​រដ្ឋមន្ត្រី​សុខាភិបាល និង​ប្រធាន WHO ប្រចាំ​កម្ពុជា ទៅពិនិត្យ​គ្រោះមហន្តរាយ ទឹកជំនន់ លិច​មន្ទីរពេទ្យ​ស្រុក​ថ្មពួក​

149
ចែករម្លែក

ដោយៈ ភ្នំ​ស្វាយ / បន្ទាយ​មាន​ជ័​យៈ រដ្ឋមន្ត្រី​ក្រសួងសុខាភិបាល និង​ប្រធាន​អង្គការ សុខភាព​ពិភពលោក ( WHO ) ប្រចាំ​ក​ម្ព​ជា ទៅពិនិត្យ​គ្រោះមហន្តរាយ ទឹកជំនន់​ទឹកភ្លៀងលិច​មន្ទីរ​ពេទ្យ​បង្អែកស្រុក​ថ្មពួក ការិយាល័យ​ស្រុក​ប្រតិបត្តិ​ស្រុក​ថ្មពួក មណ្ឌល​សុខភាព​គំរូ នៅ​ឃុំ និង​ស្រុក​ថ្មពួក ។​

​លោក​សាស្ត្រាចារ្យ វេជ្ជបណ្ឌិត ម៉ម ប៊ុនហេង រដ្ឋមន្ត្រី​ក្រសួងសុខាភិបាល លោកស្រី ឱ វណ្ណឌី​ន រដ្ឋលេខាធិការ ក្រសួងសុខាភិបាល លោកស្រី លី អាយ​លីន ប្រធាន​អង្គការ​សុខភាព​ពិភពលោក ( WHO ) ប្រចាំ​កម្ពុជា និង​ប្រតិភូ បាន​ទៅពិនិត្យ វាយតម្លៃ​បន្ទាន់ ពី​ផលប៉ះពាល់ និង​ខូចខាត​សម្ភារ បរិក្ខារ ឱសថ អគារ​នៃ​ការិយាល័យ​សុខាភិបាល មន្ទីរពេទ្យ​ស្រុក មណ្ឌល​សុខភាព​ឃុំ នៅ​ថ្ងៃទី​១៨ ខែតុលា ឆ្នាំ​២០២០ ។​

​លោក​វេជ្ជបណ្ឌិត ឡេ ច័ន្ទ​សង្វាត ប្រធាន​មន្ទីរ​សុខាភិបាល ខេត្តបន្ទាយមានជ័យ លោក​វេជ្ជបណ្ឌិត រឿន សុធី ប្រធានការិយាល័យ​បច្ចេកទេស នៃ​មន្ទីរ​សុខាភិបាល ខេត្តបន្ទាយមានជ័យ បាន​ប្រាប់​កាសែត រស្មី​កម្ពុជា​ថាៈ ជំនន់​ទឹកភ្លៀង ដូច​ផ្លេកបន្ទោរ ពី​ស្ទឹង​ថ្មពួក បាន​កើតឡើង​ភ្លាមៗ ពី​ម៉ោងជាង ៧ យប់​ថ្ងៃទី​១៧ តុលា ហើយ​បាន​ហូរ​បុក​គំហុក ចូល​ពន្លិច​អង្គភាពខាងលើ ។​

​លោក​វេជ្ជបណ្ឌិត ឡេ ច័ន្ទ​សង្វាត បានបញ្ជាក់​ថាៈ ចំពោះមុខ មន្ត្រី​សុខាភិបាល គ្រូពេទ្យ កងកម្លាំង​ចម្រុះ បាន​ជម្លៀស​អ្នកជំងឺ​មុន បន្ទាប់មក បាន​ព្យាយាម​ដឹកជញ្ជូន សម្ភារ បរិក្ខារ​ចេញ ក៏ប៉ុន្តែ​ការសង្គ្រោះ ធ្វើបាន​តិចតួច​ប៉ុណ្ណោះ ។ បណ្តាញ​អគ្គិសនី ត្រូវ​កាត់ផ្តាច់​សិន ។ មន្ត្រី​សុខាភិបាល និង​គ្រូពេទ្យ បានដាក់​ទីតាំង​គ្រូពេទ្យ​ចល័ត នៅមុខ​មន្ទីរពេទ្យ ដើម្បី​បន្ត​ប្រតិបត្តិការអន្តរាគមន៍​សង្គ្រោះ និង​បញ្ជូនទៅ​ព្យាបាល​ពលរដ្ឋ ដែលមាន​ជំងឺ ឬ​បញ្ហា​សុខភាព ។ គ្រឿង​អេឡិចត្រូនិក ដែលជា​បរិក្ខារ ត្រួតពិនិត្យ​សុខភាព មាន​លិចលង់​ជាមួយ​គ្រែ ឧបករណ៍ សម្ភារ​នានា ។ ក្នុងនោះ​សំខាន់ៗ មាន ម៉ាស៊ីន​ថត​ឆ្លុះ​អេកូ កុំ​ព្យួ​ទ័​រ ទូ​វ៉ាក់សាំង ទូ​ឯកសារ ឱសថ និង​បរិក្ខារ​ពេទ្យ មានតម្លៃ ជាច្រើន​ម៉ឺន​ដុល្លារ​អាម៉េរិក​។​

