Home ព័ត៌មានជាតិ សេដ្ឋកិច្ច ស្ថានភាព​ជំនន...

ស្ថានភាព​ជំនន់​ទឹកភ្លៀង ធូរស្រាល​, តែ​ភ្លៀង នឹងមាន​ច្រើន​ថ្ងៃ​ទៀត​

** ភ្លៀង​រយៈពេល​ខ្លី ដល់​កម្រិត ១៤៣ មី​លី​ម៉ែត្រ ធ្វើឱ្យ​លិច​ផ្នែក​ខ្លះ ក្រុងព្រះសីហនុ​
ដោយៈ ប​.​ខុន / ភ្នំពេញៈ ស្ថានភាព​ជំនន់​ទឹកភ្លៀង បាន​ធូរស្រាល​បន្តិច​។ ទឹកស្ទឹង​ព្រែក​ត្នោត នៅ​ទ្វារ​ទឹក​រលាំង​ជ្រៃ បាន​ស្រក​ផុត​កម្ពស់ ត្រូវ​រក្សាទុក​ហើយ​។ បានន័យថា ជំនន់​ស្ទឹង​ព្រែក​ត្នោត នៅ​ភាគ​ខាងលើ បាន​ធូរស្រាល​ច្រើន តែ​ក៏​ដល់ពេល​ភ្លៀង​ធ្លាក់​ច្រើន​ជាថ្មី ក៏បាន​មកដល់​ដែរ បន្ទាប់ពី​សម្ពាធ​ទាប នៅលើ​ប្រទេស​កម្ពុជា បាន​បង្កើន​ឥទ្ធិពល ទៅជា​សម្ពាធ​ទាប​សកម្ម នៅ​ចុង​នៃ ប្រព័ន្ធ​សម្ពាធ​ទាប​។ នៅ​ថ្ងៃទី​១៦ ខែតុលា ភ្លៀង​បាន​ធ្លាក់​រហូត ដល់​កម្រិត ១៤៣ មី​លី​ម៉ែត្រ ក្នុង​រយៈពេល​ខ្លី លើ​ក្រុងព្រះសីហនុ​។​

​លោក វ៉ី សំណាង អភិបាលខេត្ត​កំពង់ស្ពឺ បាន​ប្រាប់​ឱ្យ​រស្មី​កម្ពុជា នៅ​ថ្ងៃទី​១៦ តុលា នេះ​ថាៈ ស្ថានភាព​ទឹកស្ទឹង​ព្រែក​ត្នោត នៅក្នុង​ខេត្តកំពង់ស្ពឺ បាន​ធូរស្រាល ច្រើន​ហើយ ដោយនៅ​ក្រុង​ច្បារមន ទឹកបាន​ស្រក​ចុះ ជិត​មួយ​ម៉ែត្រ​។ កន្លែង​ដែលមាន​លិចលង់ ទឹកបាន​ស្រក​ទៅវិញ​អស់ហើយ និង​នៅពេល​ពីរ បី​ថ្ងៃ មកនេះ នៅ​តំបន់​ផ្ទៃ​រងទឹក​ភ្លៀង ស្ទឹង​ព្រែក​ត្នោត មិនមាន​ភ្លៀង​ធ្លាក់ មក​ច្រើន​ទេ​។​

លោករដ្ឋមន្ត្រី លឹម គានហោ និងអ្នកជំនាញ បានចុះពិនិត្យស្ថានភាពជាក់ស្តែង ដើម្បីដោះស្រាយបញ្ហាប្រឈម

​ដោយឡែក មន្ត្រី​ប្រចាំការ នៅ​ទំនប់ ៧​មករា (​ផ្លូវជាតិ​លេខ​៣ ក្នុងភូមិ​សាស្ត្រ​ភ្នំពេញ​) បាន​ប្រាប់​ឱ្យដឹងថាៈ មកដល់​ត្រឹម​ម៉ោង ៣ រសៀល​ថ្ងៃនេះ (១៦​តុលា​) ទឹក​នៅ​ទ្វារ​ទឹក ៧​កម​រា ទឹកបាន​ស្រក​ចុះ ០,០៨ ម៉ែត្រ គិត​ចាប់តាំងពី​ពេលព្រឹក មកដល់ពេលនេះ​។​

