ដួង ម៉ា​និ​ច ជា​តារា​មួយទៀត​ចេញ​យក​អំណោយ​ទៅ​ជួយ​ដល់​អ្នករងគ្រោះ​នៅ​ខេត្ត​បន្ទាយ មានជ័យ

289
ចែករម្លែក

ដោយ​: បូ​រិ​ន​/​ភ្នំពេញ​:​តារា​សម្តែង ដួង ម៉ា​និ​ច នឹង​ឆ្លៀត​ពេលវេលា​ដ៏​មមាញឹក​ពី​ការសម្តែង របស់​នាង​នាំយក​អំណោយ​ជួយ​ដល់​អ្នករងគ្រោះ​ជំនន់​ទឹកភ្លៀង​នៅ​ខេត្តបន្ទាយមានជ័យ​នា ពេលខាងមុខ​នេះ​។

​ការបង្ហាញ​ពី​គម្រោង​ចុះទៅ​ដោយផ្ទាល់​នេះ ដួង ម៉ា​និ​ច ក្រោយពី​នាង​បានទទួល​ដំណឹង​ថា ប្រាំបួន ស្រុក ក្រុង នៃ​ខេត្តបន្ទាយមានជ័យ បាននិងកំពុង​ទទួល​រង​នូវ​ការប៉ះពាល់​លិចលង់ ដោយ​ទឹកជំនន់​ទឹកភ្លៀង ពី​ចាប់ពី​ថ្ងៃទី​៨ ដល់ ១៣ ខែតុលា​។ ទឹកជំនន់​នេះ​បាន​បំផ្លាញ ផ្ទះ ស្រូវ ដំឡូង និង​ហេដ្ឋារចនាសម្ព័ន្ធ ហើយ​មាន​ប្រជាពលរដ្ឋ ស្លាប់​អស់ ៣​នាក់ ។ នេះ​បើ​យោងតាម របាយការណ៍ របស់​រដ្ឋបាល ខេត្តបន្ទាយមានជ័យ ។​

​ជាមួយនឹង​ដំណឹង​ដ៏​ក្រៀមក្រំ​នេះ​បានធ្វើ​ឲ្យ​តារា​សម្តែង​ដួង ម៉ា​និ​ច និង​សប្បុរសជន​លោក ហេង ស​ន្ទ​រ៉ា និង​ភរិយា​លោកស្រី រស់ ផល្លា ដែល​គេ​ស្គាល់​ថា​ជា​អគ្គនាយិកា​ក្រុមហ៊ុន​អាយ​ស្តា នាំចូល​ផលិតផល​ថែរក្សា​សម្រស់​ពី​ប្រទេស​ថៃ និង​កូរ៉េ​នោះបាន​ប្រាប់​រស្មី​កម្ពុជា​ឱ្យដឹង​កាល ពីថ្ងៃ​ទី​១៤​ខែតុលា​ថា​នាង​ពិតជា​ខ្លោចចិត្ត​អាណិត​ប្រជាពលរដ្ឋ​ដែល​កំពុង​ជួបនឹង​គ្រោះ ទឹកជំនន់​។​អ្វីដែល​នាង​អាចជួយ​បាន​គឺ​ការចូលរួមចំណែក​បន្តិច​បន្តួច​ជាមួយ​សប្បុរសជន​ខាង​លើ​។​នាង​ថា​ដោយសារ​នៅ​បន្តការងារ​ថត​មួយចំនួន​នាង​នឹង​ចុះទៅ​ខេត្តបន្ទាយមានជ័យ​នៅ​ថ្ងៃទី​១៩​ខែតុលា​ខាងមុខ​ដើម្បី​យក​អំណោយ​មួយចំនួន​ជា​គ្រឿងឧបភោគ​បរិភោគ និង​ថវិកា​ជួយ​ដល់ ពួកគាត់​។

​តារា​សិច​ស៊ី​រូបនេះ បាន​និយាយថា បើទោះបីជា​មិនបាន​ពេញ​មួយ​ខេត្ត​ក៏​ក្នុង​តំបន់​មួយ​ដែល​នាង នឹង​អាចជួយ​បាន​តាម​ធនធាន និង​លទ្ធភាព​។ នាង​ថា​ខ្ទង់ចំណាយ​អាច​ច្រើនជាង​មួយ​ពាន់​ដុល្លារ ទៅតាម​ស្ថានភាព​ពិត​ជាក់ស្តែង​។ នាង​ក៏​អរគុណ​សម្រាប់​ថ្នាក់ដឹកនាំ​រាជរដ្ឋាភិបាល​អាជ្ញាធរ ដែនដី​ដែល​បាន​យកចិត្តទុកដាក់​និង​ជួយ​ដល់​ប្រជាពលរដ្ឋ​ក្នុង​គ្រា​ដ៏​លំបាក​នេះ​។

​សូមបញ្ជាក់ថា សកម្មភាព​លើក​នេះ​មិនមែនជា​លើក​ទី​១​ទេ​ដែល​តារា​សម្តែង​ស្រី​រូបនេះ បានធ្វើ ដំណើរ​ទៅកាន់​ទឹកដី​កំណើត​ដើម្បី​ធ្វើ​កម្មវិធី​សប្បុរសធម៌ ដែល​កន្លងទៅ​នាង​ក៏​ធ្លាប់​ធ្វើបុណ្យ និង​ចែក​អំណោយ​ជូន​ដល់​ទុរគតជន​មួយចំនួន​នៅ​ទីនោះ​ផងដែរ​៕

ទីតាំងផ្សាយពាណិជ្ជកម្ម