ដោយៈមុនីរ័ត្ន / ភ្នំពេញៈ ជំនន់ទឹកភ្លៀង បានគំរាមកំហែង រាជធានី ខេត្ត ចំនួន ១៩ ប៉ះពាល់ប្រជាពលរដ្ឋ ជាង ២១ ម៉ឺននាក់ ជម្លៀសទៅកាន់ទីទួលសុវត្ថិភាព ជាង ២៥.០០០ នាក់ ផ្ទះប៉ះពាល់ជាង ៥ម៉ឺនខ្នង ស្លាប់មនុស្សចំនួន ១៨នាក់ និងខូចខាតសាលារៀន ផ្លូវថ្នល់ រួមទាំងខូចខាត ផលដំណាំផ្សេងៗ ផងដែរ។ នេះបើតាមការបញ្ជាក់ របស់លោកឃុន សុខា អ្នកនាំពាក្យ គណៈកម្មាធិការជាតិ គ្រប់គ្រងគ្រោះមហន្តរាយ ថ្លែងប្រាប់រស្មីកម្ពុជា កាលពីរសៀល ថ្ងៃទី១៦ ខែតុលា ឆ្នាំ២០២០។
លោក ឃុន សុខា បានមានប្រសាសន៍ថាៈ គិតចាប់ពីថ្ងៃទី១ ដល់ថ្ងៃទី១៦ ខែតុលា ឆ្នាំ២០២០ ជំនន់ទឹកភ្លៀង បានប៉ះពាល់រាជធានី ខេត្ត ចំនួន ១៩ ប៉ះពាល់ប្រជាពលរដ្ឋជាង ២១ ម៉ឺននាក់ ប្រជាពលរដ្ឋជម្លៀស ទៅទីទួលសុវត្ថិភាព មានចំនួន ២៥.០០០ នាក់ លំនៅដ្ឋានប៉ះពាល់ជាង ៥១.០០០ ខ្នង ដំណាំស្រូវជាង ១៣៧.០០០ ហិកតា ដំណាំជាង ៦៧.០០០ ហិកតា ។
លោក ឃុន សុខា បានបញ្ជាក់ថាៈ ប្រជាពលរដ្ឋ ដែលស្លាប់ដោយសារជំនន់ទឹកភ្លៀង ពីថ្ងៃទី១ ដល់ថ្ងៃទី១៦ ខែតុលា ឆ្នាំ២០២០ ចំនួន ១៨ នាក់ ក្នុងនោះក្មេង ចំនួន ៨ នាក់ សាលារៀន ៤៣៩ ផ្លូវជាតិ ផ្លូវខេត្ត ២៨៤ គីឡូម៉ែត្រ ផ្លូវជនបទ ប្រវែង ១.៤៥៩ គីឡូម៉ែត្រ និងស្ពានចំនួន ១៤ កន្លែង ។
យោងតាមរបាយការណ៍ របស់គណៈកម្មាធិការជាតិ គ្រប់គ្រងគ្រោះមហន្តរាយ បានឲ្យដឹងថាៈ រាជធានី ខេត្ត ចំនួន១៩ ដែលរងផលប៉ះពាល់ មានដូចជាៈ ១.ខេត្តពោធិ៍សាត់ ២. ខេត្តប៉ៃលិន ៣. ខេត្តបន្ទាយមានជ័យ ៤. ភ្នំពេញ ៥. ខេត្តបាត់ដំបង ៦. ខេត្តស្វាយរៀង ៧. ខេត្តឧត្តរមានជ័យ ៨. ខេត្តសៀមរាប ៩. ខេត្តតាកែវ ១០. ខេត្តកំពង់ស្ពឺ ១១. ខេត្តមណ្ឌលគិរី ១២. ខេត្តព្រះសីហនុ ១៣. ខេត្តកោះកុង ១៤. ខេត្តព្រះវិហារ១៥. ខេត្រស្ទឹងត្រែង ១៦. ខេត្តកំពង់ចាម ១៧. ខេត្តកណ្តាល ១៨. ខេត្តកំពង់ឆ្នាំង ១៩. ខេត្តកំពង់ធំ ។
សូមជម្រាបថា ខេត្តចំនួននួន ៨ និងរាជធានីភ្នំពេញ នឹងអាចមានភ្លៀងធ្លាក់ច្រើន ជាប់គ្នា រយៈពេលបីថ្ងៃ គឺចាប់ពីថ្ងៃទី១៧ ដល់ថ្ងៃទី១៩ ខែតុលា ឆ្នាំ២០២០ ដែលអាចនឹងធ្វើឲ្យមានជំនន់ទឹកភ្លៀង ជន់លិច។ បន្ទាប់ពីព្យុះទី១៧ ឈ្មោះ សូឌែល ធ្វើដំណើរចូលមកប៉ែកខាងលើ ភាគខាងត្បូង នៃប្រទេសវៀតណាម នៅថ្ងៃទី១៧ ខែតុលា ឆ្នាំ២០២០ នៅពេលចូលមក ក្នុងប្រទេសកម្ពុជា។
