ពេទ្យធ្មេញ ដែល​បង្ក​គ្រោះថ្នាក់​ចរាចរណ៍ ត្រូវបាន​តុលាការ ឃុំខ្លួន​

180
ចែករម្លែក

ដោយៈ ស​រិ​ទ្ធ / ភ្នំពេញៈ នៅ​ព្រលប់ ថ្ងៃទី​១៨ ខែតុលា ឆ្នាំ​២០២០ នេះ តុលាការ បានសម្រេច​ឃុំខ្លួន ពេទ្យធ្មេញ ដែល​បង្ក​គ្រោះថ្នាក់​ចរាចរណ៍ បណ្តាលឱ្យ​មនុស្ស​ម្នាក់ ស្លាប់ និង​ម្នាក់ទៀត រងរបួស​។ ការសម្រេច​នេះ បានធ្វើ​ឡើង បន្ទាប់ពី​លោក សឿ ឡង់ឌី ព្រះរាជអាជ្ញារង អម​សាលាដំបូង រាជធានី​ភ្នំពេញ ចោទប្រកាន់​ពេទ្យធ្មេញ រូបនេះ ពីបទ «​ឃាតកម្ម​» តាម​មាត្រា ១៩៩ នៃ​ក្រមព្រហ្មទណ្ឌ ពាក់ព័ន្ធ​ការបើក​ឡាន បុក​ម៉ូតូ​មួយគ្រឿង ហើយ​ថែមទាំង​ថយ កិន​បន្ថែមទៀត រហូតដល់​ជនរងគ្រោះ ស្លាប់​យ៉ាង​អាណោចអាធ័ម ។​

ជនបង្ក​ឈ្មោះ យ៉ាន់ ណា​លី​ណា នាំទៅកាន់តុលាការរាជធានីភ្នំពេញ

​បទ «​ឃាតកម្ម​» ចែងថា «​អំពើ​សម្លាប់​មនុស្ស ដោយ​ចេតនា ដោយ​ប្រើ​អាវុធ ឬ មិន​ប្រើ​អាវុធ ដោយ​គ្មាន​ស្ថាន​ទម្ងន់ ណាមួយ ដូច​បានកំណត់ ក្នុង​មាត្រា ២០០ (​បទ​ឃាតកម្ម​គិតទុក​ជាមុន​) ដល់​មាត្រា ២០៥ (​បទ​ឃាតកម្ម ដោយមាន​ទារុណកម្ម អំពើ​ឃោរឃៅ ឬ អំពើ​រំលោភ​សេពសន្ថវៈ​) នៃ​ក្រម​នេះ គឺជា​ឃាតកម្ម ។ ឃាតកម្ម ត្រូវ​ផ្តន្ទាទោស​ដាក់ពន្ធនាគារ ពី​១០​ឆ្នាំ ទៅ​១៥​ឆ្នាំ ។​

​គួររំលឹកថា គ្រោះថ្នាក់​ចរាចរណ៍ ឈានដល់​ការ​អំពើ​ឃាត​កម្មនេះ កើតឡើង កាលពី​វេលា​ម៉ោង ១១ និង​៣០​នាទី យប់ ថ្ងៃទី​១០ ខែតុលា ឆ្នាំ​២០២០ នៅ​ចំណុច​ផ្លូវ​លេខ​១៧៣ កែង​ផ្លូវ​លេខ ៣២៨ សង្កាត់​ទួល​ស្វាយព្រៃ​១ ខណ្ឌ​បឹង​កេងកង រាជធានី​ភ្នំពេញ ។​

​លោក​ឧត្ដមសេនីយ៍ទោ ចេ​វ ហាក់ ស្នងការរង នគរបាល​រាជធានី​ភ្នំពេញ ទទួលបន្ទុក​ចរាចរ​ណ៍ បាន​ថ្លែងថាៈ ជនបង្ក​ឈ្មោះ យ៉ាន់ ណា​លី​ណា ភេទ​ប្រុស អាយុ​៣០​ឆ្នាំ មុខរបរ ពេទ្យធ្មេញ ស្នាក់​នៅផ្ទះ​លេខ ៥​អឹម ភូមិ​ព្រៃ​ព្រីង​ខាងត្បូង​ទី​១ សង្កាត់​ចោមចៅ​២ ខណ្ឌ​ពោធិ៍​សែន​ជ័យ បើករថយន្ដ ម៉ាក Lexus NX200T ស្លាក​លេខ​ភ្នំពេញ 2BH-8494 ។​

ជនបង្ក​ឈ្មោះ យ៉ាន់ ណា​លី​ណា អាយុ​៣០​ឆ្នាំ មុខរបរ ពេទ្យធ្មេញ

​ចំណែក​ជនរងគ្រោះ ឈ្មោះ ខុន តុង ភេទ​ប្រុស អាយុ​១៩​ឆ្នាំ មុខរបរ ជា​កម្មករសំណង់ ស្នាក់នៅ​សង្កាត់​ស្ទឹងមានជ័យ​១ ខណ្ឌមានជ័យ និង​អ្នករួមដំណើរ ឈ្មោះ ពៅ ម៉ត់ ភេទ​ប្រុស អាយុ​១៧​ឆ្នាំ មុខរបរ រត់​កង់​បី ស្នាក់នៅ​ភូមិ​ស្រះកែវ សង្កាត់​ក្រាំងស្វាយ ស្រុក​ព្រះស្តេច ខេត្តព្រៃវែង រងរបួស​ធ្ងន់ ។​

​តាមរយៈ​វីដេអូ ដែល​បាន​ចែកចាយ លើ​បណ្ដាញ​សង្គម​ហ្វេ​ស​ប៊ុ​ក បាន​បង្ហាញថា ជនបង្ក ពិតជា​មាន ច​រិ​ក​សាហាវ​ឃោ​ឃៅ ព្រៃផ្សៃ​ណាស់ ដោយ​បន្ទាប់ពី​បុក ជនរងគ្រោះ ពីក្រោយ​ពេញទំហឹង​ហើយ ជនបង្ក បាន​បើក​ថយក្រោយ កិន​ជនរងគ្រោះ​បន្ថែម រហូតដល់​ស្លាប់ ពេល​បញ្ជូន​ទៅដល់​មន្ទី​រ​ពេទ្យ ៕​/V

ជនរងគ្រោះ ឈ្មោះ ខុន តុង អាយុ​១៩​ឆ្នាំ មុខរបរ ជា​កម្មករសំណង់

ទីតាំងផ្សាយពាណិជ្ជកម្ម