ក្រោយ​ប្រកាស​ប្រើ​ច្បាប់​គ្រាអាសន្ន​នៅ​បាងកក ប៉ូលិស​ចូល​បំបែកហ្វូង​បាតុកម្ម​នៅក្រៅ​ការិយាល័យ​នាយករដ្ឋមន្ត្រី​

252
ចែករម្លែក

​ប៉ូលិស​ថៃ​កាលពីដើម​ថ្ងៃ​ព្រហស្បតិ៍​ទី​១៥​តុលា ​បាន​បំបែកហ្វូង​អ្នកប្រឆាំង​តវ៉ា​មួយក្រុម​ដែល​បាន​មក​តវ៉ា​ឡូឡា​តាំង​ពី​ពី​យប់​ថ្ងៃ​ពុធ ​នៅក្រៅ​ការិយាល័យ​នាយករដ្ឋមន្ត្រី​ដើម្បី​ទាមទារ​ឲ្យ​លោក​ចុះចេញ​ពី​​តំណែង ដែល​នាំ​ឲ្យ​រដ្ឋាភិបាល​ប្រកាស​ប្រើ​ច្បាប់​គ្រាអាសន្ន​ធ្ងន់ធ្ងរ​នៅក្នុង​រដ្ឋធានី​បាងកក​។​

​អ្នកកាសែត​បាន​និយាយថា ប៉ូលិស​បាន​រុលចូល​មកពី​ច្រើន​ទិស​ដើម្បី​បង្ខំ​ឲ្យ​អ្នក​ប្រឆាំង​តវ៉ា​រាប់រយ​នាក់​នៅ​ក្រៅ​វិមាន​រដ្ឋាភិបាល ចាកចេញ​។​អ្នក​ប្រឆាំង​តវ៉ា​ខ្លះត្រូវ​ចាប់​នាំ​ចូល​រថយន្ត​ប៉ូលិស​។​

​ប្រតិបត្តិការ​របស់​ប៉ូលិស​នេះ​កើតឡើង​បន្ទាប់​ពី​នាយករដ្ឋមន្ត្រី ប្រា​យុទ្ធ ចាន អូ​ចា ប្រកាស​ស្ថានភាព​គ្រាអាសន្ន​ធ្ងន់ធ្ងរ​មួយ​នៅ​ក្រុង​បាងកក ដើម្បី​អនុញ្ញាតឲ្យ​អាជ្ញាធរ​មាន​សិទ្ធិ​អំណាច​ចាត់ការ​​លើ​ពួក​អ្នក​ប្រឆាំង​តវ៉ា​ខុសច្បាប់​។​

​តាម​បច្ចេកទេស ថៃ​កំពុង​ស្ថិត​នៅក្រោម​ស្ថានភាព​គ្រាអាសន្ន​នៅឡើយ​ទេ ជា​ផ្នែក​នៃ​ការ​រឹតត្បិត​ប្រឆាំង​នឹង​កូវី​ដ​១៩​។​

​មុន​ប៉ូលិស​ចូល​បង្ក្រាប អ្នក​តវ៉ា​ប្រឆាំង​យ៉ាង​ច្រើន​បាន​ចាក​ចេញពី​តំបន់​ខាងក្រៅ​ការិយាល័យ​នាយករដ្ឋមន្ត្រី​រួចជាស្រេច ក្រោយ​ពី​មេដឹកនាំ​បាតុកម្ម​ម្នាក់​បាន​ប្រកាស​បញ្ចប់​ការជួបជុំ​នៅក្រៅ​វិមាន​​រដ្ឋាភិបាល តែ​ទោះជា​យ៉ាងណា​នៅ​សេសសល់​អ្នក​ប្រឆាំង​តវ៉ា​ពីរ​បី​រយ​នាក់​ទៀត​។ មេដឹកនាំ​នេះ​បានប្រកាសថា ការជួបជុំ​នឹង​រើ​ទៅកាន់​ទីតាំង​ផ្សេង​មួយ​នៅក្នុង​ក្រុង​បាងកក​នៅ​រសៀល​ថ្ងៃ​ព្រ​ហស្ប​តិ៍​។​

​ការជួបជុំ​តវ៉ា​ចុងក្រោយ​នេះ​បាន​ចាប់ផ្តើម​កាលពី​ថ្ងៃ​ពុធ ដោយ​អ្នកចូលរួម​រាប់ពាន់​នាក់​បាន​ដើរ​ដង្ហែ​ចេញពី​វិមាន​ប្រជាធិបតេយ្យ​ក្នុង​ក្រុង ទៅកាន់​វិមាន​រដ្ឋាភិបាល​។​វា​ជា​ការជួបជុំ​តវ៉ា​ធំ​លើក​ទី​៣​របស់​ពួក​សកម្មជន ដែល​ធ្វើ​យុទ្ធនាការ​សម្រាប់​ការផ្លាស់ប្តូរ​ឆ្ពោះទៅ​កាន់​លទ្ធិប្រជាធិបតេយ្យ​។​ការតវ៉ា​ប្រឆាំង​នេះ​បាន​ទាក់ទាញ​ការចាប់អារម្មណ៍ ដោយសារតែ​ការទាមទារ​របស់​គេ រួម​មាន​ការ​កែ​ទម្រង់​​របបរាជានិយម​អាស្រ័យ​ធម្មនុញ្ញ​ដែល​ពួក​គេ​អះអាង​ថា​កំពុង​ត្រូវបាន​អនុវត្ត​មិន​ត្រឹមត្រូវ​ក្នុង​ក្រប​ខ័ណ្ឌ​ប្រជាធិបតេយ្យ​មួយ​។​

