ព្រះសង្ឃ​នៅ​ខណ្ឌ ដង្កោ អាច​ទប់ទល់​ចង្ហាន់​បាន​មួយ​រយៈពេល​ខ្លី​ទៀត​

ដោយៈ មេសា​/ភ្នំពេញៈ គិត​ត្រឹម​ថ្ងៃទី ១៥ ខែ តុលា ឆ្នាំ ២០២០ នេះ ចង្ហាន់ មិនទាន់​ចោទ​ជា​បញ្ហា​ធ្ងន់ធ្ងរ​នៅឡើយ​ទេ សម្រាប់​ព្រះសង្ឃ​ដែល​គង់នៅ​ក្នុង បណ្តា​វត្ត​អារាម នានា នៅក្នុង​ខណ្ឌ ដង្កោ រាជធានី ភ្នំពេញ ដោយ​ជាទូទៅ​វត្ត​ខ្លះ​នៅមាន​អង្ករ ឬ មី ជាដើម អាច​ផ្គត់ផ្គង់​បាន​មួយ​រយៈពេល​ខ្លី ប៉ុន្តែ​មិនអាច​ទ្រទ្រង់​បានយូរ​ប៉ុន្មាន​ទេ ។ នេះ​បើតាម​ការលើកឡើង​រប​ស់​ព្រះចៅអធិការ​វត្ត​នានា ដូចជា​ព្រះចៅអធិការ​វត្ត ចំការ​ខ្សាច់ វត្ត ព្រែក​ជ្រៃ វត្ត ហារ និង វត្ត ព្រែក​ថ្លឹង ជាដើម ដែល​បានទូល ( ប្រាប់ ) ព្រះ​ភិក្ខុ ចឹក ចុ​ន្ទ ព្រះ​អនុគណ​ខណ្ឌ ដង្កោ រាជធានី​ភ្នំពេញ ។​


​ព្រះ​ភិក្ខុ ឆឿ​ន ឈូក ព្រះចៅអធិការ​វត្ត ចំការ​ខ្សាច់ បាន​បន្ថែមថា “ ប៉ុន្មាន​ថ្ងៃ​មកនេះ ក៏​នៅមាន​ញាតិ​ញោម​ខ្លះ ចែវ​ទូក​យក​ចង្ហាន់​មក​ប្រគេន​ដល់​វត្ត ខណៈ​ញាតិ​ញោម​ខ្លះ​បាន​ប្រមូល​ផ្តុំគ្នា​នៅ​កន្លែង​ណាមួយ រួចហើយ​ព្រះសង្ឃ​ជិះទូក និមន្ត​ទៅ​ទទួល​ចង្ហាន់​នៅ​ទីនោះ ហើយ​ក្នុង​វត្ត​ក៏​នៅមាន​អង្ករ មី ទឹកត្រី ទឹក​ស៊ិ​អ៊ី ខ្លះ​ដែរ ។ ប៉ុន្តែ​ប្រសិនបើ​ទឹកជំនន់​នៅតែ​អូសបន្លាយ​ពេល​យូរ​ទៀត​នោះ ប្រហែលជា​មិនអាច​ទប់ទល់​បានទេ “ ។​


​សូមជម្រាបថា នៅ​ព្រឹក​ថ្ងៃទី ១៥ ខែ តុលា ឆ្នាំ ២០២០ នេះ ព្រះ​ភិក្ខុ ចឹក ចុ​ន្ទ មួយអន្លើ​ដោយ​ព្រះសង្ឃ ដែលជា​ព្រះចៅអធិការ​វត្ត​មួយចំនួន នៃ ខណ្ឌ ដង្កោ ដែល​វត្ត​របស់​ព្រះអង្គ មិនសូវ​លិចលង់​ខ្លាំង បាន​និមន្ត​ទៅសួរសុខទុក្ខ ហើយក៏​ថែមទាំង​បាន​នាំយក​ទេយ្យទាន​មួយចំនួន​ដូចជា អង្ករ មី ទឹកត្រី ទឹក​ស៊ិ​អ៊ី និង បច្ច័យ ជាដើម​ទៅ​ប្រគេន​ដល់​ព្រះសង្ឃ​នៅតាម​វត្ត​ដែល​រងគ្រោះ​លិចលង់​ខ្លាំង ផងដែរ ។​


