ដោយៈ មេសា/ភ្នំពេញៈ លោក តូច ចាន់នី អគ្គនាយកបច្ចេកទេស នៃ ក្រសួងសង្គមកិច្ច អតីតយុទ្ធជន និង យុវនីតិសម្បទា បានប្រាប់ទៅស្ថាប័នដែលធ្វើការជាមួយកុមារថា “ អង្គការក្រៅរដ្ឋាភិបាល ក៏ដូចជាមណ្ឌលទាំងអស់នៅទូទាំងប្រទេស ដែលទទួលបានវិញ្ញាបនបត្រពីក្រសួងសង្គមកិច្ច ហើយ មេត្តាយកទៅអនុវត្តឱ្យបានត្រឹមត្រូវតាមខ្លឹមសារដែលបានព្រមព្រៀង និង បង្កើនគុណភាពឱ្យបានកាន់តែល្អប្រសើរថែមទៀត កុំបន្ធូរបន្ថយឡើយ ព្រោះអំណឹះតទៅ ក្រសួងសង្គមកិច្ច នឹងកាន់តែពង្រឹងគុណជាបន្តបន្ទាប់ទៀត ហើយក៏ត្រូវរក្សាឱ្យបាននូវសាមគី្គភាព ចៀសវាងឱ្យបាននូវទំនាស់ទាស់ទែងគ្នាដោយប្រការណាមួយ នាំឱ្យមានអំពល់ដល់អ្នកពាក់ព័ន្ធ ជាពិសេស ជះឥទ្ធិពលមិនល្អដល់កុមារក្នុងបន្ទុករបស់ខ្លួន “ ។
លោក តូច ចាន់នី ថ្លែងផ្តាំផ្ញើបែបនេះ នៅក្នុងពិធីប្រគល់វិញ្ញាបនបត្រទទួលស្គាល់មណ្ឌលថែទាំកុមារ ចំនួន ១២ នៃ អង្គការចំនួន ៩ នៅឯក្រសួងសង្គមកិច្ច នារសៀលថ្ងៃទី ១៣ ខែ តុលា ឆ្នាំ ២០២០ ។
លោក ភី ណូ ប្រធាននាយកដ្ឋានសុខុមាលភាពកុមារ នៃ ក្រសួងសង្គមកិច្ច បានឱ្យដឹងថា តាមរយៈវិញ្ញាបនបត្រ ឬ តាមរយៈការទទួលស្គាល់ដែលមានសុពលភាពរយៈពេល ០៣ ឆ្នាំនេះ មានទឹកប្រាក់ប្រមាណជា ០៤ លាន និង ០២ សែន ដុល្លារ អាមេរិក សម្រាប់ធ្វើការលើវិស័យកុមារ នៅ កម្ពុជា ។
លោក តូច ចាន់នី បានបន្ថែមថា ការណ៍ដែលលោកលើកឡើងខាងលើនេះ មិនមែនមានន័យថា ក្រសួងសង្គមកិច្ច កំពុងរឹតត្បិត ឬ ដាក់សម្ពាធទៅលើអង្គការក្រៅរដ្ឋាភិបាល ឬ មណ្ឌលថែទាំកុមារទាំងឡាយឡើយ និយាយដោយឡែក ហើយបើនិយាយជារួមគឺ អង្គការស្ថាប័នជាតិ អន្តរជាតិទាំងអស់តែម្តង ព្រោះក្រសួងសង្គមកិច្ច ពិតជាត្រូវការអង្គការក្រៅរដ្ឋាភិបាលជាដៃគូខ្លាំងណាស់ ដោយសារការងារវិស័យសង្គមកិច្ច មានវិសាលភាពធំធេងណាស់ ក្រសួងពិតជាមិនអាចធ្វើម្នាក់ឯងគ្រប់ជ្រុងជ្រោយឡើយ ។
