រដ្ឋមន្ត្រីការបរទេស​៖ ចិន​នឹង​ជួយ​អោយ​ប្រទេស​កាន់តែ​ច្រើន​ទទួលបាន​វ៉ាក់សាំង​កូវី​ដ​១៩

212
ចែករម្លែក

​រដ្ឋមន្ត្រីការបរទេស​ចិន លោក​វ៉ាង យី បាន​និយាយ​កាលពី​ថ្ងៃ​សុក្រ​ទី​១៦​តុលា​ថា ចិន​បាន​បញ្ជាក់​ច្បាស់​ហើយ​ថា​ខ្លួន​នឹង​ខិតខំ​ផលិត​វ៉ាក់សាំង​តាម​សមត្ថភាព​របស់​ខ្លួន​និង​ផ្តល់​អាទិភាព​លើ​តំរូវការ​វា​ពី​បណ្តា​ប្រទេស​កំពុងអភិវឌ្ឍន៍ រួម​មាន​បណ្តា​ប្រទេស​នៅក្នុង​សមាគម​អាស៊ាន ។​

​រដ្ឋមន្ត្រីការបរទេស​ចិន លោក​វ៉ាង យី

​លោក​វ៉ាង បាន​និយាយ​ដូច្នេះ​នៅក្នុង​កិច្ចសម្ភាសន៍​ផ្តាច់មុខ​មួយ​ជាមួយ​ទីភ្នាក់ងារ​សារព័ត៌មាន​ស៊ីន​ហួរ​របស់​ចិន បន្ទាប់ពី​លោក​បាន​ធ្វើ​កិច្ចពិភាក្សា​កាលពី​សប្តាហ៍​មុន​ជាមួយ​តំណាង​ប្រធានាធិបតី​ឥណ្ឌូនេស៊ី និង​រដ្ឋមន្ត្រី​ការបរទេស​ហ្វីលីពីន នៅក្នុង​ខេត្ត​យុន​ណាន ក្រោពី​លោក​បាន​បញ្ចប់​ដំណើរ​ទស្សនកិច្ច​កាលពី​ថ្ងៃ​សុក្រ​សប្តាហ៍​មុន​នៅ​អាស៊ីអាគ្នេយ៍ ដែល​បាន​នាំ​រូបលោក​មក​កាន់​ប្រទេស​កម្ពុជា ម៉ាឡេស៊ី ឡាវ ថៃ​និង​សិង្ហ​បុរី​។​

​នៅពេល​និយាយ​អំពី​ថា​តើ​ចិន​នឹង​បំពេញ​ការសន្យា​របស់​ខ្លួន​យ៉ាងណា​ដើម្បី​ធ្វើអោយ​វ៉ាក់សាំង​របស់ខ្លួន​ក្លាយ​ជា​ផលប្រយោជន៍​សកល​មួយ លោក​វ៉ាង​បាន​និយាយថា វីរុស​នេះ​មិន​ស្គាល់​ព្រំដែន​ទេ និង​ទាល់តែ​ប្រទេស​ទាំងអស់​កំចាត់​ចោល​អស់​ជំងឺឆ្លង​នេះ ទើប​ការប្រយុទ្ធ​ប្រឆាំង​របស់​ពិភពលោក​ប្រឆាំង​នឹង​ជំងឺ​កូវី​ដ​១៩​នេះ​ទទួលបាន​ជោគជ័យ​។​«​វ៉ាក់សាំង​ជា​សព្វាវុធ​ខ្លាំង​បំផុត​»​ដើម្បី​បង្ក្រាប​វា​។​

​លោក​បាន​បន្ថែមថា អំពី​បញ្ហា​ពាក់ព័ន្ធ​នឹង​អាយុជីវិត​និង​សុខភាព​មនុស្ស សហគមន៍​អន្តរជាតិ​គួរ​សហការគ្នា ដោយ​«​យើង​មិន​អាច​ប្រយុទ្ធ​ប្រឆាំង​វា​តែឯង …»​។​

​ដោយ​កត់សំគាល់ថា​ចិន​ជា​អ្នក​ឈាន​មុខ​គេ​មួយ​នៅក្នុង​ការផលិត​វ៉ាក់សាំង លោក​រដ្ឋមន្ត្រី​បាន​និយាយ​ថា​ចិន​បាន​ចែករំលែក​សំណុំ​ហ្សែ​ន​វីរុស​នេះ​ជាមួយ​អង្គការ​សុខភាព​ពិភពលោក​ទាន់​ពេល​នៅ​ដំណាក់កាល​ដំបូង​នៃ​ការផ្ទុះ​ជំងឺ ដោយ​បង្កើត​បាន​លក្ខខណ្ឌ​ចាំបាច់​សំរាប់​ការផលិត​វ៉ាក់សាំង​សកល​។​ចិន​មាន​បំណង​បំពេញ​ការសន្យា​តាំងចិត្ត​របស់ខ្លួន ដើម្បី​ធ្វើអោយ​វ៉ាក់សាំង​ចិន​ក្លាយ​ជា​ផលិតផល​សាធារណៈ​សកល​មួយ នៅ​ពេល​ខ្លួន​ផលិត​បាន​វា​ដោយ​ជោគជ័យ​និង​ដាក់​ប្រើ​វា​ជាទូទៅ ហើយ​ថែមទាំង​ចូលរួម​ចែកចាយ​វា​សំរាប់​បណ្តា​ប្រទេស​កំពុង​អភិវឌ្ឍន៍​ប្រើប្រាស់​វា​ថែម​ទៀត​៕​ប្រែ​សម្រួល​៖​វាសនា​

ទីតាំងផ្សាយពាណិជ្ជកម្ម