Home ព័ត៌មានជាតិ សន្តិសុខ អគ្គស្នងការដ្...

អគ្គស្នងការដ្ឋាន នគរបាលជាតិ បញ្ជូន​កម្លាំង​អន្តរាគមន៍ ទៅ​ជួយ​ជម្លៀស ទណ្ឌិត​-​ពិរុទ្ធជន នៅក្នុង​ពន្ធនាគារ ខេត្តបន្ទាយមានជ័យ​

ដោយៈ មុនី​រ័ត្ន / ភ្នំពេញៈ នៅ​ថ្ងៃទី​១៤ ខែតុលា ស្អែក​នេះ អគ្គស្នងការដ្ឋាន នគរបាលជាតិ នឹង​បញ្ជូន​កម្លាំង​អន្តរាគមន៍ របស់​អគ្គស្នងការដ្ឋាន នគរបាលជាតិ ទៅ​ខេត្តបន្ទាយមានជ័យ ដើម្បី​ជួយ​ការពារ និង​ដឹកជញ្ជូន​ជម្លៀស​ទណ្ឌិត និង​ពិរុទ្ធជន ដែល​កំពុង​ជាប់ឃុំ នៅក្នុង​ពន្ធនាគារ ខេត្តបន្ទាយមានជ័យ ទៅ​ដា​ក់នៅ​ពន្ធនាគារ ខេត្ត​ឧ​ត្ត​រ​មានជ័យ ខេត្តកំពង់ធំ និង​ខេត្ត​ត្បូងឃ្មុំ​។ នេះ​បើតាម​ការបញ្ជាក់ របស់លោក​ឧ​ត្ត​ម​សេនីយ៍​ឯក ឆាយ​គឹម​ខឿន អគ្គ​ស្នងការរង និង​ជា​អ្នកនាំពាក្យ អគ្គស្នងការដ្ឋាន នគរបាលជាតិ ថ្លែងប្រាប់​រស្មី​កម្ពុជា នៅ​យប់​ថ្ងៃទី​១៣ ខែតុលា ឆ្នាំ​២០២០​។​

​អ្នកទោស នៅក្នុង​ពន្ធនាគារ ខេត្តបន្ទាយមានជ័យ មាន​ចំនួន​ជាង ១.៦០០ នាក់ ត្រូវបាន​ជម្លៀស ទៅកាន់​ពន្ធនាគារ​ខេត្ត​ផ្សេងៗ ។ ការជម្លៀស​នេះ គឺ​ដោយសារ​ទទួលរង ការគំរាមកំហែង យ៉ាងធ្ងន់ធ្ងរ ពី​ជំនន់​ទឹកភ្លៀង ដែល​បាន​វាយបំបាក់​ជញ្ជាំង ពន្ធនាគារ ប្រមាណ ១០០ ម៉ែត្រ ធ្វើឱ្យ​ទឹក​ហូរ បុក​ចូល​ពន្ធនាគារ យ៉ាងខ្លាំង​។​

លោក​ឧ​ត្ត​ម​សេនីយ៍​ឯក ឆាយ គឹម​ខឿន

​លោក​ឧ​ត្ត​ម​សេនីយ៍​ឯក ឆាយ គឹម​ខឿន បាន​មានប្រសាសន៍ថាៈ ” ទណ្ឌិត និង​ពិរុទ្ធជន ដែល​នៅក្នុង​ពន្ធនាគារ ខេត្តបន្ទាយមានជ័យ មាន​ចំនួន ១.៦១១ នាក់ ហើយ​នៅ​ថ្ងៃទី​១៣ តុលា នេះ យើង​ជម្លៀស​បានជា​ស្ថាពរ ចំនួន ៨១១ នាក់ ទៅ​ពន្ធនាគារ​ខេត្តសៀមរាប​។ ហើយ​នៅ​ថ្ងៃទី​១៤ តុលា យើង​នឹង​ជម្លៀស​បន្តទៀត ទៅ​ពន្ធនាគារ ខេត្ត​ឧ​ត្ត​រ​មានជ័យ ចំនួន ២០០ នាក់ ទៅ​កំពង់ធំ ចំនួន ២០០ នាក់ និង​ទៅ​ត្បូងឃ្មុំ ចំនួន ៤០០ នាក់​។ ដោយ​ការជម្លៀស​នេះ គឺ​ប្រើ​កម្លាំង​ខេត្តបន្ទាយមានជ័យ សហការ​ជាមួយ​ខេត្ត​ពាក់ព័ន្ធ​។ នៅ​ថ្ងៃស្អែក (១៤ តុលា​) យើង​នឹង​ប្រើប្រាស់​កម្លាំង អន្តរាគមន៍​របស់​អគ្គ​ស្នងការដ្ឋាន នគរបាលជាតិ ទៅ​ជួយ​គាំទ្រ​តែម្តង ” ។​

