាន​សាងសង់ កាលពីដើមឆ្នាំ​២០១៩ ៕​/b /V

ទីតាំងផ្សាយពាណិជ្ជកម្ម

- Advertisment -

Most Popular