សម្តេច​សង្ឃៈ ញាតិ​ញោម​រងគ្រោះ​ដោយ​ទឹក​ជំ​នន់ ត្រូវ​ថែ​សុខភាព​ឱ្យ​បានល្អ និង កុំ​អស់សង្ឃឹម

ដោយៈ មេសា​/ភ្នំពេញៈ សម្តេច​ព្រះមហា​អរិយវង្ស បណ្ឌិត ឃី សុវណ្ណ​រតនា ព្រះចៅអធិការ​វត្ត មង្គល​វ័ន ហៅ វត្ត ស្វាយដង្គំ បានផ្តល់​ព្រះ​ឱវាទ​ដល់​អ្នករងគ្រោះ​ដោយ​ទឹកជំនន់​ថា “ គ្រោះទឹកជំនន់​ដ៏​គំហុក​នា​ឆ្នាំនេះ ធ្វើឱ្យ​ខូចខាត​បាត់បង់​ទ្រព្យសម្បត្តិ​គួរឱ្យ​សោកស្តាយ និង ប៉ះពាល់​ដល់​ភាពសុខសាន្ត ពិ​មែន ហើយ​អ្វីដែល​កើតឡើង ដោយ​មិនអាច​នឹកស្មាន​ដឹង​ជាមុន​បែបនេះ មិនមែន​ទើបតែ​មាន​លើក​ទី ១ ទេ ហេតុនេះ អ្វីដែល​សំខាន់ គឺ​ត្រូវតែ​រឹងមាំ កុំ​អស់សង្ឃឹម ត្រូវខិតខំ​គិតគូរ​យកចិត្តទុកដាក់​ថែរក្សា​សុវត្ថិភាព និង សុខភាព​ឱ្យបាន​ល្អ ដូចជា​ហូប​ស្អាត ផឹក​ស្អាត រស់នៅ​ស្អាត ទទួលទានដំណេក​ក្នុង​មុង និង ប្រុងប្រយ័ត្ន​កុំឱ្យ​មាន​គ្រោះថ្នាក់​ជាយថាហេតុ​ក្នុងពេល​កំពុង​ជម្លៀស​នៅ​ទីទួល​សុវត្ថិភាព​នេះ​ជាដើម ពោលគឺ​ត្រៀមខ្លួន​ឱ្យបាន​ល្អ ដើម្បី នឹង​ចាប់ផ្តើម កសាង​ជីវភាព​ឡើងវិញ នៅពេល​ទឹកជំនន់​កន្លងផុតទៅ ដូច​អ្វីដែល​ពាក្យចាស់​ពោលថា ខ្លួន​រស់ របស់​កើត “ ។


​សម្តេច​ព្រះមហា​អរិយវង្ស បណ្ឌិត ឃី សុវណ្ណ​រតនា ផ្តល់​ព្រះ​ឱវាទ​បែបនេះ នាឱកាស​នាំយក​អំណោយ​ទេយ្យទាន​ទៅ​ចែកជូន​ដល់​ជនរងគ្រោះ​ដោយ​ទឹកជំនន់​នៅ​ម្តុំ រង្វង់​មូល​កួរស្រូវ ក្នុង ខណ្ឌ ដង្កោ រាជធានី ភ្នំពេញ កាលពី​យប់​ថ្ងៃទី ១៦ ខែ តុលា ឆ្នាំ ២០២០ ហើយ​ទេយ្យទាន​ទាំងនោះ​មានដូចជា អង្ករ មី ត្រី ខ ទឹកត្រី ទឹក​ស៊ិ​អ៊ីវ ទឹកដោះគោ និង ថវិកា ជាដើម គិត​ជា​ទឹកប្រាក់​សរុប​ប្រមាណ​ជា ៨ ០០០ ដុល្លារ​អាមេរិក ជា​អ្វីដែល​សម្តេច បណ្ឌិត ឃី សុវណ្ណ​រតនា ឱ្យដឹងថា គឺជា​របស់​ដែល​បានមកពី​សប្បុរសជន ប្រគេន​ដល់​ព្រះសង្ឃ ហើយក៏​ជា​របស់​ដែល​កើត​ពី​ការ​សន្សំសំចៃ​សម្រាប់​ប្រើប្រាស់​នៅពេល​មាន​អាសន្ន​ដូចជា​ពេល​ទឹកជំនន់​នេះ​ជាដើម បន្ទាប់ពី​យក​មួយផ្នែក​សម្រាប់​ផ្គត់ផ្គង់​ព្រះសង្ឃ ដូនជី តាជី និង សិ​ស្សិ​និស្សិត នៅក្នុង​វត្ត​មង្គល​វ័ន ហៅ វត្ត ស្វា​ដង្គុំ មក ។​


