Home ព័ត៌មានអន្តរជាតិ ចំនួន​អ្នក​ស្...

ចំនួន​អ្នក​ស្លាប់​ដោយ​ទឹកជំនន់​និង​បាក់​ដី​នៅ​វៀតណាម​កណ្តាល​កើន​ដល់​៨៨​នាក់​

​យ៉ាងហោច​ណាស់​មនុស្ស​៨៨​នាក់​បាន​ស្លាប់​និង​មនុស្ស​ប្រមាណ​៥៣.០០០​គ្រួសារ​ត្រូវ​បាន​ជម្លៀស​ដោយសារ​ទឹកជំនន់​និង​ការបា​ក់ដី​នៅ​វៀតណាម​កណ្តាល​គិត​ត្រឹម​ថ្ងៃ​ចន្ទ​ទី​១៩​តុលា​។​

​អស់​ពេល​ជិត​២​សប្តាហ៍​មក​នេះ តំបន់​កណ្តាល​វៀតណាម​បាន​រង​ការ​ធ្លាក់ភ្លៀង​ខ្លាំង ការ​ជន់​លិច​និង​ការបា​ក់ដី​សង្កត់​។​បើ​តាម​គណៈកម្មាធិការ​សំរាប់​បង្ការ​គ្រោះ​មហន្តរាយ​ជាតិ តំបន់​កណ្តាល​និង​ខ្ពង់រាប​​ភាគ​កណ្តាល​ត្រូវ​បាន​បំផ្លាញ​ដោយ​គ្រោះធម្មជាតិ​ទាំងនេះ ដោយ​ផ្លូវជាតិ​ចំនួន​១២ និង​ផ្លូវ​តាម​មូលដ្ឋាន​ជាង​១៧,៤​គីឡូម៉ែត្រ​រង​ការខូចខាត ភាគច្រើន​នៅក្នុង​ខេត្ត ធួ ធៀន វ៉េ ខេត្ត ក្វា​ង ទ្រី និង​ខេត្ត​​ក្វា​ង ណា​ម ។​

​នៅ​ខេត្ត ហា ទិញ ផ្ទះ​រាប់រយ​ត្រូវ​ជន់​លិច​និង​ហេដ្ឋារចនាសម្ពន្ធ​រង​ការខូចខាត​ធ្ងន់ធ្ងរ​ចាប់តាំងពី​ថ្ងៃ​សុក្រ​សប្តាហ៍​មុន​មក​។​

​ក្នុងចំណោម​ជនរងគ្រោះ​៨៨​នាក់ រួម​មាន​អ្នក​ជាប់​ក្នុង​បំណាក់​ដី​ធំៗ​៣​ករណី​ផ្សេង​គ្នា​។​សាកសព​សមាជិក​ក្រុម​សង្គ្រោះ​ចំនួន​១៣​នាក់​ត្រូវបាន​រកឃើញ​ក្នុង​បំណាក់​ដី​នៅ​រោងចក្រ​ថាមពល​វា​រី​អគ្គិសនី​មួយ​​។​ពួកគេ​ត្រូវបាន​បញ្ជូន​ទៅ​ស្វែងរក​កម្មករ​ដែល​បាត់​ខ្លួន​ក្នុង​បំណាក់​ដី​មុន​នោះ​កាលពី​ថ្ងៃ​អង្គារ​។​សាកសព​កម្មករ​២​នាក់​ត្រូវបាន​រកឃើញ និង​ជាង​១០​នាក់​នៅ​បាត់​ខ្លួន​។​

​ការបា​ក់ដី​សង្កត់​ធំ​មួយទៀត​កើតឡើង​នៅក្នុង​ខេត្ត​ក្វាង ទ្រី កាលពី​ព្រឹក​ថ្ងៃអាទិត្យ​ទី​១៨​តុលា ដោយ​បាន​កប់​ទាហាន​ចំនួន​២២​នាក់ ហើយ​គិត​ត្រឹម​ព្រឹក​ថ្ងៃ​ចន្ទ​នេះ សាកសព​ទាហាន​១៧​នាក់​ត្រូវបាន​ទាញ​​ចេញពី​ភក់​ភ្នំ​ដែល​បាក់​សង្កត់​បន្ទាយ​ទាហាន​របស់​ពួកគេ​។​

​ការ​ធ្លាក់ភ្លៀង​ខ្លាំង​បាន​បន្ត​កាលពី​ថ្ងៃអាទិត្យ ចាប់ពី​ហា​ទិញ ក្វា​ង ទ្រី និង​ក្វាង ប៊ិញ ហើយ​ភ្លៀង​ច្រើន​ទៀត​នឹង​ធ្លាក់​រហូតដល់​ថ្ងៃ​ពុធ​៕​ប្រែ​សម្រួល​៖​វាសនា​

​ផ្ទះ​ជន់​លិច​នៅ​ក្នុង​ខេត្ត​ក្វាង​ណា​ម​របស់​វៀតណាម​កណ្តាល​កាលពី​ថ្ងៃ​១២​តុលា​

ទីតាំងផ្សាយពាណិជ្ជកម្ម

- Advertisment -

Most Popular