Home ព័ត៌មានជាតិ សន្តិសុខ ​ពុល​ដំឡូង​មី...

​ពុល​ដំឡូង​មី មួយ​គ្រួសារ បណ្ដាលឱ្យ​ស្លាប់​កុមារា​មួយ​នាក់​

ដោយៈ​ភ្នំ​ខៀវ / បាត់ដំបងៈ កុមារា ១​នាក់ បាន​ស្លាប់ និង​សមាជិកគ្រួសារ ចំនួន ៥ នាក់​ផ្សេងទៀត មាន​អាកា​រៈ​ធ្ងន់ និង​ស្រាល ក្រោយពេល​ពួកគេ បាន​បរិភោគ​ដំឡូង​មី ក្នុងស្រុក​សំពៅ​លូន ខេត្តបាត់ដំបង ។​

​ប្រជាពលរដ្ឋ នៅ​កន្លែងកើតហេតុ បាន​ប្រាប់​ឲ្យ​ដឹងថា​÷ ករណី​ពុល​ដំឡូង​មី ចំនួន ១​គ្រួសារ​នេះ បានកើត​ឡើង នៅវេលា​ម៉ោង ៣ រំលងអធ្រាត្រ ឈានចូល​ថ្ងៃទី​១៣ ខែតុលា ឆ្នាំ​២០២០ នៅក្នុង​ភូមិ​អូរ​កាច់ ឃុំ​ជ្រៃ​សីមា ស្រុក​សំពៅ​លូន ខេត្តបាត់ដំបង​។​

​ប្រភព​ដដែល បាន​បន្តថា​÷ គ្រួសារ​រងគ្រោះ ខាងលើ មាន​ជីវភាព​ខ្វះខាត​ខ្លាំង ហើយ​បាន​ជំរុញ​ឲ្យ​បង្គោលគ្រួសារ ជា​ប្តី ត្រូវ​ចាកចេញ ទៅធ្វើ​ការងារ នៅ​តំបន់​ឆ្ងាយ ដោយ​នៅត្រឹមតែ​ប្រពន្ធ​ប៉ុណ្ណោះ ស្នាក់នៅ​នឹង​ផ្ទះ​ដ៏​កំសត់ ដើម្បី​មើលថែ​កូនតូចៗ ទាំង ៥ នាក់​។ នៅ​មុនពេល​កើតហេតុ នៅ​ល្ងាច​ថ្ងៃទី​១២ តុលា អ្នកស្រី​ឈ្មោះ រិ​ក ណៃ ត្រូវជា​ម្តាយ​របស់​ជនរងគ្រោះ បាន​ស្ងោរដំឡូង​មី បរិភោគ​ជាមួយ​កូនតូចៗ​ទាំងអស់ ភ្លាមៗ អ្នកស្រី ហាក់​មាន​អារម្មណ៍​ប្លែក ក្នុង​នៅ​ខ្លួន​បន្តិច​ដែរ ប៉ុន្តែ​មិន​ចាប់អារម្មណ៍ ព្រោះ​មិនមាន​អ្វី​ប្រែប្រួល​ខ្លាំង រួច​ហើយក៏​នាំ​កូនៗ​ទាំងអស់ ចូល​សម្រាក​ទៅ រហូតដល់​វេលា​ម៉ោង ៣ ទៀបភ្លឺ ឈានចូល​ថ្ងៃទី​១៣ ខែតុលា គាត់​មាន​អារម្មណ៍ ស្រៀវ​ទឹកមាត់ និង​រោយ​ថ្គាម​តិចតួច ។ ចំណែក​កូន​របស់​អ្នកស្រី ចំនួន ៥ នាក់​ទៀត ក៏បាន​ចាប់ផ្តើម មាន​អាកា​រៈ​ក្អួតចង្អោរ​ខ្លាំង​ទៅៗ រហូតដល់​បញ្ជូនទៅ​សង្គ្រោះបន្ទាន់​ភ្លាមៗ នៅ​មន្ទីរពេទ្យ ទាំងយប់​តែម្តង​។ ក្នុងចំណោម​កូន របស់លោក​ស្រី ដែល​ពុល​ទាំង ៥ នាក់ មាន​១​នាក់ បាន​ស្លាប់ ដោយសារ​កម្លាំង​ជនរងគ្រោះ ខ្សោយ និង​ទំនង​ហូប​ដំឡូង​ស្ងោរ​ច្រើន ពុល​ខ្លាំងជាងគេ​។​

​ក្មេងរងគ្រោះ​ដែល​ពុល​នៅក្នុង​ហេតុការណ៍​នេះ មានៈ​១. ឈ្មោះ សោម ភេទ​ប្រុស អាយុ​២៣​ឆ្នាំ ពុល​ស្រាល​, ២.​ឈ្មោះ ចាន់នី ភេទ​ប្រុស អាយុ​១៤​ឆ្នាំ ពុល​ស្រាល​, ៣.​ឈ្មោះ ទីណា ភេទ​ស្រី អាយុ​១១​ឆ្នាំ ពុល​ស្រាល​. ៤.​ឈ្មោះ ឆាំ ភី​ម ភេទ​ស្រី អាយុ​៧​ឆ្នាំ ពុល​ធ្ងន់ធ្ងរ​. និង​៥.​ឈ្មោះ ឆាំ ណាន ភេទ​ប្រុស អាយុ​៤​ឆ្នាំ ពុល​ដល់​ស្លាប់ ។​

​អ្នកស្រី រិ​ក ណៃ ត្រូវជា​ម្តាយ​ជនរងគ្រោះ បាន​អំពាវនាវ​ដល់​អាជ្ញាធរ និង​សប្បុរសជន​នានា ជួយ​ដល់​គ្រួសារ​របស់គាត់​ផង ព្រោះ​បច្ចុប្បន្ន ស្ថានភាព​ក្នុង​គ្រួសារ កំពុងតែ​ជួប​នូវ​សភាព​ទីទ័លក្រ​ខ្លាំង​៕/b /V

ទីតាំងផ្សាយពាណិជ្ជកម្ម

- Advertisment -

Most Popular