ផូ​ល ស្កូ​ល ថា Manchester United នៅ​ត្រូវការ​ខ្សែប្រយុទ្ធ​កំពូល​ម្នាក់​

188
ចែករម្លែក

ផូ​ល ស្កូ​ល (Paul Scholes) អតីត​វីរបុរស​របស់​ក្លឹប Manchester United នៅតែ​ជឿថា ក្លឹប​ចាស់ របស់ខ្លួន​មិនទាន់មាន​ខ្សែប្រយុទ្ធ​កម្រិត​កំពូល​នៅឡើយ​ទេ ខណៈ ពេល​ខ្សែប្រយុទ្ធ អែន​ថូ​នី ម៉ា​សល (Anthony Martial ) ស្ទើរតែ​ធ្វើ​ឲ្យ​មជ្ឈដ្ឋាន​ទូទៅ​ជឿថា ខ្លួន​គឺជា​កីឡាករ​ដែល​ស័ក្តិសម នឹង​ពាក់អាវ​លេខ​៩ កាលពី​រដូវ​កាល​មុន​។​
​ ​
​លោក អូ​ឡេ ហ្គា​ន់​ណា សូល​ស្យែ​រ (Ole Gunnar Solskjaer) ចង់​ពង្រឹង​ជម្រើស​ប្រយុទ្ធ​ច្រើន កន្លែង​នៅ​រដូវក្តៅ​នេះ ដូចជា​ខ្សែបម្រើ​ស្លាប ចា​ឌិន សាន​ចូ (Jadon Sancho) របស់​ក្លឹប Dortmund ប៉ុន្តែ​ក្លឹប United ខកខាន​មិនបាន​ឆ្លើយតប​នឹង​តម្លៃ​ផ្ទេរ​១០៨​លាន​ផោន​។ ក្រុម​បិសាច​ក្រហម​ក៏ ខកខាន​មិនបាន​ចុះ​កិច្ចព្រមព្រៀង​ផ្ទេរ​ខ្សែប្រយុទ្ធ អឺ​លិ​ង ហា​ឡែ​ន (Erling Haaland) កាលពី​ខែ មករា​ផងដែរ ខណៈ​កីឡាករ​រូបនេះ​សុខចិត្ត​ផ្ទេរ​មក​ក្លឹប Dortmund ជំនួស​វិញ​។​

​ជា​ជំនួស ក្លឹប Unted បាន​ចុះ​កិច្ចព្រមព្រៀង​ផ្ទេរ​កីឡាករ អេ​ឌី​ន​សិន កា​វ៉ា​នី (Edinson Cavani) វ័យ​៣៣​ឆ្នាំ​កាលពី​សប្តាហ៍​មុន ប៉ុន្តែ ស្កូ​ល អតីត​ខ្សែប្រយុទ្ធ​សញ្ជាតិ​អង់គ្លេស​រូបនេះ​អះអាងថា ក្លឹប​នេះ​នៅ​ត្រូវការ​ខ្សែប្រយុទ្ធ​កណ្តាល​ម្នាក់​។​
​ ​
​ជម្រើស​ខ្សែប្រយុទ្ធ​ម្នាក់​របស់​ក្រុម United បច្ចុប្បន្ន​មាន ម៉ា​គូស រ៉ា​ហ្វ​ដ (Marcus Rashford) លេង​នៅ​តំណែង​ប្រយុទ្ធ​ខាងស្តាំ ម៉ា​សិន ហ្គ្រី​ន​វូដ (Mason Greenwood) លេង​នៅ​តំណែង ប្រយុទ្ធ ខាងស្តាំ​និង ម៉ា​សល នៅ​តំណែង​ប្រយុទ្ធ​កណ្តាល បើទោះបីជា​លោក ស្កូ​ល កោត សរសើរ​កីឡាករ​ទាំងបី​ក៏ដោយ ក៏​លោក​ជឿថា គ្មាន​កីឡាករ​ណា​ម្នាក់​ក្នុងចំណោម​អ្នក​ទាំងបី ស័ក្តិសម​នឹង​តំណែង​លេខ​៩​នេះ​ទេ​។​
​ ​
​លោក ស្កូ​ល និយាយថា “​ខ្សែប្រយុទ្ធ​ទាំងបី​រូបនេះ​ពិតជា​មាន​ទេពកោសល្យ​ហើយ​ខ្ញុំ​បានដឹង​ពី រឿងនេះ ប៉ុន្តែ​បញ្ហា​របស់​ក្រុម United គឺជា​គ្មាន​កីឡាករ​ណា​ម្នាក់​ក្នុង ចំណោម​អ្នក​ទាំងបី​គឺជា​ខ្សែ ប្រយុទ្ធ​កណ្តាល​ពិតប្រាកដ​។​
​ ​
​ម៉ា​សល រកបាន​២៣​គ្រាប់​ក្នុងការ​បង្ហាញមុខ​៤៨​លើក​កាលពី​រដូវ​កាល​មុន និង​បានបញ្ចប់ រដូវ​កាល​ឆ្នាំ​២០១៩/២០ ដោយ​ភាពខ្លាំង ពីព្រោះ​អាច​រកបាន​៣​គ្រាប់​ក្នុង​៦​ប្រកួត​ចុងក្រោយ​។ ក្នុង​បី​ប្រកួត​នៅ​រដូវ​កាល​នេះ កីឡាករ​រូបនេះ​មិនទាន់​រកបាន​១​គ្រាប់​នៅឡើយ​ទេ​។​
​ ​
​រ៉ា​ហ្វ​ដ រកបាន​២២​គ្រាប់​ក្នុង​៤៤​ប្រកួត​កាលពី​រដូវ​កាល​មុន ហើយ​រកបាន​២​គ្រាប់​ក្នុង​៥​ប្រកួត នៅ​រដូវ​កាល​ឆ្នាំ​២០២០-២១ ស្របពេល ហ្គ្រី​ន​វូដ ដណ្តើមបាន​១៩​គ្រាប់​ក្នុង​៥១​ប្រកួត​នៅ​គ្រប់ ការប្រកួត​។​
​ ​
​កា​វ៉ា​នី រកបាន​២០០​គ្រាប់​ក្នុងការ​ប្រកួត​មុខ​៣០១​ប្រកួត​សម្រាប់​ក្រុម​យក្ស​បារាំង PSG មុនពេល ចាកចេញ​កាលពី​រដូវក្តៅ ប៉ុន្តែ ស្កូ​ល បាន​ហៅ​ការសម្រេចចិត្ត​ផ្តល់​កិច្ចសន្យា​លេង​ពីរ​ឆ្នាំ​ដល់ កា​វ៉ា​នី នៅ​ថ្ងៃ​ចុងក្រោយ​នៃ​ទីផ្សារ​ទិញដូរ​កីឡាករ​កាលពី​សប្តាហ៍​មុន​នោះ​ថា ជា​រឿង​ចម្លែក​៕ ប្រែ​សម្រួល​: ពិសិដ្ឋ​

ផូ​ល ស្កូ​ល (Paul Scholes)

ទីតាំងផ្សាយពាណិជ្ជកម្ម