Home ព័ត៌មានជាតិ សន្តិសុខ ​បើករថយន្ត​យ៉...

​បើករថយន្ត​យ៉ាង​លឿន ទៅបុក​រថយន្ត​ធុន​ធំពីក្រោយ បណ្ដាល​ឲ្យ​ស្លាប់​ប្រពន្ធ​

ដោយៈ ចាន់តូ / ភ្នំពេញៈ ប្រពន្ធ​ស្លាប់ ប្តី​រងរបួស​ស្រាល បន្ទាប់ពី​បើករថយន្តយ៉ាង​លឿន ទៅបុក​ពីក្រោយ​រថយន្ត​ធុន​ធំ​ដឹក​ត្រីពេញទំហឹង នៅវេលា​ម៉ោង ៩​និង​១០​នាទី យប់​ថ្ងៃទី​១៦ ខែតុលា ឆ្នាំ​២០២០ ត្រង់ចំណុច​មុខកា​រ៉ា​ស​សាំង​តេ​លា នៅក្នុង​ភូមិ​ពោ​ធិ៏​មង្គល សង្កាត់​ព្រែក​ព្នៅ ខណ្ឌ​ព្រែក​ព្នៅ ។​

​ជនរងគ្រោះ​ទាំង​ប្តី​ប្រពន្ធ មិន​ត្រូវបាន​ស្គាល់​អត្តសញ្ញាណ ដោយ​បើករថយន្ត​ម៉ាក​តូយ៉ូតា ព្រូស ពណ៌​ទឹកប្រាក់ ពាក់​ផ្លាកលេខ ភ្នំពេញ 2AY.6657 ជិះ​តែ​ពីរ​នាក់ ។ ចំណែកឯ​រថយន្ត​ធុន​ធំ​ដឹក​ត្រី ម៉ាក​ហ៊ី​យាន់​ដាយ ក្បាល​ពណ៌​ក្រហម ពាក់​ផ្លាកលេខ ភ្នំពេញ 3F.0555 បើក​ដោយ​បុរស​ម្នាក់ ។​

​ប្រភពពី​កន្លែងកើតហេតុ បាន​ឲ្យ​ដឹងថាៈ ដំបូង​ឡើយ គេ​ឃើញរថយន្ត​ធុន​ធំ​ដឹក​ត្រី បើក​តាម​បណ្ដោយ​ផ្លូវជាតិ​លេខ​៥ ទិសដៅ​ពី​ខាងត្បូងទៅជើង ខណៈ​មកដល់​ចំណុចកើតហេតុខាងលើ ក៏​បត់​ឆ្វេង​ដៃ ហើយ​កំពុងតែ​បត់ ស្រាប់​តែមាន​រថយន្ត​ព្រូស បើក​តាម​បណ្ដោយផ្លូវជាតិ​លេខ​៥ ទិសដៅ​ពី​ខាងជើងមក​ខាងត្បូង យ៉ាង​លឿន បានមក​បុក​ពីក្រោយរថយន្ត​ធុន​ធំពេញទំហឹង លាន់​ដូច​រន្ទះ បណ្ដាល​ឲ្យ​ម្ចាស់ រថយន្ត​ព្រូសស្លាប់​ប្រពន្ធ ចំណែកឯ​ប្ដី រងរបួស​ស្រាល ហើយក៏​ស្រាប់​តែមាន​សាច់ញាតិ ខាង​រថយន្ដ​ព្រួស បានមក​លើក​សាកសព ដាក់​រថយន្ត​មួយគ្រឿង​ទៀត បើក​ចេញពី​កន្លែងកើតហេតុ ទៅខាង​ព្រែកលាប បាត់ស្រមោល​។​

​ក្រោយមក សមត្ថកិច្ច​ជំនាញ បាន​ចុះ​មកដល់ វាស់វែង ក៏​ស្រាប់​តែមាន​រថយន្ត​ព្រូស មួយគ្រឿង​ទៀត ពណ៌​ទឹកប្រាក់ មិនទាន់មាន​ផ្លាក​លេខ បើក​ដោយ​យុវជន​ម្នាក់ បាន​បើក​មកពី​ក្រោយបុក​រថយន្ត​ព្រូសបន្ថែមទៀត បានធ្វើឲ្យ​រថយន្ត​ក្រពឹតផ្នែក​ខាងមុខ និង រថយន្ត​ព្រូស រងគ្រោះ​ក្រពឹតផ្នែក​ខាងក្រោយ ខាងមុខ​មើល​លែង​យល់ ហើយក៏​ត្រូវបាន​សមត្ថ​កិច្ច ឃាត់ខ្លួន​នាំយកទៅ​ប៉ុស្តិ៍ ដើម្បី​ធ្វើការ​ណែនាំ​។​

​បន្ទាប់មក សមត្ថកិច្ច​ជំនាញ​ចរាចរណ៍​រាជធានី​ចុះមក​វាស់វែង ស្ទូច​យក​រថយន្ត​ព្រូស និង​រថយន្ត​ធុន​ធំ ទៅ​រក្សាទុក នៅ​ការិយាល័យ​ចរាចរណ៍ផ្លូវគោក នៃ​ស្នងការដ្ឋាន​នគរបាល រាជធានី​ភ្នំពេញ រង់ចាំ​ដោះស្រាយ​គ្នានៅពេល​ក្រោយ​៕​/V/Ha

រថយន្ត​ធុន​ធំ​ដឹក​ត្រី ម៉ាក​ហ៊ី​យាន់​ដាយ ក្បាល​ពណ៌​ក្រហម ពាក់​ផ្លាកលេខ ភ្នំពេញ 3F.0555
រថយន្ត​ម៉ាក​តូយ៉ូតា ព្រូស ពណ៌​ទឹកប្រាក់ ពាក់​ផ្លាកលេខ ភ្នំពេញ 2AY.6657
រថយន្ត​ព្រូស ពណ៌​ទឹកប្រាក់ ដែលបាន​បើក​បុក ​រថយន្ត​ព្រូសពាក់​ផ្លាកលេខ ភ្នំពេញ 2AY.6657 បន្ថែមទៀត

ទីតាំងផ្សាយពាណិជ្ជកម្ម

- Advertisment -

Most Popular