ក្រសួងធនធានទឹក និងឧតុនិយម កាលពីថ្ងៃទី១៥ តុលា បានជូនដំណឹងថាៈ បន្ទាប់ពីបានធ្វើការតាមដាន និងការវិវត្តជាក់ស្តែង នៃស្ថានភាពអាកាសធាតុ ជាបន្តបន្ទាប់ ឃើញថា នៅថ្ងៃទី១៥ ខែតុលា ឆ្នាំ២០២០ សម្ពាធទាបសកម្មមួយ កំពុងស្ថិតនៅលើភាគកណ្តាល ប្រទេសហ្វីលីពីន។ តាមការព្យាករណ៍ សម្ពាធទាបសកម្មនេះ នឹងរំកិលចូលមក ក្នុងសមុទ្រចិនខាងត្បូង ហើយវិវត្តខ្លួនជាបន្តបន្ទាប់ ទៅជាព្យុះទី១៧ ឈ្មោះ សូឌែល (SAUDEL) ដោយធ្វើដំណើរ ចូលមកប៉ែកខាងលើ ភាគខាងត្បូង នៃប្រទេសវៀតណាម នៅថ្ងៃទី១៧ ខែតុលា ហើយបានថមថយឥទ្ធិពល ទៅជាវិសម្ពាធ និងសម្ពាធទាប នៅពេលចូលមក ក្នុងប្រទេសកម្ពុជា។ ជាមួយគ្នានេះ ប្រព័ន្ធសម្ពាធទាប បាននិងកំពុងបន្តអូសបន្លាយ ពីលើកម្ពុជា។
ក្រសួងធនធានទឹក និងឧតុនិយម បានបញ្ជាក់ថាៈ លក្ខណៈបែបនេះ នឹងធ្វើឲ្យអាកាសធាតុ នៅព្រះរាជាណាចក្រកម្ពុជា ចាប់ពីថ្ងៃទី១៧ ដល់ថ្ងៃទី១៩ ខែតុលា ឆ្នាំ២០២០ មានស្ថានភាព ដូចជា៖ ១- បណ្តាខេត្តនៅតំបន់វាលទំនាប រួមមានៈ ខេត្តសៀមរាប បន្ទាយមានជ័យ បាត់ដំបង ពោធិ៍សាត់ កំពង់ធំ កំពង់ឆ្នាំង កំពង់ស្ពឺ កណ្តាល និងរាជធានីភ្នំពេញ នឹងអាចមានភ្លៀងធ្លាក់ច្រើន ជាប់បន្ត។ ២- បណ្តាខេត្ត នៅតំបន់ជួរភ្នំដងរែក ខ្ពង់រាបភាគឦសាន និងខេត្តជាប់ព្រំដែន ប្រទេសវៀតណាម រួមមានៈ ខេត្តឧត្តរមានជ័យ ព្រះវិហារ រតនគិរី មណ្ឌលគិរី ស្ទឹងត្រែង ក្រចេះ ត្បូងឃ្មុំ និងខេត្តកំពង់ចាម នឹងអាចមានភ្លៀងធ្លាក់ ពីបង្គួរទៅច្រើន។ ៣- តំបន់មាត់សមុទ្រ អាចមានភ្លៀងធ្លាក់ ពីបង្គួរទៅច្រើន និងនៅលើផ្ទៃសមុទ្រ នឹងអាចមានភ្លៀងធ្លាក់ច្រើន រួមជាមួយខ្យល់បក់បោកខ្លាំង និងរលកសមុទ្រខ្ពស់ៗ។
ជាមួយគ្នានេះ ក្រសួងធនធានទឹក និងឧតុនិយម បានអំពាវនាវដល់ ប្រជាពលរដ្ឋ ដែលរស់នៅក្នុងទីប្រជុំជន ទីទំនាបក្បែរផ្លូវទឹក ជាប់តំបន់ភ្នំ និងជួរភ្នំ និងប្រជានេសាទ និងអ្នកធ្វើដំណើរ តាមសមុទ្រទាំងអស់ សូមបង្កើនការយកចិត្តទុកដាក់ ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើង ជាយថាហេតុ។
ក្រសួងធនធានទឹក និងឧតុនិយម បាននិងកំពុងបន្តតាមដាន យ៉ាងយកចិត្តទុកដាក់ លើបាតុភូតធម្មជាតិនេះ ហើយនឹងជម្រាបជូនព័ត៌មាន ជាបន្តបន្ទាប់ទៀត ក្នុងករណ៍អាកាសធាតុ មានការប្រែប្រួល៕/V