​ទន្ទឹមនេះ នៅ​រសៀល​ថ្ងៃទី​១៦ ខែតុលា លោក លឹម គានហោ រដ្ឋមន្ត្រីក្រសួង​ធនធាន ទឹក និង​ឧតុនិយម ដែល​ប្រចាំការ ការពារ​ទំនប់​សណ្តរ​ស្ទឹង​ព្រែក​ត្នោត ជាច្រើន​ថ្ងៃ​មកហើយ បានរួម​ដំណើរ​ជាមួយ អភិបាលខេត្ត​កណ្តាល ពិនិត្យ​រក​ផ្លូវ​រំដោះ​ទឹក ឱ្យ​ស្រ​កបាន​លឿន នៅ​ប៉ែក​ខាងត្បូង ក្រុង​តាខ្មៅ​។​

​ចំណែក​លោក គួច ចំរើន អភិបាលខេត្ត​ព្រះសីហនុ ប្រាប់​ឱ្យ​រស្មី​កម្ពុជា នៅ​ថ្ងៃទី​១៦ តុលា នេះដែរ​ថាៈ ភ្លៀង​ដែល​បាន​ធ្លាក់ ដល់​កម្រិត ១៤៣ មី​លី​ម៉ែត្រ ចាប់តាំងពី​ព្រឹក មកដល់​រសៀល​ថ្ងៃនេះ បាន​បង្កឱ្យមាន​ការលិចលង់ តំបន់​មួយចំនួន នៅ​ក្រុងព្រះសីហនុ និង​ស្រុក​ព្រៃនប់ តែ​ទឹកបាន​ស្រក​ទៅវិញ​លឿន បន្ទាប់ពី​ភ្លៀង ចុះខ្សោយ​បន្តិច​។​

លោករដ្ឋមន្ត្រី លឹម គានហោ និងអ្នកជំនាញ បានចុះពិនិត្យស្ថានភាពជាក់ស្តែង ដើម្បីដោះស្រាយបញ្ហាប្រឈម

​រីឯ​លោក ហេង សោភ័ណ​រិ​ទ្ធ ប្រធាន​មន្ទីរ​ធនធានទឹក និង​ឧតុនិយម ខេត្ត​ព្រះសីហនុ បាន​ប្រាប់​ឱ្យ​រស្មី​កម្ពុជា នៅ​ថ្ងៃ​ដដែល​ថាៈ ភ្លៀង​ធ្លាក់​ច្រើន ក្នុង​រយៈពេល​ខ្លី បានធ្វើឱ្យ​មានការ​ជន់​លិច តំបន់​ទំនាប​មួយចំនួន នៅ​ក្រុងព្រះសីហនុ និង​ស្រុក​ព្រៃនប់ តែ​លំហូរ​ទឹក បាន​ស្រក​ចុះ​លឿន​។ នៅលើ​ផ្ទៃសមុទ្រ មាន​ខ្យល់​បក់ បោក​ខ្លាំង​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា ដឹង​នៅ​ថ្ងៃទី​១៦ តុលា ថាៈ ស្ថានភាព​ទឹកស្ទឹង ព្រែក​ត្នោ នៅ​ភាគ​ខាងលើ ក្នុង​ខេត្តកំពង់ស្ពឺ បាន​ធូរស្រាល​ច្រើន​ហើយ នៅថ្ងៃនេះ (១៦​តុលា​) ដូចជា នៅ​អាងទឹក​តា​សាល ទ្វារ​ទឹក ត្រូវបាន​បិទ​រក្សា​ទឹក​ទុក​។ មានទឹក ហូ​រលើ​ទំនប់​បង្ហៀរ នៅ​ពាម​ឃ្លៃ ទឹក​មាន​កម្ពស់ ៦ ម៉ែត្រ ទាប​ជាង​ថ្ងៃទី​១៥ តុលា ១,៤៥ ម៉ែត្រ​, នៅ​ទ្វារ​ទឹក​រលាំង​ជ្រៃ ទឹក​មាន​កម្ពស់ ៦,៨៨ ម៉ែត្រ ទាប​ជាង​ថ្ងៃទី​១៥ តុលា ០,៨០ ម៉ែត្រ (​កម្ពស់​ទឹក​រក្សាទុក ៧ ម៉ែត្រ​) ក៏បាន​ទម្លាក់​ទ្វារ ចុះ​ដែរ​។​

