Home ព័ត៌មានជាតិ សេដ្ឋកិច្ច ក្រុម​ផ្ដាច់​...

ក្រុម​ផ្ដាច់​ព្រលឹង ដឹកឈើ​ចេញពី ក្រុង​ស្ទឹងត្រែង រាល់​យប់ សមត្ថកិច្ច មិន​ហ៊ាន​បង្ក្រាប​

ដោយៈ​សុខុម / ស្ទឹងត្រែងៈ រថយន្ត​ប្រភេទ សាំ​យ៉ុង ដឹកឈើ​បន្ត​គ្នា ចេញពី​សិប្បកម្ម ក្នុង​ក្រុង​ស្ទឹងត្រែង រាល់​យប់ ដោយ​ឆ្លងកាត់​ចំណុច អូរ​ពងមាន់ តាមផ្លូវ​ជាតិ​លេខ ៧ ឆ្ពោះទៅកាន់​ខេត្តក្រចេះ ដោយ​មិនមាន​សមត្ថកិច្ច មិន​ហ៊ាន​បង្ក្រាប ។ សកម្មភាព​នោះ ទំនងជា​ឈ្មួញ​ស៊ុំគ្រលុំ​គ្នា ជាមួយ​សមត្ថកិច្ច នៅតាម​ដងផ្លូវ លាក់បាំង មិន​ឲ្យ​អភិបាល ខេត្តស្ទឹងត្រែង ដឹង​ឡើយ ។​

​តាម​ប្រភពព័ត៌មាន បាន​ឲ្យ​ដឹងថាៈ រាល់​ទៀបភ្លឺ គេ​តែងតែ​ឃើញ រថយន្ត​ក្រុម​ផ្ដាច់​ព្រលឹង បើក​លឿន​ដូច​ព្យុះ ដឹកឈើ​ចេញពី​ក្រុង​ស្ទឹងត្រែង ឆ្លងកាត់​អូរ​ពងមាន់ ទៅ​ខេត្តក្រចេះ បន្ត​គ្នា​។ ពេល​រថយន្ត​ក្រុម​នោះ ចេញដំណើរ​ម្ដងៗ គ្មាន​សមត្ថកិច្ច​ណា ហ៊ាន​ឃាត់​ត្រួតពិនិត្យ​ឡើយ ទោះបីជា​ដាក់​បង្កប់​ឈើ​ប្រណីត ខុសច្បាប់ យ៉ាងណាក៏ដោយ​។​

​អ្នករកស៊ី​តូចតាច ត្អូញត្អែរថាៈ បើសិនជា​ហ៊ាន ប្រកបមុខរបរ ដឹកឈើ​កែច្នៃ ទ្វា​បង្អួច​បន្តិចបន្តួច តាមផ្លូវ​ជាតិ​លេខ ៧ មិនបាន​ប្រាប់​សមត្ថកិច្ច តាម​ដងផ្លូវ​ទេ ប្រាកដជា​ឃាត់​រថយន្ត ដាក់​ខ្នោះ​ទាំង​មនុស្ស យកទៅ​កន្លែង​របស់​សមត្ថកិច្ច ដោយ​ដាក់បន្ទុក​ថា ដឹកជញ្ជូន​ឈើ គ្មាន​ការអនុញ្ញាត ពី​ជំនាញ​រដ្ឋបាល​ព្រៃឈើ​។ តែ​បើសិនជា​ត្រូវរ៉ូវ​គ្នា​ហើយ គេ​មិន​ហ៊ាន ទៅ​ក្បែរ​រថយន្ត ដឹកឈើ​ឡើយ​។​

​ប្រភព​មួយ បាន​ទម្លាយ​ឱ្យដឹងថាៈ សព្វថ្ងៃនេះ មាន​ឈ្មួញ​ជាច្រើន​នាក់ ក្នុងនោះ ឈ្មួញ​ចាស់វស្សា​ម្នាក់ ឈ្មោះ​ចែ ភ័​ណ្ឌ ។ នៅពេល​រៀងរាល់​ព្រលប់ គេ​តែង​ឃើញ​រថយន្ត សាំ​យ៉ុង ៣ ទៅ ៤ គ្រឿង ដើរ​ប្រមូល​ឈើ​គ្រឿង​សង្ហា​រឹម ពី​រោង​សិប្បកម្ម ក្នុង​ខេត្តស្ទឹងត្រែង រួចហើយ ទៅ​ឈប់​ចត​នៅផ្ទះ​ឈ្មោះ​ចែ ភ័​ណ្ឌ នៅ​ផ្លូវ​ខាងក្រោយ​វិទ្យាល័យ ព្រះរាជ​បូជនីយកិច្ច ស្ថិតក្នុង​ភូមិ​ព្រែក សង្កាត់​ស្ទឹងត្រែង ក្រុង​ស្ទឹងត្រែង ខេត្តស្ទឹងត្រែង​។​

