ដោយៈ គូលែន / សៀមរាបៈ ការងារផ្តិតសិលាចារឹក មិនតម្រូវទាល់តែ ជាអ្នកបច្ចេកទេស បុរាណវិទ្យា អ្នកប្រវត្តិសាស្ត្រ ឬ អក្សរសាស្ត្រ ទើបអាចផ្តិតបាននោះឡើយ។ វាអាស្រ័យលើអ្នក ដែលមានចិត្តអំណត់ និងប្រុងប្រយ័ត្ន ដ្បិតអី ត្រូវចំណាយពេលយូរ និងដំណើរការ ក៏ច្រើនដំណាក់កាល មួយទៀតសោត ក្រដាសផ្តិតស្តើង ពេលត្រូវទឹក ផុយងាយរហែកណាស់។ នេះគឺជាការបញ្ជាក់ អោយដឹងពីលោក វិទូ ភិរម្យ បុរាណវិទូ នៃអាជ្ញាធរជាតិអប្សរា នាថ្ងៃទី១៨ ខែតុលា ឆ្នាំ២០២០ នេះ។
លោក វិទូ ភិរម្យ បុរាណវិទូ នៃអាជ្ញាធរជាតិអប្សរា បានត្រូវទំព័រហ្វេសប៊ុករបស់ អាជ្ញាធរជាតិអប្សរា ដកស្រង់ប្រសាសន៍ យកមកផ្សព្វផ្សាយ អោយដឹងថាៈ សម្ភារសំខាន់ៗ សម្រាប់ផ្តិត និងសម្អាតសិលាចារឹក មានដូចជា ច្រាសមានដង ច្រាសដុសធ្មេញ ចង្កាក់ឈើ ដបបាញ់ទឹក ជក់ធំ កំណាត់ក្រាស់រមូរជាដុំ (សម្រាប់តប់ដេញខ្យល់) ស្កុតក្រដាស ទឹកខ្មៅប្រអប់ ទឹកខ្មៅដប ប៉ុងកំណាត់បីខ្នាត សម្រាប់តប់ទឹកថ្នាំ ក្រដាសផ្តិត២ប្រភេទ គឺក្រាស់និងស្តើង។
លោកបានបន្តថាៈ ទាក់ទងនឹងបច្ចេកទេស នៃការផ្តិតសិលាចារឹក គឺអាស្រ័យនឹងស្ថានភាព ទីតាំង និងទំហំនៃសិលារឹក។ ដូច្នោះ យើងត្រូវស្វែងយល់ ពីល័ក្ខខ័ណ្ឌទាំងអស់នេះសិន មុននឹងចុះទៅផ្តិត ថាសិលាចារឹកនោះ ជាថ្មគោល ឬស្ថិតនៅលើមេទ្វារប្រាសាទ ជាប្រភេទ អក្សរជ្រៅ ឬ រាក់ ដែលអាចឱ្យយើង ងាយត្រៀមប្រភេទ និងទំហំក្រដាស ជាដើម។
លោកបានបន្តទៀតថាៈ មុនពេលផ្តិត យើងត្រូវមើលពីស្ថានភាព នៃថ្មចារឹក ថាតើមានជាប់ដី ឬ មានស្លែដុះ ជាហេតុនាំឱ្យរហែក និងប្រឡាក់ក្រដាស។ ប្រសិនបើមានករណីនេះមែន ត្រូវសម្អាត ដោយប្រើទឹកស្អាត ប្រើច្រាសទន់ដុសថ្នមៗ លើផ្ទៃអក្សរ និងប្រើចង្កាក់ឫស្សី ឆ្កឹះកំណកដី ឬ ស្លែ ដែលជាប់ក្នុងតួអក្សរ បើមាន។ បន្ថែមពីនោះ ក្រោយពេលសម្អាត រួចរាល់ហើយ ត្រូវទុកឱ្យថ្មស្ងួតបន្តិចសិន ទើបយើងរៀបចំបិទ ក្រដាសផ្តិត ទៅលើផ្ទៃ ដែលមានអក្សរ ដោយប្រើស្កុតក្រដាស ហើយក្រដាស ដែលប្រើ គឺអាស្រ័យនឹងប្រភេទអក្សរចារឹក បើអក្សរជ្រៅ ប្រើក្រដាសក្រាស់ តែបើរាក់ ប្រើក្រដាសស្តើង។
លោកបានបញ្ជាក់ថាៈ ក្រដាសត្រូវលាតឱ្យធឹងល្អសិន មុននឹងបិទទៅនឹងថ្ម ធ្វើបែបនេះ ទើបមិនមានខ្យល់ច្រើន នៅក្នុងក្រដាស ពេលយើងបាញ់ទឹក លើក្រដាសនោះ។ ក្រោយពេលបាញ់ទឹក សព្វទាំងផ្ទៃក្រដាសហើយ យើងនឹងឃើញថា ក្រដាសនឹងចាប់រាបជាប់ ទៅនឹងសាច់ថ្ម ហើយនៅលើកន្លែងខ្លះទៀត ពុំជាប់ ដោយសារតែមានខ្យល់ នៅក្នុងនោះ។ ហេតុដូច្នេះ ត្រូវយកខ្យល់ចេញឱ្យអស់ពីក្រដាស ព្រោះខ្យល់នេះហើយ ជាហេតុធ្វើឱ្យរហែកក្រដាស ពេលយើងវាយក្រដាស បញ្ចូលក្នុងតួអក្សរ ដោយប្រើច្រាស។ ឆ្លៀតពេលដែលយើង កំពុងរៀបចំក្រដាស យើងត្រូវត្រៀមទឹកខ្មៅ ក្នុងប្រអប់យកទៅហាលថ្ងៃ ឱ្យស្រេច លុះដល់ក្រដាសរួចរាល់ ទឹកខ្មៅ ក៏រាវល្មម អាចផ្តិតបាន។
