នាំ​អំណោយ​មនុស្សធម៌​របស់​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ទៅ​ផ្តល់ជូន​ប្រជាពលរដ្ឋ​រងគ្រោះ​ដោយ​ទឹកជំនន់​រហ័ស​ចំនួន​១៥០​គ្រួសារ​

ដោយ​: គ្រញូង / បាត់ដំបង​: កាលពី​ព្រឹក​ថ្ងៃទី​១៨ ខែតុលា ឆ្នាំ​២០២០ ក្រុមការងា​សាខា​កាកបាទ​ក្រហ​មកម្ពុជា​ខេត្តបាត់ដំបង ដឹកនាំ​ដោយ​លោក​បណ្ឌិត ប៊ុត គឹមស៊ាន ប្រធាន​គណៈកម្មាធិការ​សាខា និង​លោកស្រី ដោយមាន​ការចូលរួម​ពី​លោក អ៊ុយ រី អនុប្រធាន​កិត្តិយស​សាខា លោក លោកស្រី​អនុប្រធាន​កិត្តិយស​គណៈ​ក​ម្មា​ធិ​ការ​សាខា និង​យុវជន​កាកបាទក្រហម​កម្ពុជា​ខេត្ត បាន​នាំយក​អំណោយ​មនុស្សធម៌​របស់​កាកបាទក្រហម​កម្ពុជា ដែលមាន​សម្តេច​កិត្តិ​ព្រឹទ្ធ​បណ្ឌិត ប៊ុនរ៉ានី ហ៊ុនសែន ជា​ប្រធាន​ទៅ​ផ្តល់ជូន​ប្រជាពលរដ្ឋ​រងគ្រោះ​ដោយ​ទឹកជំនន់​ចំនួន​១៥០​គ្រួសារ រស់នៅ​ភូមិ​ចក​ធំ ឃុំ​កកោះ ស្រុក​មោងឫស្សី​។​

​ក្នុងឱកាស​ជួប​ជាមួយ​បងប្អូន​ប្រជាពលរដ្ឋ លោក អ៊ុយ រី និង​លោក​បណ្ឌិត ប៊ុត គឹមស៊ាន បាន​ពាំនាំ​ប្រសាសន៍​របស់​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ដែល​ផ្តាំផ្ញើ​សួរសុខទុក្ខ​ដោយ​ក្តី​អាណិតអាសូរ និង​ចូលរួម​ការសោកស្តាយ​ជាមួយ​ប្រជាពលរដ្ឋ ដែល​ទទួលរង​គ្រោះ​ដោយសារ​ទឹកជំនន់​នាពេលនេះ ព្រមទាំង​បាន​ពាំ​នាំសារ​អំពាវនាវ​ពីស​ម្តេច​កិត្តិ​ព្រឹទ្ធ​បណ្ឌិត​ជូន​ដល់​បងប្អូន​ប្រជាពលរដ្ឋ​ទាំងអស់​៖

១. សូម​ប្រុងប្រយ័ត្ន​ពី​សត្វ​អ​សិ​រ្ពិ​ស​គ្រប់​ប្រភេទ​នាពេល​ទឹក​ឡើង និង​ពេល​ទឹក​ស្រក​ទៅវិញ​ដែល​ពួកវា​អាច​បង្ក​គ្រោះថ្នាក់​ដល់​អាយុជីវិត​។
២. សូម​ប្រជាពលរដ្ឋ​ទាំងអស់​ពិសេស​ក្រុមគ្រួសារ​ដែលមាន​កូនតូចៗ និង​ចាស់ជរា​ត្រូវ​យកចិត្តទុកដាក់​មើលថែទាំ​ឱ្យបាន​ល្អ និង​បង្កើន​ការប្រុងប្រយ័ត្ន​ពី​គ្រោះថ្នាក់​លង់ទឹក​ស្លាប់​នាពេល​ទឹកជំនន់ ដែល​បណ្តាលឱ្យមាន​វិប្បដិសារី​អស់​មួយជីវិត​។
៣. សូម​គិតគូរ​ពី​សុខភាព និង​ការរក្សា​អនាម័យ​ធ្វើយ៉ាងណា​គ្រប់​ក្រុមគ្រួសារ​ត្រូវ​បរិភោគ​ទឹក​ដាំ​ឆ្អិន​ល្អ ដើម្បី​ការពារ​កុំឱ្យ​កើតមាន​ជំងឺ​រាករូស ឬ​ជំងឺ​រាតត្បាត​នានា​។​
៤. នៅពេល​ទឹក​ស្រក សូម​សម្អាតផ្ទះ ឬ​បរិស្ថាន​ជុំវិញ​ផ្ទះ​ឱ្យបាន​ស្អាត និង​មាន​អនាម័យ ហើយ​សូម​បន្ត​ប្រកប​របរ​ចិញ្ចឹមជីវិត ដើម្បី​ស្តារ​សេដ្ឋកិច្ច​គ្រួសារ​ឡើងវិញ​។
៥. សូម​បន្ត​ទប់ស្កាត់​ជំងឺ​កូ​វីដ​-១៩ ត្រូវ​ពាក់​ម៉ាស់​លាងដៃ​នឹង​សាប៊ូ​និង​មាន​ស្មារតី​ប្រុងប្រយ័ត្ន​ជានិច្ច ដោយ​អនុវត្តតាម​វិធានការ​នានា​របស់​ក្រសួងសុខាភិបាល និង​រស់នៅ​តាមបែប​គ​ន្ល​ង​ថ្មី​។​

​សូមបញ្ជាក់ថា គ្រួសារ​រងគ្រោះ​នីមួយៗ​ទទួលបាន​៖ អង្ករ​៣០​គីឡូក្រាម មី​១​កេស ត្រីខ​១០​កំប៉ុង និង​ទឹកស៊ីអ៊ីវ​៦​ដប ក្នុងនោះ​សាខា​បាន​បន្ថែម​ទឹក​សុទ្ធ​វី​ឃែ​រ​ចំណុះ​១៥០០​មិ​លី្ល​លីត្រ​ចំនួន​៦​ដប​ ក្រមា​១​និង​ថវិកា​១​ម៉ឺន​រៀល​៕ ល​/Ha

ទីតាំងផ្សាយពាណិជ្ជកម្ម

- Advertisment -

Most Popular