ដោយ: គ្រញូង / បាត់ដំបង: កាលពីព្រឹកនិងរសៀលថ្ងៃទី១៨ខែតុលាឆ្នាំ២០២០ លោក ងិន ឃន អ្នកតំណាងរាស្ត្រ និងជាប្រធានក្រុមការងារចុះជួយក្រុងបាត់ដំបង លោកស្រី លី គឹមលៀង អ្នកតំណាងរាស្ត្រមណ្ឌលបាត់ដំបង អមដំណើរដោយលោក ផេង សិទ្ធី អភិបាលក្រុងបាត់ដំបង រួមនិងក្រុមការងារបាននាំយកអំណោយមនុស្សធម៌ មកចែកជូនប្រជាពលរដ្ឋរងគ្រោះដោយជំនន់ទឹកភ្លៀង លិចផ្ទះសម្បែងចំនួន២០០គ្រូសារ នៅលើទីទួលសុវត្ថិភាព នៃសង្កាត់អូរម៉ាល់ និងសង្កាត់វត្តគរ ក្រុងបាត់ដំបង។
ក្នុងឪកាសនោះ លោក ងិន ឃន ប្រធានក្រុមការងារចុះជួយក្រុងបាត់ដំបង បានពាំនាំប្រសាសន័ផ្តាំផ្ញើសាកសុខទុក្ខរបស់សម្តេចតេជោ ហ៊ុន សែន ប្រធានគណបក្រប្រជាជនកម្ពុជា និងសម្តេចក្រឡាហោម ស ខេង ប្រធានក្រុមការងារចុះជូយខេត្តបាត់ដំបង និងជាអនុប្រធានគណបក្សប្រជាជនកម្ពុជា ជូនចំពោះបងប្អូនប្រជាពលរដ្ឋដែលរងគ្រោះដោយទឹកជំនន់ទាំងអស់ដោយក្តីនឹករលឹក និងចូលរួមសោកស្តាយចំពោះការលិចលង់ផ្ទះសម្បែងគ្មានទីកន្លែងស្នាក់នៅ ដោយប្រមូលផ្តុំគ្នាមករស់នៅក្រោមដំបូលតង់គួរឲ្យអាណិតអាសូរ។
លោកតំណាងរាស្ត្របានបញ្ជាក់ថា អំណោយដែលត្រូវចែកប្រជាពលរដ្ឋរងគ្រោះទាំង២០០គ្រួសារទាំង២សង្កាត់នេះ គឺក្នុងមួយគ្រួសារទទួលបានអង្ករ១០គីឡូក្រាម មី៦កញ្ចប់ ទឹកត្រី១យួរ(៦ដប) ត្រី២កំប៉ុង នំបុ័ង ទឹកសុទ្ធរបស់សម្តេចតេជោ២ដប និងថវិកា១ម៉ឺនរៀល ព្រមទាំងចែកជូនក្មេងៗជិត១០០នាក់ ក្នុងម្នាក់ៗ១ពាន់រៀល។ ក្រៅពីនេះ លោក ងិន ឃន នូវបានជួយអំពូលសូឡាចំនួនបួនគ្រឿង សម្រាប់ជនរងគ្រោះបំភ្លឺពេលយប់។
បន្តមក ប្រតិភូបានដើរមើលស្ថានភាពទឹកស្ទឹងសង្កែ ហើយបានជួយកាយដីលូ៤កង់តម្លៃ៤០ដុល្លារ ដើម្បីរំដោះទឹកជំនន់លិចផ្ទះប្រជាពលរដ្ឋនៅសង្កាត់វត្តគរ៕ ល