​អ្នកនាំពាក្យ​ដដែល បានឱ្យដឹង​ទៀតថាៈ សម្ពាធ​ទាប​មួយ នៅ​ខាងចុង​នៃ ប្រព័ន្ធ​សម្ពាធ​ទាប ដែល​ស្ថិតនៅលើ​ប្រទេស​កម្ពុជា បាន​បង្កើន​ឥទ្ធិពល ទៅជា​សម្ពាធ​ទាប​សកម្ម (ACTIVE LOW) ហើយ​រំកិល​ចូល ទៅក្នុង​សមុទ្រ​ចិន​ខាងត្បូង នៅ​ខាងកើត​ឆ្នេរ ប្រទេស​វៀតណាម ធ្វើឱ្យ​ផ្ទៃមេឃ មាន​សភាព​អាប់អួរ និង​មាន​ភ្លៀងរលឹម ធ្លាក់​រាយប៉ាយ​ច្រើន ក្នុង​ក្របខ័ណ្ឌ​ទូទាំងប្រទេស​។​

លោក គួច ចំរើន និងក្រុមមន្ត្រី បានចុះពិនិត្យស្ថានភាពទឹកជំនន់ទឹកភ្លៀង ដែលនាំឱ្យលិចលង់

​ឯ​វិ​សម្ពាធ ដែល​កំពុងមាន​ចលនា នៅក្នុង​សមុទ្រ​ចិន​ខាងត្បូង ត្រូវបាន​អ្នកនាំពាក្យ ខាងលើ បញ្ជាក់​យ៉ាងនេះ​ថាៈ វា​មិនបាន​វិ​វត្ត​ទៅជា​ព្យុះ​ទេ គឺ​នៅក្នុង​កម្រិត ជា​វិ​សម្ពាធ ដើរ​មករក​ឆ្នេរ ខាងក្រោម​ភាគ​កណ្តាល ប្រទេស​វៀតណាម រួច​នឹង​រំកិល​ឡើង ទៅរក​ឈូង​សមុទ្រ​តុងកឹង ដោយបាន​នាំទៅ​ជាមួយ នូវ​សម្ពាធ​ទាប​សកម្ម និង​ប្រព័ន្ធ​សម្ពាធ​ទាប ដែល​នៅ​ពីលើ​ប្រទេស​កម្ពុជា ច្រើន​ថ្ងៃ​មកហើយ ទៅជា​មួយ​ផង​។​

​លោក ចាន់ យុ​ត្ថា បានឱ្យដឹង​ទៀតថាៈ ស្ថានភាព​ដូចខាងលើ បានធ្វើ​ឱ្យនៅ​ថ្ងៃទី​១៦ តុលា មាន​សភាព​អាប់អួរ និង​មាន​ភ្លៀងរលឹម ធ្លាក់​រាយប៉ាយ ក្នុង​កម្រិត​ពី​មធ្យម បង្គួរ នៅក្នុង​ក្របខណ្ឌ ស្ទើរ​ទូទាំងប្រទេស​។ នៅ​ថ្ងៃទី​១៧ និង ១៨ តុលា មាន​ភ្លៀង​ធ្លាក់​ច្រើន នៅ​តំបន់​ខ្ពង់រាប ភាគ​ឦសាន ខ្ពង់រាប​ភាគ​ខាងជើង តំបន់​ទំនាប កណ្តាល​ភាគ​ពាយ័ព្យ និង​តំបន់​មាត់សមុទ្រ​។ ស្ថានភាព​អាកាសធាតុ ដូចនេះ ធ្វើឱ្យ​ទឹកទន្លេ​ងើបឡើង​បន្ត​ថែមទៀត​។​

