ដោយៈ បូកគោ / កំពតៈ ដោយចាប់ផ្តើមពីទ្រង់ទ្រាយតូច រហូតពង្រីកបាន លើទំហំផ្ទៃដី ៨ ហិកតា កសិដ្ឋានបូកគោ ស្ថិតនៅលើកំពូលភ្នំបូកគោ ដែលមានកម្ពស់ ១.០៧៧ ម៉ែត្រ កំពុងបង្កើនទិន្នផល បន្លែសរីរាង្គ ប្រមាណ ៤០ ប្រភេទ ដើម្បីផ្គត់ផ្គង់តម្រូវការទីផ្សារ។
លោក មុំ ដែន អ្នកគ្រប់គ្រងកសិដ្ឋាន បន្លែសរីរាង្គបូកគោ បានរៀបរាប់ថាៈ រហូត មកដល់បច្ចុប្បន្ន កសិដ្ឋានបូកគោ បានដាំដុះបន្លែសរីរាង្គ ប្រភេទស្លឹក និងផ្លែ ចំនួន ៤០ មុខ លើផ្ទៃដី ៨ ហិកតា។ កសិដ្ឋាន នឹងបន្តពង្រីកទំហំ នៃការផលិតបន្ថែមទៀត ដើម្បីឆ្លើយតបតម្រូវការ បញ្ជាទិញពីបណ្តាទីផ្សារនានា នៅទូទាំងប្រទេស។
អ្នកគ្រប់គ្រង បានបន្តថាៈ ដំបូងឡើយ ការដាំដុះបន្លែ នៅទីនេះ សម្រាប់ផ្គត់ផ្គង់ក្រុមហ៊ុន សុខាអូតែល និងភ្ញៀវ ដែលមកកម្សាន្ត រមណីយដ្ឋាន ឋានសួគ៌បូកគោប៉ុណ្ណោះ។ ប៉ុន្តែតាមរយៈការផ្សព្វផ្សាយបន្ត របស់ភ្ញៀវ ស្តីអំពីគុណភាព និងរសជាតិ នៃបន្លែសរីរាង្គនេះ ទើបមានការសុំបញ្ជាទិញ ពីហាងទំនើបៗ មួយចំនួន ពិសេសក្នុងរាជធានីភ្នំពេញ។ សព្វថ្ងៃ ទិន្នផល ដែលផលិតបាន មានត្រឹមចន្លោះ ពីមួយតោនកន្លះ ទៅពីរតោន ហើយតទៅ កសិដ្ឋាន នឹងបង្កើនបរិមាណ រហូតដល់ ១០ តោន ក្នុងមួយថ្ងៃ។
ទាក់ទិននឹងកិច្ចការងារ ផលិតវិញ លោក មុំ ដែន បានបញ្ជាក់ថាៈ ការដាំដុះបន្លែ នៅកសិដ្ឋានបូកគោ មានភាពប្រឈមខ្លះៗ ក្នុងខែវស្សា ដោយសារខ្វះពន្លឺ គ្រប់គ្រាន់ ព្រោះសំណើមខ្លាំង បង្កជាផ្សិត លើបន្លែមួយចំនួន ដែលតម្រូវឱ្យដកដំណាំទាំងនោះ យកទៅកប់ចោល។ សម្រាប់សត្វល្អិត មិនមានអ្វីចោទទេ ព្រោះការដាំដុះ ធ្វើឡើងក្នុងរោង បិទបាំងជិតល្អ។
អ្នកគ្រប់គ្រងដដែល បានបញ្ជាក់ថាៈ អាយុកាល នៃការទទួលផល គឺ ៧៥ ថ្ងៃ អាស្រ័យលើប្រភេទដំណាំ ដូចជា បន្លែស្លឹកខ្លះ ត្រឹមរយៈពេល ៤០ ថ្ងៃ។ ស្ពៃក្តោប ចន្លោះពីទៅ ៨០ ថ្ងៃ ប៉េងប៉ោះ ត្រប់ ក៏ដូចជា បន្លែយកផ្លែផ្សេងៗទៀត មានរយៈពេលខុសៗគ្នា ទៅតាមប្រភេទដំណាំ។ យ៉ាងណាក៏ដោយ ទិន្នផល នៅតែទទួលបានរាល់ថ្ងៃ ជាមួយនឹងការងារវិលជុំ ព្រោះក្នុងកសិដ្ឋាន បន្លែសរីរាង្គទាំងមូល មានបុគ្គលិក កម្មករ រហូតដល់ ៧៥ នាក់៕/V