​លោក អ៊ុំ រាត្រី អភិបាល នៃ​គណៈ​អភិបាល ខេត្តបន្ទាយមានជ័យ បាន​មានប្រសាសន៍ ប្រាប់​រស្មី​កម្ពុជា នា​ល្ងាច ថ្ងៃទី​១៣ តុលា ដែរ​ថាៈ ពាក់ព័ន្ធ​ស្ថានភាព នៅក្នុង​ពន្ធនាគារ ខេត្តបន្ទាយមានជ័យ ដែល​ជន់​លិច ដោយ​ជំនន់​ទឹកភ្លៀង គឺ​បាន​ជម្លៀស ទៅកាន់​ពន្ធនាគារ ខេត្តសៀមរាប ចំនួន​ជាង ៨០០ នាក់ នឹង​បញ្ជូនទៅ​ពន្ធនាគារ ខេត្តកំពង់ធំ ចំនួន ២០០ នាក់ ហើយ​នៅសល់​ប៉ុន្មាន​ទៀត គឺ​នឹង​បញ្ជូនទៅ ពន្ធនាគារ​ខេត្ត​ផ្សេងទៀត គឺ​ទៅតាម​គោលដៅ ដែល​ថ្នាក់ដឹកនាំ បានកំណត់ នៅ​ថ្ងៃទី​១៤ ខែតុលា ឆ្នាំ​២០២០ ។​

កម្លាំង​អន្តរាគមន៍ ដែលត្រូវទៅ​ជួយ​ជម្លៀស ទណ្ឌិត​-​ពិរុទ្ធជន នៅក្នុង​ពន្ធនាគារ ខេត្តបន្ទាយមានជ័យ​

​សូមជម្រាបថា ពន្ធនាគារ​ខេត្ដ​បន្ទាយមានជ័យ កាលពី​ថ្ងៃទី​១០ ខែតុលា ឆ្នាំ​២០២០ បាន​ទទួលរង ការគំរាមកំហែង​យ៉ាងធ្ងន់ធ្ងរ ពី​ជំនន់​ទឹកភ្លៀង ដែល​បាន វាយបំបាក់​ជញ្ជាំង​ពន្ធនាគារ ប្រមាណ ១០០ ម៉ែត្រ ធ្វើឱ្យ​ទឹក​ហូរ បុក​ចូល​ពន្ធនាគារ យ៉ាងខ្លាំង ។​

​មន្ដ្រី​ពន្ធនាគារ ខេត្ដ​បន្ទាយមានជ័យ បានឱ្យដឹងថា ក្រោយពី​មាន​បញ្ហា​នេះ កើតឡើង អ្នកទោស ដែល​កំពុង​ជាប់​ឃុំឃាំង ជាង ៨០០ នាក់ ត្រូវបាន​កម្លាំង​នគរបាល កម្លាំង​អាវុធហត្ថ ដឹក​ជម្លៀស ទៅ​ឃុំខ្លួន ជា​បណ្ដោះអាសន្ន នៅ​ពន្ធនាគារ ខេត្ដ​សៀមរាប និង​ខេត្តបាត់ដំបង​។ បើតាម​មន្ដ្រី​ពន្ធនាគារ ជា​ជំហាន​ដំបូង អ្នកទោស​ស្រី និង​កុមារ ត្រូវបាន​ជម្លៀស​មុនគេ បន្ទាប់មក នឹង​ជម្លៀស​អ្នកទោស តាម​ក្រោយ​៕​/V

ទណ្ឌិត និង​ពិរុទ្ធជន ដែល​នៅក្នុង​ពន្ធនាគារ ខេត្តបន្ទាយមានជ័យ កំពុងបានត្រូវជម្លៀសចេញ
ទណ្ឌិត និង​ពិរុទ្ធជន ដែល​នៅក្នុង​ពន្ធនាគារ ខេត្តបន្ទាយមានជ័យ កំពុងបានត្រូវជម្លៀសចេញ
កម្លាំង​អន្តរាគមន៍ ដែលត្រូវទៅ​ជួយ​ជម្លៀស ទណ្ឌិត​-​ពិរុទ្ធជន នៅក្នុង​ពន្ធនាគារ ខេត្តបន្ទាយមានជ័យ​

ទីតាំងផ្សាយពាណិជ្ជកម្ម

- Advertisment -



Most Popular