​ការទាមទារ​នេះ​បង្ក​ភាពចម្រូងចម្រាស​ដ៏​ខ្លាំង ដោយសារ​តែ​ស្ថាប័ន​ព្រះមហាក្សត្រ​ថៃ​ត្រូវ​ហាមប្រាម​ដោយ​ច្បាប់​មិន​ឲ្យ​ប៉ះពាល់​និង​ត្រូវបាន់​ចាត់ទុក​ជា​របស់​ពិសិដ្ឋ​និង​ជា​សសរ​នៃ​អត្តសញ្ញាណ​ថៃ​ជា​យូរ​​លង់​មកហើយ​។​

​ពួក​រាជានិយម​ថៃ​ដែល​ប្រកាន់​អភិរក្ស ចោទប្រកាន់​ពួក​អ្នក​តវ៉ា​ទាមទារ​ទាំង​នេះ​ថា ស្វះស្វែង​បញ្ចប់​របបរាជានិយម ជា​ការចោទប្រកាន់​ដែល​ពួកគេ​បាន​ច្រានចោល​និង​ថា​ការទាមទារ​ឲ្យ​កែ​ទម្រង់​នេះ​​គឺ​ដើម្បី​និរន្ត​ភាព​របស់​របប​រាជានិយម​តែប៉ុណ្ណោះ​។​មុន​ចាកចេញ​ពី​វិមាន​ប្រជាធិបតេយ្យ​កាលពី​ថ្ងៃ​ពុធ មាន​ការប៉ះទង្គិច​តូចៗ​ជាច្រើន​រវាង​អ្នក​ប្រឆាំង​តវ៉ា​និង​អ្នកគាំទ្រ​របបរាជានិយម ដោយ​ខ្លះ​ដាល់​គ្នា​​និង​គប់​ដប​ទឹក​ដាក់គ្នា នៅ​ពេល​ប៉ូលិស​ព្យាយាម​ចូល​អន្តរាគមន៍​។​

​សូមបញ្ជាក់​ថា ចលនា​ប្រឆាំង​តវ៉ា​នេះ​បាន​ចាប់ផ្តើម​កាលពី​ខែ​មីនា​ដោយ​ពួក​និស្សិត​សកល​វិទ្យាល័យ​តែ​ត្រូវបាន​ផ្អាក​ទៅវិញ​នៅ​ពេល​វីរុស​កូរ៉ូណា​វាយ​លុកថៃ​។​វា​បាន​វិល​មក​វិញ​នៅ​ខែកក្កដា​នៅពេល​​ការ​គំរាម​ពី​វីរុស​បាន​ធូរស្រាល និង​ត្រូវបាន​ជំរុញ​នាំមុខ​ដោយ​ក្រុមនិស្សិត​ដដែល អម​ដោយ​ការចុះផ្សាយ​ក្នុង​បណ្តាញ​សង្គម​។​

​ការទាមទារ​ដើម​របស់​ចលនា​នេះ គឺ​បោះឆ្នោត​ជាថ្មី កែ​រដ្ឋធម្មនុញ្ញ​ដើម្បី​ធ្វើឲ្យ​វា​មាន​លក្ខណៈ​ប្រជាធិបតេយ្យ​ឡើង និង​បញ្ចប់​ការបំភិតបំភ័យ​សកម្ម​ជន​។​ពួក​អ្នក​ប្រឆាំង​តវ៉ា ចោទប្រកាន់​លោក​ប្រា​យុទ្ធ​​ដែល​បាន​ដណ្តើម​អំណាច​ក្នុង​រដ្ឋប្រហារ​យោធា​ឆ្នាំ​២០១៤ ថា​វិល​មក​កាន់​អំណាច​ដោយ​មិន​ត្រឹមត្រូវ នៅក្នុង​ការបោះឆ្នោត​កាលពី​ឆ្នាំមុន​ដោយសារ​តែ​ច្បាប់​ត្រូវបាន​ផ្លាស់ប្តូរ​ដើម្បី​គាំទ្រ​គណបក្ស​ដែល​មាន​​ប្រភព​ចេញពី​ក្រុម​យោធា​៕​ប្រែ​សម្រួល​៖​វាសនា​/Ha

​អ្នក​ប្រឆាំង​តវ៉ា​ប្រឈម​មុខ​ជាមួយ​ប៉ូលិស កាលពី​យប់​ថ្ងៃ​ពុធ​

ទីតាំងផ្សាយពាណិជ្ជកម្ម