​តាម​ប្រភពព័ត៌មាន បាន​ប្រាប់​ឲ្យ​ដឹង​ទៀតថាៈ ក្រុម​រថយន្ត​របស់​ឈ្មោះ​ចែ ភ័​ណ្ឌ បើក​លឿន​ណាស់ ត្រូវបាន​គេ​ដាក់ឈ្មោះថា គឺជា​ក្រុម​ផ្ដាច់​ព្រលឹង ដែល​ដឹកឈើ​ចេញ ពី​ក្រុង​ស្ទឹងត្រែង ឆ្លងកាត់​ខេត្តក្រចេះ បន្តកន្ទុយ​គ្នា ហើយ​គ្មាន​សមត្ថកិច្ច​ណា ហ៊ាន​ប៉ះពាល់​ឡើយ​។ នៅ​ខេត្តក្រចេះ មាន​នគរបាល​ម្នាក់ នៅ​ពី​ក្រោយខ្នង រត់ការ​រថយន្ត​ដឹកឈើ ឈ្មោះ​ចែ ភ័​ណ្ឌ នោះ​។ ពេល​ក្រុម​ផ្ដាច់​ព្រលឹង ចេញដំណើរ​ម្ដងៗ សូម្បីតែ​កម្លាំង​នគរបាល ចរាចរណ៍​ខេត្តស្ទឹងត្រែង ឈរជើង លើ​កំណាត់​ផ្លូវជាតិ​លេខ ៧ ព្រំប្រទល់​ស្ទឹងត្រែង -​ក្រចេះ ក៏​ពុំ​ហ៊ាន​ប៉ះពាល់​ដែរ​។​

​ឈើ​កែច្នៃ​ដែល​ក្រុម​ផ្ដាច់​ព្រលឹង ដឹកជញ្ជូន​គឺ គ្មាន​ច្បាប់​អនុញ្ញាត ពី​មន្ត្រី​ជំនាញ​ឡើយ​។ រីឯ​ប្រភព​ឈើ ត្រូវបាន​គេ​ដឹកជញ្ជូន តាម​ម៉ូតូ​រ៉ឺម៉ក និង​រថយន្ដ ជា​រៀងរាល់​យប់ ចូលទៅ​កែច្នៃ នៅក្នុង​សិប្បកម្ម ក្នុង​ក្រុង​ស្ទឹងត្រែង រាប់សិប​កន្លែង ជាមុនសិន រួចហើយ​ទើប​គេ ដឹកជញ្ជូន​ចេញទៅ​ក្រៅ​ខេត្ត និង​មាន​បង្កប់​ឈើ ខុសច្បាប់​ជាច្រើន នៅ​ពីក្រោម​។​

​កន្លងមក ក្រុម​គណៈកម្មការ​ទប់ស្កាត់ និង​បង្ក្រាប​បទល្មើស ធនធានធម្មជាតិ បាន​ចុះ​ពិនិត្យ តាម​សិប្បកម្ម​ច្រើន​កន្លែង ក្នុង​ក្រុង​ស្ទឹងត្រែង ឃើញថា សិប្បកម្ម​ទាំងអស់ ភាគច្រើន មានការ​អនុញ្ញាត ពី​ជំនាញ​រដ្ឋបាល​ព្រៃឈើ មន្ទីរ​កសិកម្ម​ខេត្តស្ទឹងត្រែង អាជ្ញាធរ​ពាក់ព័ន្ធ​។ ប៉ុន្តែ​ការដឹក​ប្រមូល​ឈើ យកទៅ​កែច្នៃ អនាធិបតេយ្យ គ្មាន​ប្រភព​ច្បាស់លាស់​ឡើយ ធ្វើ​ឲ្យ​រដ្ឋ​បាត់បង់​ប្រាក់ចំណូល ក៏​មិនតិច​ដែរ​។ ក្រោយពី​មាន​ការចុះពិនិត្យ របស់​គណៈកម្មការ មិនបាន​ប៉ុន្មាន​ផង សិប្បកម្ម​ស្ទើរ​ទាំង​ក្រុង​ស្ទឹងត្រែង ត្រូវបាន​ដំណើរការ​បន្លឺសំឡេង លាន់​រំពង​គ្រប់កន្លែង​។ សូម​ថ្នាក់ជាតិ ចុះ​ពិនិត្យមើល​ផង​៕​/V

រថយន្ត​ប្រភេទ សាំ​យ៉ុង ដឹកឈើ​បន្ត​គ្នា ចេញពី​សិប្បកម្ម ក្នុង​ក្រុង​ស្ទឹងត្រែង រាល់​យប់
រថយន្ត​ប្រភេទ សាំ​យ៉ុង ដឹកឈើ​បន្ត​គ្នា ចេញពី​សិប្បកម្ម ក្នុង​ក្រុង​ស្ទឹងត្រែង រាល់​យប់

ទីតាំងផ្សាយពាណិជ្ជកម្ម

- Advertisment -

Most Popular