លោក​សាស្ត្រាចារ្យ វេជ្ជបណ្ឌិត ម៉ម ប៊ុនហេង

​លោក​សាស្ត្រាចារ្យ វេជ្ជបណ្ឌិត ម៉ម ប៊ុនហេង បាន​ប្រាប់​អ្នកសារព័ត៌មាន​ថាៈ បេស​កកម្ម​បន្ទាន់ របស់លោក និង​ប្រតិភូ ដើម្បី​ពិនិត្យ វាយតម្លៃ ផលប៉ះពាល់ និង​ការខូចខាត ដើម្បី​ត្រៀម​ស្តារឡើងវិញក្រោយ​ទឹក​ស្រក ។​

​លោក​រដ្ឋមន្ត្រី​ក្រសួងសុខាភិបាល បាន​សម្ដែង​នូវ​ការសោកស្តាយ ចំពោះ​គ្រោះទឹកជំនន់​នេះ ហើយ​បាន​ណែនាំ មន្ទីរ​សុខាភិបាល​ខេត្ត ចាត់ចែង​បន្ត ឲ្យ​មាន​ក្រុមគ្រូពេទ្យ​ចល័ត និង​ប្រចាំការ បន្ត​ការយកចិត្តទុកដាក់ ផ្តល់​សេវា​សុខភាព ជូន​បងប្អូន​ប្រជាពលរដ្ឋ និង​ណែនាំ​ឲ្យ​រៀបចំ​ផែនការសម្រាប់​រៀបចំ​ឡើងវិញ នូវ​ការខូចខាត​ទាំង​ប៉ុន្មាន ក្រោយពេល​ទឹក​ស្រក​ទៅវិញ ។​

ប្រតិភូក្រសួងសុខាភិបាល ចុះពិនិត្យ វាយតម្លៃ ផលប៉ះពាល់ និង​ការខូចខាត ដើម្បី​ត្រៀម​ស្តារឡើងវិញ នូវមន្ទីរពេទ្យបង្អែកស្រុកថ្មពួក ក្រោយពេល​ទឹក​ស្រក

​ទន្ទឹមនឹងនេះ លោក​រដ្ឋមន្ត្រី​ក្រសួងសុខាភិបាល បាន​អំពាវនាវ ឲ្យ​បងប្អូន​ប្រជា​ល​រដ្ឋ មានការ​ប្រុងប្រយ័ត្ន រក្សា​អនាម័យ​ដៃ និង​ខ្លួនប្រាណ ឲ្យ​បាន​ជាប់​ជាប្រចាំ អនាម័យ​ចំណីអាហារ ពិសេស​ត្រូវ​ប្រើប្រាស់​ទឹកស្អាត ពិសា​ទឹក​ដាំ​ពុះ ដើម្បី​ចៀសវាង​ជំងឺ​រាករូស រាក​មួល ឬពុល​ចំណីអាហារ ប្រយ័ត្ន​ពស់​ចឹក និង​សត្វ​អាសិរពិស ទិច ឬ​ខាំ ការពារ​កូនចៅ ក្រែង​លង់ទឹក និង​ការពារ​ជំងឺឆ្លង ដូចជា​គ្រុន​ផ្តាសាយធំ គ្រុន​ឈី​ក គ្រុនឈាម គ្រុនចាញ់ ជំងឺ​រលាក​ផ្លូវដង្ហើម ជំងឺ​កូ​វីដ​-១៩ ជំងឺ​រលាក​បំពង់ក កមរមាស់​ជាដើម ។

​ក្រោយពី​បាន​ពិនិត្យ​ការងារ​រួច លោក​រដ្ឋមន្ត្រី​ក្រសួងសុខាភិបាល ក៏បាន​ចែក​មុង នៅ​ទីទួល​សុវត្ថិភាព នៅ​ស្រុក​មង្គល​បូរី ចំនួន ២០០ គ្រួសារ​ផងដែរ ៕/V/Ha

អ្នកជំងឺ បានត្រូវជម្លៀសចេញ ពីមន្ទីរពេទ្យបង្អែកស្រុកថ្មពួក ដែលរងគ្រោះដោយទឹកជំនន់

ទីតាំងផ្សាយពាណិជ្ជកម្ម