ទីប្រឹក្សា​សន្តិសុខ​ជាតិ​របស់ ដូ​ណា​ល់ ត្រាំ​ជំរុញ​កោះ​តៃវ៉ាន់​ឱ្យ​ពង្រឹងកម្លាំង​ការពារ​ខ្លួន​ប្រឆាំង​ការវាយប្រហារ​របស់​ចិន​

263
ចែករម្លែក

​មន្ត្រីជាន់ខ្ពស់​សេត​វិមាន​ម្នាក់​កាលពី​ថ្ងៃ​សុក្រ​ទី​១៦​តុលា ​បាន​ជំរុញ​កោះ​តៃវ៉ាន់​ឱ្យ​បង្កើន​សមត្ថភាព​យោធា​របស់​ខ្លួន​ដើម្បី​ការពារ​ប្រឆាំង​ការវាយលុក​ដែល​អាច​កើត​មាន​ចេញពី​ប្រទេស​ចិន​ ដោយ​និយាយ​​ថ រដ្ឋាភិបាល​ក្រុង​ប៉េកាំង​នឹង​មាន​សមត្ថភាព​នោះ​ក្នុង​រយៈពេល​ពី ១០ ទៅ ១៥ ឆ្នាំ​ទៀត​។​នេះ​បើ​យោង​តាម​វេបសាយ​dailymail​។​

​លោក រ៉ូ​ប៊ឺត អូ​ប្រាយ​អិន ទីប្រឹក្សា​សន្តិសុខ​ជាតិ​របស់ ប្រធានាធិបតី ដូ​ណា​ល់ ត្រាំ​បាន​និយាយ​នៅ​វេទិកា​សន្តិសុខ​ក្រុង​Aspen (Aspen Security Forum) ថា​ការវាយ ប្រហារ​ដោយ​មី​ស៊ី​លពី​ប្រទេស​ចិន​​ដែល​ចាត់ទុក​កោះ​តៃវ៉ាន់​ជា​ខេត្ត​បះបោរ​នោះ នឹង​ជា​ការបំផ្លិចបំផ្លាញ​ដ៏​ខ្លាំង​។​

​លោក​បាន​និយាយថា​ ការវាយប្រហារ​តាម​ជើងគោក​និង​ជើង​ទឹក​គឺជា​លទ្ធភាព​មួយ​ទោះបីជា​នៅ​ពេល​នេះ វា​ហួស​ពី​សមត្ថភាព​របស់​ចិន​ក៏ដោយ​។​

​លោក រ៉ូ​ប៊ឺត អូ​ប្រាយ​អិន បាន​និយាយថា ” ប៉ុន្តែ​ចិន​អាច​រួមបញ្ចូល​ការគំរាមកំហែង​នោះ​ជាមួយ​ប្រតិបត្តិការ​តំបន់ ហ៊ុមព័ទ្ធ​សេដ្ឋកិច្ច ការយាយី​និង​សកម្មភាព​ផ្សេង​ទៀត​ដើម្បី​បំភិតបំភ័យ​កោះ​តៃវ៉ាន់​​ប្រសិនបើ រដ្ឋាភិបាល​ក្រុង​តៃប៉ិ មិនបង្កើត​ការការពារ​របស់ខ្លួន​នោះទេ​”​។​

​លោក​បាន​និយាយ​” អ្វី​ដែល​យើង​បាន​ប្រាប់​មិត្តភក្តិ​តៃវ៉ាន់​របស់​យើង គឺ​ត្រូវ​ដឹង​រឿង​ទាំងអស់នេះ ។ មិន​ថា​មាន​ឬ​មិន​មាន​ការវាយប្រហា​រទាំ​ង​ជើងគោក​និង​ជើង​ទឹក ការវាយប្រហារ​ដោយ​មី​ស៊ី​ល និង​ប្រតិ​​បត្តិការ​តំបន់​យ៉ាងណា​នោះ​ទេ ពួកគេ​ពិតជា​ត្រូវ​ពង្រឹង​សមត្ថភាព​ការពារ​ខ្លួន​”​។​

​សូមបញ្ជាក់​ថា ចិន​បាន​បង្កើន​សម្ពាធ​ប្រឆាំង​កោះ​តៃវ៉ាន់​ក្នុង​រយៈពេល​មួយ​ឆ្នាំ​កន្លងមកនេះ​ដោយ​បាន​បញ្ជូន​យន្តហោះ​ចម្បាំង​និង​ស៊ើបការណ៍​ច្រើន​គ្រឿង​ទៅ​ក្នុង​ដែនអាកាស​និង​នាវា​ជាច្រើន​គ្រឿង​​នៅក្បែរ​ដែនទឹក​របស់​ខ្លួន​។​

​កាលពីដើម​សប្តាហ៍​នេះ រដ្ឋាភិបាល​ក្រុង​ប៉េកាំ​ង​បាន​បញ្ចេញ​វីដេអូ​អំពី​សមយុទ្ធ​យោធា​មួយ​ដែល​ធ្វើ​ដូច​ជា​ការ​វាយ​លុយ​ពិតៗ ដោយ​បង្ហាញ​ពី​មី​ស៊ី​ល និង​ការចុះ​ចត​នៃ​យន្តហោះ ទាំង​ជើងគោក​និង​​ទឹក​នៅ​ក្នុងការ​ធ្វើ​សមយុទ្ធ​នោះ​។​

​ជាមួយគ្នា​នោះ​ដែរ របាយការណ៍​ព័ត៌មាន​បាន​និយាយ​ថា​កោះ​តៃវ៉ាន់​ជិត​នឹង​ទិញ​ប្រព័ន្ធ​មី​ស៊ី​លពី​សហរដ្ឋ​អាម៉េរិក​។​

​អស់​រយៈពេល​ជាច្រើន​ទសវត្សរ៍​មក​នេះ​សន្តិសុខ​តៃវ៉ាន់​បាន​ពឹងផ្អែក​មួយ​ផ្នែក​លើ​ទំនាក់ទំនង​ជិតស្និទ្ធ​ជាមួយ​សហរដ្ឋ​អាម៉េរិក​។​ប៉ុន្តែ​តែងតែ​មាន​ភាពស្រពេចស្រពិល​ថា​តើ​រដ្ឋាភិបាល​ក្រុង​វ៉ាស៊ីនតោន​នឹង​ធ្វើ​អន្តរាគមន៍​​ការពារ​តៃវ៉ាន់​ដែរឬទេ ប្រសិនបើ​ចិន​វាយប្រហារ ៕​ប្រែ​សម្រួល​៖​សុខា​/sn/Ha

​ប្រធានាធិបតី​តៃវ៉ាន់ លោកស្រី​សាយ អ៊ីង​វិន ថ្លែង​សុន្ទរកថា​នៅ​ពីមុខ​យន្តហោះ​ចម្បាំង F-CK-1​ក្នុងអំឡុង​ធ្វើ​ទស្សនកិច្ច​នៅ​មូលដ្ឋាន​ទ័ពអាកាស​នៅ​ទីក្រុង​Penghu​កោះ​តៃវ៉ាន់ កាលពី​ខែ​កញ្ញា​ឆ្នាំ​២០២០

ទីតាំងផ្សាយពាណិជ្ជកម្ម