​ចំពោះ​ស្ថានភាព​ទឹកទន្លេ​វិញ បើ​យោងតាម​ព្រឹ​តិ្ត​ប​ត្រ​ព័ត៌មាន និង​ព្យាករណ៍​កម្ពស់​ទឹក របស់​ក្រសួង​ធនធានទឹក និង​ឧតុនិយម ថ្ងៃទី​១៦ តុលា ២០២០ បានបង្ហាញ​ឱ្យឃើញថាៈ នៅ​ស្ទឹងត្រែង ទឹក​មាន​កម្ពស់ ៧,៤៨ ម៉ែត្រ ទាប​ជាង​ថ្ងៃទី​១៥ ខែតុលា ០,១២២ ម៉ែត្រ ខ្ពស់ជាង​កម្ពស់​ទឹក​មធ្យម​ច្រើន ឆ្នាំ ១,៣៩ ម៉ែត្រ ។ នៅ​ខេត្តក្រចេះ ទឹក​មាន​កម្ពស់ ១៧,២៨ ម៉ែត្រ ខ្ពស់ជាង​ថ្ងៃទី​១៥ ខែតុលា ០,១០ ម៉ែត្រ ខ្ពស់ជាង​កម្ពស់​ទឹក​មធ្យម ច្រើន​ឆ្នាំ ២,០៤​ម៉ែត្រ ។ នៅ​ខេត្តកំពង់ចាម ទឹក​មាន​កម្ពស់ ១១,១៣ ម៉ែត្រ ខ្ពស់ជាង​ថ្ងៃទី​១៥ ខែតុលា ០,២៦​ម៉ែត្រ ទាប​ជាង​កម្ពស់​ទឹក​មធ្យម ច្រើន​ឆ្នាំ ០,០៥ ម៉ែត្រ​។ នៅ​ចតុមុខ ទឹក​មាន​កម្ពស់ ៦,៧៦ ម៉ែត្រ ខ្ពស់ជាង​ថ្ងៃទី​១៥ ខែតុលា ០.២០ ម៉ែត្រ ទាប​ជាង​កម្ពស់​ទឹក​មធ្យម ច្រើន​ឆ្នាំ ២,០៤ ម៉ែត្រ ។ នៅ​បឹង​ទន្លេសាប ក្រគរ កំពង់​លួង ទឹក​មាន​កម្ពស់ ៤,៥១ ម៉ែត្រ ខ្ពស់ជាង ថ្ងៃទី​១៥ ខែតុលា ០,១៥ ម៉ែត្រ ៕/V

លោក គួច ចំរើន និងក្រុមមន្ត្រី បានចុះពិនិត្យស្ថានភាពទឹកជំនន់ទឹកភ្លៀង ដែលនាំឱ្យលិចលង់
ជំនន់ទឹកភ្លៀង បាននាំឱ្យលិចលង់ផ្ទះប្រជាពលរដ្ឋ
ជំនន់ទឹកភ្លៀង បាននាំឱ្យលិចលង់ផ្ទះប្រជាពលរដ្ឋ
លោក គួច ចំរើន និងក្រុមមន្ត្រី បានចុះពិនិត្យស្ថានភាពទឹកជំនន់ទឹកភ្លៀង ដែលនាំឱ្យលិចលង់

ទីតាំងផ្សាយពាណិជ្ជកម្ម

- Advertisment -

Most Popular