​ព្រះមហា​សមណៈ ចឹក ចុ​ន្ទ ក៏បាន​ក្រើនរំឭក​ដល់​ព្រះសង្ឃ ដូនជី តាជី និង សិ​ស្សិ និស្សិត ដែល​គង់ និង ស្នាក់នៅ​ក្នុង​បណ្តា​វត្ត​ទាំងនោះ ឱ្យ​ប្រុងប្រយ័ត្ន នូវ​គ្រោះថ្នាក់​ដែល​អាច​កើតឡើង​ជាយថាហេតុ​ដូចជា គ្រោះ​លង់ទឹក និង សត្វ​អ​សិរ​ពិស​ជាដើម ហើយក៏​ត្រូវ​ប្រុងប្រយ័ត្ន​សុខភាព​ផងដែរ ។​


​ជាការ​កត់សម្គាល់ ឆ្នាំនេះ ក៏​មិន​ខុសពី​ប៉ុន្មាន​ឆ្នាំមុន ឬ នៅ​រាល់ពេល​រាជធានី​ភ្នំពេញ ត្រូវ​រងគ្រោះ​ដោយ​ទឹកជំនន់​ដែរ ខណ្ឌ ដង្កោ គឺជា​ខណ្ឌ ដែល​រងគ្រោះ​ដោយសា​ទឹកជំនន់​ខ្លាំងជាងគេ​បំផុត ក្នុងចំណោម​ខណ្ឌ​ទាំងអស់​នៅក្នុង​រាជធានី​ភ្នំពេញ ។ រងគ្រោះ​ដោយសារ​ទឹកជំនន់​ខ្លាំងជាងគេ ដោយសារ​ភូមិសាស្ត្រ នៃ ខណ្ឌ ដង្កោ នេះ នៅ​ចំ​ពីមុខ​ទឹក ដែល​ហូរ​ធ្លាក់​មកពី​ខេត្ត​ភាគ​នារ​តី មាន​ខេត្ត កំពង់ស្ពឺ​ជាដើម ( ហើយ​អាចមកពី​ខេត្ត​លើសពីនេះ​ទៀត ដោយពេល​ខ្លះ​មកពី​ប្រទេស ថៃ ទៀតផង ) ។​


​ដោយឡែក​សម្រាប់​ឆ្នាំ ២០២០ នេះ យ៉ាងហោចណាស់​ក៏មាន​វត្ត​ចំនួន ៨ ( ក្នុងចំណោម​វត្ត​ទាំង​២៤ នៃ ខណ្ឌ ដង្កោ ) ដែរ ដែល​កំពុង​រង​ការលិចលង់​ខ្លាំង ដោយមាន​វត្ត​ខ្លះ ( ដូចជា​វត្ត ចំការ​ខ្សាច់ ជាដើម ) ទឹក​លិច​ដល់​ត្រឹម​ចង្កេះ រហូត​ល់​ត្រឹម​ទ្រូង​មនុស្ស​ចាស់​ក៏មានដែរ ។ ទោះយ៉ាងណា មិនទាន់​គ្រោះថ្នាក់​អ្វី​កើតឡើង​គួរឱ្យ​សម្គាល់​នៅក្នុង​វត្ត​អារាម​នានា​នៅក្នុង​ខណ្ឌ​នេះ​នៅឡើយ​ទេ ៕ Kh

ព្រះ​ភិក្ខុ ចឹក ចុ​ន្ទ និង ព្រះសង្ឃ​មួយចំនួន បាន​និមន្ត​សួរសុខទុក្ខ និង នាំយក​ទេយ្យទាន​នានា​ទៅ​ប្រគេន​ដល់​ព្រះសង្ឃ​នៅក្នុង​វត្ត​ដែល​រង​ការលិចលង់​ខ្លាំង នៅក្នុង ខណ្ឌ ដង្កោ ( រូបៈ មេសា )

ទីតាំងផ្សាយពាណិជ្ជកម្ម

- Advertisment -

Most Popular