លោកបានបញ្ជាក់បន្ថែមទៀតថាៈ ចំពោះរបៀបយកខ្យល់ចេញ ពីក្រដាសវិញ យើងអាចប្រើឧបករណ៍ ពីរប្រភេទទីមួយ ជក់ធំ និងទីពីរ គឺកំណាត់ ដែលរមូរជាដុំ។ យើងប្រើជក់ទៅគោះដេញតិចៗ នៅកន្លែងដែលមានខ្យល់ គោះដេញពីផ្នែកកណ្តាល ទៅគែមសងខាងនៃថ្ម ត្រូវគោះដោយ ប្រុងប្រយ័ត្នបំផុត ព្រោះក្រដាសសើម ងាយនឹងរហែក ឬច្បត់មានស្នាម។ បន្ទាប់មក ប្រើផ្ទៃរាបទាំងសងខាង នៃកំណាត់រមូរ ទៅតប់ពង្រាបក្រដាស មួយលើកទៀត ជាការស្រេច។ ការងារបន្ទាប់មកទៀត គឺប្រើច្រាសដងវែង វាយផ្ទៃក្រដាស ដោយផ្តោតសំខាន់ ត្រង់កន្លែងដែលមានអក្សរ ឬស្លាកស្នាមគូសវាស ផ្សេងៗ។ ការធ្វើបែបនេះ ក្នុងគោលបំណង ឱ្យសាច់ក្រដាស លិចចូលទៅក្នុងប្រឡោះអក្សរ ឱ្យបានសព្វល្អ លុះពេលផ្តិត ទឹកខ្មៅទៅ គឺជាប់តែផ្ទៃខាងលើ នៃក្រដាសប៉ុណ្ណោះ រីឯអក្សរវិញ គឺពណ៌ ស មិនប្រឡាក់ទឹកថ្នាំឡើយ។ ក្រោយពេលវាយ ក្រដាសចូល ក្នុងប្រឡោះអក្សរ សព្វហើយ ត្រូវទុកក្រដាសឱ្យស្រពាប់បន្តិច (មិនឱ្យស្ងួតខ្លាំងទេ) ទើបអាចផ្តិតបាន ព្រោះបើសើមពេក ធ្វើឱ្យទឹកថ្នាំរាច តែបើស្ងួតពេក ក្រដាសនឹងហើបចេញ ពីសាច់ថ្មមកវិញ។
លោកបានបន្តថាៈ បន្ទាប់មកទៀត ត្រូវរៀបចំសម្អាត ប៉ុងកំណាត់ផ្តិត និងជ្រើសខ្នាតក្រដាស តាមទំហំសិលាចារឹក ជាក់ស្តែង ហើយប្រើប៉ុងកំណាត់ ផ្តិតលើទឹកខ្មៅ និងប្រើប៉ុងមួយទៀត មកវីគ្នា ឱ្យសព្វសាច់ល្អ ហើយទើបអាចផ្តិតបាន ព្រោះបើពុំដូច្នោះទេ ពេលផ្តិតទៅនឹងចេញស្នាមដុំៗ មិនស្មើសាច់ល្អទេ។ យើងត្រូវផ្តិតពីស្តាំ មកឆ្វេង ឬពីឆ្វេងមកស្តាំ និងពីលើចុះក្រោម ទៅតាមទំនោរអ្នកផ្តិត ។ ត្រូវផ្តិតថ្នមៗ ដោយរលាស់ប៉ុងតិចៗផង ពេលផ្តិត ទើបវាស្មើសាច់ល្អ។ អនុវត្តវិធីខាងលើ ម្តងហើយ ម្តងទៀត រហូតឃើញថា ផ្ទៃក្រដាសខ្មៅ សព្វល្អ តែមិនខ្មៅពេក ដែលជាហេតុ អាចប្រឡាក់ ដល់ក្នុងអក្សរ។ លុះរួចរាល់ហើយ ទុកក្រដាសឱ្យស្ងួតបន្តិច ទើបអាចបកបាន តែមិនឱ្យស្ងួតពេកទេ ព្រោះអាចធ្វើឱ្យក្រដាស ស្អិតជាប់នឹងថ្ម នាំឱ្យរហែក ពេលយើងបកចេញ។ ពេលបកចេញមកហើយ ក្រដាសត្រូវយកទៅហាលថ្ងៃ នៅលើផ្ទៃរាបស្មើ ឱ្យស្ងួតល្អ។ បន្ទាប់មក ត្រូវពិនិត្យលើផ្ទៃថ្ម សិលាចារឹកម្តងទៀត ថាមានប្រឡាក់ទឹកខ្មៅ ឬអត់ បើមានត្រូវយកច្រាស ដុសធ្មេញ មកដុសសម្អាតថ្នមៗ និងបាញ់ជម្រះ ដោយប្រើទឹកស្អាត។ ការងារចុងក្រោយគេ គឺចុះលេខ K. ឈ្មោះ ទីតាំង ថ្ងៃខែ និងក្រុមការងារផ្តិត នៅខាងស្តាំ ផ្នែកខាងក្រោម នៃក្រដាសផ្តិត៕/V