​សម្តេច​បណ្ឌិត ឃី សុវណ្ណ​រតនា បន្ថែមថា ទោះជា​ញាតិ​ញោម​ជួប​គ្រោះទឹកជំនន់​ក្តី ក៏​ញាតិ​ញោម​មិន​ឯកោ ដែរ គឺមាន​អាជ្ញាធរ​គ្រប់លំដាប់​ថ្នាក់ ដោយ​រាប់​ចាប់តាំងពី​ប្រមុខ​រាជរដ្ឋាភិបាល រហូតដល់ ស្ថាប័ន​មនុស្សធម៌ ដូចជា​កាកបាទក្រហម​កម្ពុជា ជាដើម ហើយ​ក៏មាន​ព្រះសង្ឃ បានរួម​ចំណែក​ចូលរួម​រំលែក​ទុក្ខ​លបាក​របស់​ញាតិ​ញោម​ក្នុងនាម​ជា​ប្រជា​ជាតិខ្មែរ​តែមួយ ។​


​ជាការ​កត់សម្គាល់ នេះ​មិនមែនជា​លើក​ទី ១ ទេ ដែល​សម្តេច​បណ្ឌិត ឃី សុវណ្ណ​រតនា បាន​យក​អំណោយ​ទេយ្យទាន​ចែកជូន​ដល់​អ្នក​ដែល​កំពុង​ត្រូវការ​ចាំបាច់​បែបនេះ ពោលគឺ​គេ​បានឃើញ​ជា​ហូរហែ ជាពិសេស​នៅក្នុង​ដំណាក់​កាលដែល​ស​ង្គ​ម​មាន​បញ្ហា​ដូចជា​ពេល​ទឹកជំនន់ គ្រោះរាំងស្ងួត គ្រោះ​ខ្យល់​កន្ត្រាក់ និង ពេល​ប្រជាជន កម្ពុជា កំពុង​រំខាន​ដោយ​ជំងឺ​កូ​វីដ ១៩ ជាដើម ហើយ​សម្តេច​ក៏​តែងតែមាន​ព្រះបន្ទូល​ប្រហាក់ប្រហែលគ្នា​ថា របស់របរ​ទាំងនោះ បានមកពី​សប្បុរសជន ហើយក៏​ជា​របស់​ដែល​កើតចេញពី​ការ​សន្សំសំចៃ នៃ វត្ត មង្គល​វ័ន ហៅ វត្ត ស្វាយដង្គំ ដែរ ៕Kh

សម្តេច​ព្រះមហា​អរិយវង្ស បណ្ឌិត ឃី សុវណ្ណ​រតនា ប្រគល់​ទេយ្យទាន និង សំណេះសំណាល​ជាមួយ​ជនរងគ្រោះ​ដោយ​ទឹកជំនន់​នៅ​ម្តុំ រង្វង់​មូល​កួរស្រូវ ( រូបៈ មេសា​)

ទីតាំងផ្សាយពាណិជ្ជកម្ម

- Advertisment -

Most Popular