ដោយៈ សុខុម / ស្ទឹងត្រែងៈ កម្លាំងនគរបាលប្រឆាំងគ្រឿងញៀនខេត្តស្ទឹងត្រែង បានឃាត់ខ្លួនជនសង្ស័យ ចំនួន ១នាក់ និងដកហូតបាន ថ្នាំញៀនជិត ៤ គីឡូក្រាម នៅវេលាម៉ោង ៣និង៣០នាទី រសៀលថ្ងៃទី១៨ ខែតុលា ឆ្នាំ២០២០ នៅភូមិលើ សង្កាត់ស្រះឫស្សី ក្រុងស្ទឹងត្រែង ហើយនៅថ្ងៃដដែលនេះ កម្លាំងប្រឆាំងគ្រឿងញៀនខេត្ត បានបន្តស្រាវជ្រាវ និងបានឃាត់ខ្លួនជនសង្ស័យ ១ នាក់ទៀត នៅជិតច្រកទ្វារព្រំដែនអន្តរជាតិត្រពាំងក្រៀល កម្ពុជាជាមួយនឹងឡាវ។
លោកវរសេនីយ៍ទោ ចែម ផានិត នាយការិយាល័យប្រឆាំងគ្រឿងញៀនខេត្ត បានឲ្យដឹងថាៈ ជនសង្ស័យដែលសមត្ថកិច្ចចាប់ខ្លួន ទី១- ឈ្មោះ អ៊ិន ថា ភេទស្រី អាយុ ៤៧ ឆ្នាំ ជនជាតិខ្មែរ មានលំនៅ នៅភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង (បានត្រូវចាប់ខ្លួននៅភូមិលើ សង្កាត់ស្រះឫស្សី ក្រុងស្ទឹងត្រែង) ។ ទី២.ឈ្មោះ វ៉ាន ភូរ ភេទប្រុស អាយុ ២៧ ឆ្នាំ មានលំនៅ នៅភូមិស្ដៅ ឃុំស្ដៅ ស្រុកសេសាន ខេត្តស្ទឹងត្រែង (បានត្រូវចាប់ខ្លួននៅជិតច្រកទ្វារព្រំដែនអន្តរជាតិ ត្រពាំងក្រៀល កម្ពុជា ជាមួយនឹងឡាវ) ។
លោកវរសេនីយ៍ទោ បានឲ្យដឹងទៀតថាៈ ស្ថិតការក្រោមបញ្ជាផ្ទាល់ ពីលោកឧត្តមសេនីយ៍ត្រី អូត ស៊ីវត្ថា ស្នងការនគរបាលខេត្ត និងមានការសម្របសម្រួល ពីព្រះរាជអាជ្ញា អមសាលាដំបូងខេត្តស្ទឹងត្រែង កម្លាំងជំនាញ បានចុះដល់ចំណុច ខាងលើ ឃាត់ខ្លួនបានជនសង្ស័យម្នាក់ ដកហូតគ្រឿងញៀន ចំនួន ៤ កញ្ចប់ធំ ។ ក្រោយពីបានសាកសួរ និងទទួលបានចម្លើយសារភាពរបស់ជនសង្ស័យនោះ សមត្ថកិច្ចជំនាញ បានបន្តនីតិវិធី ឈានដល់ការឃាត់ខ្លួន ជនសង្ស័យម្នាក់ទៀត នៅជិតព្រំដែនឡាវ រួមជាមួយថ្នាំគ្រវី ចំនួន ២ ថង់តូច និងនាំមកកាន់ស្នងការដ្ឋាន នគរបាលខេត្ត ដើម្បីសាកសួរ។ ជនសង្ស័យទាំងពីរនាក់ បានឆ្លើយសារភាព ចំពោះមុខសមត្ថកិច្ចថាៈ គ្រឿងញៀនខាងលើនេះ ពិតជារបស់ខ្លួន ពិតប្រាកដមែន។
ក្រោយពីបានសាកសួរ និងទទួលបានចម្លើយសារភាព សមត្ថកិច្ចជំនាញ បានកសាងសំណុំរឿង រួមទាំងវត្ថុតាងគ្រឿងញៀន ៤ កញ្ចប់ធំ (ស្មើនឹងជិត ៤ គីឡូក្រាម) និងថ្នាំគ្រវី ចំនួន ២ ថង់តូច បញ្ជូនខ្លួនជនសង្ស័យទាំងពីរនាក់ ទៅកាន់តុលាការ ដើម្បីចាត់ការបន្តតាមនីតិវិធី៕/V/Ha