ប៉ុន្តែអ្វីដែលក្រសួងសង្គមកិច្ចធ្វើបែបនេះ គឺ ដើម្បី គុណភាពការងារ ស្របទៅតាមគោលការណ៍នានាដែលមានស្រាប់ ហើយគឺជាគោលការណ៍ដែលបានតាក់តែងឡើង ដោយមានការចូលរួមពីដៃគូពាក់ព័ន្ធដែរ គឺមិនមែនធ្វើឡើងដោយក្រសួងសង្គមកិច្ចតែម្នាក់ឯងឡើយ ហើយបើនិយាយជារួម គឺ ដើម្បី ឧត្តមប្រយោជន៍កុមារ កម្ពុជា តែម្តង ។
ជាការកត់សម្គាល់ នៅក្នុងឆ្នាំ ២០២០ នេះ ក្រសួងសង្គមកិច្ច បានប្រមែប្រមូលកៀគរធនធានតាមរយៈអង្គការក្រៅរដ្ឋាភិបាលជាតិ និង អន្តរជាតិ បានប្រមាណជា ១៥០ ស្ថាប័ន ដោយមានថវិកាប្រមាណជា ៨០ លាន ដុល្លារ អាមេរិក សម្រាប់ធ្វើការលើវិស័យសង្គមកិច្ចរយៈពេល ០១ ឆ្នាំ ទៅ ០៣ ឆ្នាំ ដែលក្នុងនោះ ត្រូវបានគេមើលឃើញថា លោក តូច ចាន់នី គឺជាមនុស្សដ៏សកម្មម្នាក់ ក្នុងការសម្របសម្រួល ដើម្បី ឱ្យស្ថាប័នដៃគូទាំងនោះ អាចបំពេញលក្ខន្តិកៈដែលតម្រូវឱ្យមាន ។
ទោះយ៉ាងណា ក៏ត្រូវបានកត់សម្គាល់ផងដែរថា ជាបន្តបន្ទាប់ លោក តូច ចាន់នី ក៏មិនបណ្តែតបណ្តោយឱ្យស្ថាប័នទាំងនោះ ធ្វើអ្វីតាមតែទំនើងចិត្តដែរ គឺលោកតែងតែមានយន្តការតាមដានត្រួតពិនិត្យ ដើម្បី ឱ្យប្រាកដថា ស្ថាប័នទាំងនោះ បានអនុវត្តត្រឹមត្រូវទៅតាមខ្លឹមសារដែលបានព្រមព្រៀងគ្នានៅក្នុងកិច្ចសន្យា ( អនុស្សារណៈ នៃ ការយោគយល់គ្នា ឬ MOU ) ដែរ ឬ អត់ ហើយលោក តូច ចាន់នី ក៏តែងតែប្រាប់ទៅស្ថាប័នទាំងនោះថា ប្រសិនបើ ពួកគេ មិនអនុវត្តឱ្យបានត្រឹមត្រូវទៅតាមខ្លឹមសារដែលបានព្រមព្រៀងគ្នានោះទេ ក្រសួងសង្គមកិច្ច ក៏អាចនឹងដកសេចក្តីទុកចិត្ត ( MOU ) នោះមកវិញនៅពេលណាក៏បាន ។
មិនមែនតែម្តង ឬ ពីរដង ទេ គឺជាហូរហែ លោក តូច ចាន់នី ក៏បានក្រើនរំឭកថា អ្នកដែលត្រូវអនុវត្តឱ្យបានត្រឹមត្រូវទៅតាមខ្លឹមសារដែលបានព្រមព្រៀង និង ត្រូវធ្វើការឱ្យមានគុណភាព ប្រកបដោយទំនួលខុសត្រូវ ចៀសវាងឱ្យបាននូវការប្រព្រឹត្តមិនសុចរិតនោះ មិនមែនតែបុគ្គលិក នៃ ស្ថាប័នជាដៃគូទាំងនោះទេ ប៉ុន្តែមន្ត្រីក្រោមឱវាទ នៃ ក្រសួងសង្គមកិច្ច នៅតាមវិស័យនីមួយៗ ក៏ត្រូវតែធ្វើដូចគ្នានោះដែរ ៕Kh
