ដោយ: ប.ជ័យ / បន្ទាយមានជ័យ: នៅស្រុកម៉ាឡៃ ទឹកជំនន់បានស្រកហើយ តែមន្ត្រីនិងពលរដ្ឋបែរជាបានប្រទះឃើញផុសចេញគ្រាប់តោន១គ្រាប់ នៅមាត់អូរព្រំដែនកម្ពុជា-ថៃ នាភូមិក្បាលស្ពានឃុំ/ស្រុកម៉ាឡៃ កាលពីរសៀលថ្ងៃទី១២ ខែតុលា ឆ្នាំ២០២០។
លោក ស្វាយ ជា អភិបាលរងស្រុកម៉ាឡៃ បានឲ្យដឹងថ្ងៃទី១៣ខែតុលាថា លោកនិងបានមកត្រួតពិនិត្យមើលទឹកជំនន់នៅអូរព្រំដែនកម្ពុជា-ថៃ លោកនិងប្រជាជនក៏ប្រទះឃើញគ្រាប់មីនតោនមួយគ្រាប់ នៅនឹងមាត់អូរព្រំដែនត្រង់ចំណុចបង្គោលព្រំដែនលេខ៥០។
លោកបន្តថា លោកបានរាយការណ៍ជូនប្រតិបត្តិករបោសសម្អាតមីន ហើយអ្នកជំនាញនៃប្រទេសទាំង២ នឹងទៅពិនិត្យហើយសម្រេចថា ត្រូវដោះចេញឬដាក់សញ្ញាគ្រោះថ្នាក់មីនព្រមាននៅទីនោះ។ ចំពោះមុខ អាជ្ញាធរមានសមត្ថកិច្ចបានផ្សព្វផ្សាយឲ្យពលរដ្ឋមានការប្រុងប្រយ័ត្នគ្រប់យ៉ាង រាប់ទាំងពីគ្រោះថ្នាក់នៃគ្រាប់យុទ្ធភ័ណ្ឌនិងមីនផង ព្រោះម៉ាឡៃគឺជាអតីតសមរភូមិ៕ ល
