ក្រសួង​សង្គមកិច្ច ណែនាំ ៤ ចំណុច​ដល់​មន្ទីរ​ក្រោម​ឱវាទ​សម្រាប់​ដំណាក់​ទឹកជំនន់​

120
ចែករម្លែក

ដោយៈ មេសា​/ភ្នំពេញៈ ឆ្លើយតប​ចំពោះ​ស្ថានភាព​ទឹកជំនន់ ដែល​កំពុង​វាយប្រហារ​មកលើ​បណ្តា​តំបន់ និង ខេត្ត នានា​មួយចំនួន​នៅក្នុង​ប្រទេស កម្ពុជា នេះ ក្រសួង​សង្គមកិច្ច អតីតយុទ្ធជន និង យុវនីតិសម្បទា បានចេញ​ស​ចេ​ក្តី​ណែនាំ​ដល់​មន្ទីរ​សង្គមកិច្ច រាជធានី ខេត្ត ឱ្យ​គិតគូរ​យកចិត្តទុកដាក់ ចាត់វិធានការ និង សកម្មភាព​នានា ដើម្បី បញ្ចៀស​នូវ​មហន្តរាយ​នានា ដែល​អាច​កើតឡើង​ជាយថាហេតុ ចំពោះ​ប្រជាជន​ទូទៅ ជាពិសេស​ជន​ចាស់ជរា ជនពិការ ស្ត្រី និង កុមារ ជាដើម ។


​សេចក្តីណែនាំ​ចុះ​កាលបរិច្ឆេទ​ថ្ងៃទី ១៣ ខែ តុលា ហើយ​បានមក​ដល់ដៃ រស្មី​កម្ពុជា នៅ​យប់​ថ្ងៃទី ១៤ ខែ តុលា ឆ្នាំ ២០២០ នេះ បាន​ណែនាំ ៤ ចំណុច​គឺ ៖


១. ត្រូវ​សហការ​ជាមួយ​រដ្ឋបាល រាជធានី ខេត្ត ក្នុងការ​ដោះស្រាយ និង ឆ្លើយតប​ចំពោះ​បញ្ហា​ទឹកជំនន់​ជូន​ប្រជាជន​នៅតាម​មូលដ្ឋាន ដោយ​ស្មារតី​ទទួលខុសត្រូវ​ខ្ពស់ ។​


២. ត្រូវ​រៀបចំ​ឱ្យមាន​ក្រុមការងារ​ប្រតិកម្ម​រហ័ស​ធ្វើ​បច្ចុប្បន្នភាព និង រាយការណ៍​ជាប្រចាំ​អំពី​ចំនួន​ប្រជាជន ស្ថានភាព និង ទីតាំង​ដែល​កំពុង​ជួប​បញ្ហា​ទឹកជំនន់ មក​ក្រសួង តាមរយៈ​តាមរយៈ​នាយកដ្ឋាន​សុខុមាលភាព​សង្គម ដែលជា​សេនាធិការដ្ឋាន​គ្រប់គ្រង​គ្រោះមហន្តរាយ​ប្រចាំ​ក្រសួង ដើម្បី មាន​មូលដ្ឋាន​គ្រប់គ្រាន់​ក្នុងការ​រាយការណ៍​ជូន​ប្រមុខ​រាជរដ្ឋាភិបាល ។​


៣. ត្រូវ​រៀបចំ​ផែនការ​សកម្ម​ភាពចុះ​ពិនិត្យ​ដោះស្រាយ​ឆ្លើយតប​បញ្ហា​ទឹកជំនន់ ខ្យល់​កន្ត្រាក់ ខ្យល់ព្យុះ ការកើតមាន​ជំងឺ​ផ្សេងៗ​មកលើ​ប្រជាជន និង ស្រង់​ទិន្នន័យ​ជនរងគ្រោះ និង ងាយ​រងគ្រោះ ជូន​ក្រសួង ដើម្បី ពិនិត្យ​ដោះស្រាយ បាន​ទាន់ពេលវេលា ។​
៤. ត្រូវ​អប់រំ ផ្សព្វផ្សាយ​ឱ្យបាន​ទូលំទូលាយ​អំពី​ផលប៉ះពាល់ និង វិធានការ​ការពារ​ពី​គ្រោះមហន្តរាយ​ទឹកជំនន់ ខ្យល់​កន្ត្រាក់ ខ្យល់ព្យុះ … ដល់​សហគមន៍ សាលារៀន វត្ត​អារាម និង វិហារ​សាសនា​នានា ។​


​លោក ឈួ​រ សុ​ប្រធាន នាយកដ្ឋាន​សុខុមាលភាព​សង្គម នៃ ក្រសួង​សង្គមកិច្ច បាន​ប្រាប់​រស្មី​កម្ពុជា តាម តេ​ឡេ​ហ្ក្រា​ម នៅ​ថ្ងៃទី ១៥ ខែ តុលា ឆ្នាំ ២០២០ នេះ​ថា គិត​រហូត​ម​ដល់ពេលនេះ នាយកដ្ឋាន​ទទួលបាន​សេចក្តីរាយការណ៍​មកពី ១៩ រាជធានី ខេត្ត ក្រុង ដែលថា បាន​កំពុង​រង​ផលប៉ះពាល់​ពី​គ្រោះទឹកជំនន់​នេះ ហើយ​ថា លោក វង សូត រដ្ឋមន្ត្រីក្រសួង​សង្គមកិច្ច នឹង​ចុះ​ពិនិត្យមើល​ស្ថានភាព​ជាក់ស្តែង​នៅ​ខេត្ត បាត់ដំបង នៅ​ថ្ងៃទី ១៩ និង ថ្ងៃទី ២០ ខែ តុលា ឆ្នាំ ២០២០ នេះ នៅ​ខេត្ត បន្ទាយមានជ័យ ដែល​ពេលនោះ លោក រដ្ឋមន្ត្រី ក៏​នឹង​នាំយកទៅ​ជាមួយ​នូវ​អំណោយ​មួយចំនួន​សម្រាប់​ដោះស្រាយ​បន្ទាន់​ដល់​ប្រជាជន​នៅក្នុង​តំបន់​គោលដៅ​នៅ​ទី​ទាំងនោះ​ផងដែរ ៕ Kh

លោក ឈួ​រ សុ​ប្រធាន នាយកដ្ឋាន​សុខុមាលភាព​សង្គម នៃ ក្រសួង​សង្គមកិច្ច ( រូបៈ មេសា )

ទីតាំងផ្សាយពាណិជ្ជកម្ម