Home ព័ត៌មានអន្តរជាតិ នាយករដ្ឋមន្ត្...

នាយករដ្ឋមន្ត្រី​ថៃ​កោះប្រជុំ​សភា​នៅពេល​ការប្រឆាំង​តវ៉ា​បង្កើន​សម្ពាធ​

​នាយករដ្ឋមន្ត្រី​ថៃ​កាលពី​ថ្ងៃ​ចន្ទ​ទី​១៩​តុលា​បាន​អំពាវនាវ​អោយ​មាន​កិច្ចប្រជុំសភា​ពិសេស​មួយ នៅ​ពេល​ពួក​អ្នក​តវ៉ា​ប្រឆាំង​មាន​ផែនការ​ធ្វើ​ការជួបជុំ​បន្តទៀត​ដើម្បី​ទាមទារ​អោយ​លោក​ចុះចេញ​ពី​តំណែង​ ដោះលែង​សកម្មជន​និ​កែទំរង់​របបរាជានិយ​មអា​ស្រ័យធម្មនុញ្ញ​ថៃ​។​

​សូមបញ្ជាក់​ថា មនុស្ស​រាប់​ម៉ឺន​នាក់​ភាគច្រើន​ជា​អ្នក​ប្រឆាំង​តវ៉ា​វ័យក្មេងៗ បាននាំគ្នា​ចេញ​មក​តាម​ដងផ្លូវ​នៃ​ក្រុង​បាងកក​និង​បណ្តា​ខេត្ត​របស់​ថៃ នៅ​មួយ​សប្តាហ៍​មក​នេះ​ដោយ​ផ្គើន​នឹង​ច្បាប់​គ្រា​អាសន្ន​​មួយ​ដែល​ហាម​ការជួបជុំ​នយោបាយ​ចាប់​ពី​មនុស្ស​៥​នាក់​ឡើង​។​

​ប៉ូលិស​បាន​និយាយថា មនុស្ស​ប្រមាណ​២០.០០០​នាក់​បាន​ចេញ​មក​ប្រឆាំង​តវ៉ា​ក្នុង​ទីក្រុង​បាងកក​កាលពី​ថ្ងៃអាទិត្យ​ទី​១៨​តុលា តែ​ពួក​សកម្មជន​អះអាងថា ចំនួន​ច្រើន​ជាង​នេះ​។​

​ការ​ធ្វើ​បាតុកម្ម​នៅ​តែ​បន្ត ទោះបីជា​មាន​ការចាប់ខ្លួន​អ្នក​តវ៉ា​រាប់សិប​នាក់​និង​មេដឹកនាំ​របស់​ពួកគេ ការប្រើប្រាស់​ការបាញ់ទឹក និង​ការបិទ​ប្រព័ន្ធ​ផ្លូវ​រថភ្លើង​ជាច្រើន​នៅ​ទីក្រុង​បាងកក​ដើម្បី​បង្ក្រាប​សកម្មភាព​តវ៉ា​នៅតាម​ដងផ្លូវ​អស់ រយៈពេល​៣​ខែ​មក ក៏ដោយ​។​

​ចលនា​តវ៉ា​ប្រឆាំង​ដែល​ដឹកនាំ​ដោយ​យុវជន​នេះ​បាន​ទទួល​រង​ការ​វាយ​បង្ក្រាប​ខ្លាំង​នៅ​សប្តាហ៍​មុន​ដោយ​មនុស្ស​ច្រើន​នាក់​ត្រូវបាន​ចាប់ខ្លួន​បន្ទាប់ពី​ក្រុមបាតុករ​បាន​ឡោមព័ទ្ធ​ក្បួន​ដង្ហែ​ស្តេច​និង​បាន​សម្តែង​កាយវិការ​គោរព​លទ្ធិប្រជាធិប្បតេយ្យ​ដោយ​លើក​ម្រាមដៃ​៣​ចំពោះ​ព្រះមហាក្សត្រី​យានី​ស៊ូ​ធិតា​។​

​រដ្ឋាភិបាល​បាន​ប្រតិកម្ម​ជាមួយនឹង​វិធានការ​ក្នុង​គ្រាអាសន្ន​ដោយ​រួម​ទាំង​ការហាមឃាត់​ការប្រមូលផ្តុំ​មនុស្ស​ចាប់ពី​៥ នាក់​ឡើង​ទៅ​នៅ​ទីក្រុង​បាងកក​និង​មាន​ការចាប់ខ្លួន​ក្រុម​មេដឹកនាំ​បាតុកម្ម​ដែល​អំពាវនាវ​ឱ្យ​ដក​នាយករដ្ឋមន្ត្រី លោក ប្រា​យុទ្ធ ចាន់​អូ​ចា​ចេញពី​តំណែង​។​

​ក្រុមអ្នកច្បាប់​ថៃ​សម្រាប់​សិទ្ធិ​មនុស្ស​បាន​និយាយ​ថា​ក្រុមអ្នកតវ៉ា​យ៉ាងតិចណាស់​ចំនួន​៨០​នាក់ ត្រូវបាន​ចាប់ខ្លួន​ចាប់តាំងពី​ថ្ងៃទី​១៣​ខែ​តុលា​មក ដោយ​អ្នក​តវ៉ា​២៧​នាក់​កំពុង​ត្រូវបាន​ឃុំខ្លួន​នៅឡើយ​។​

​នៅ​ពេល​ពួក​អ្នក​ប្រឆាំង​តវ៉ា ត្រៀម​ធ្វើ​ការជួបជុំ​ជា​ថ្មី​នៅ​ថ្ងៃ​ចន្ទ នាយករដ្ឋមន្ត្រី​ប្រា​យុទ្ធ ចាន អូ​ចា បាន​និយាយ​ថា​សភា​ដែល​បច្ចុប្បន្ន​ឈប់សម្រាក នឹង​ត្រូវ​កោះហៅ​មក​បើក​កិច្ចប្រជុំ​ពិសេស​ដើម្បី​ពិ​​ភាក្សា​រកវិធី​កាត់បន្ថយ​ភាព​តានតឹង​។​

​លោក​បាន​ប្រាប់​អ្នកយកព័ត៌មាន​ថា «​យើង​គាំទ្រ​ការបើក​សម័យប្រជុំ​ពិសេស​មួយ​ដើម្បី​ដោះស្រាយ​ជម្លោះ​នេះ​។​ខ្ញុំ​ស្នើអោយ​ពួក​អ្នក​ប្រឆាំង​តវ៉ា​ធ្វើ​ការជួបជុំ​ដោយ​សន្តិវិធី​។​រដ្ឋាភិបាល​បាន​សម្របសម្រួល​​ដល់​កំរិត​មួយ​ហើយ​»​។​

​ចលនា​គ្មាន​មេដឹកនាំ​នេះ កំពុង​ទាមទារ​អោយ​លោក​ប្រា​យុទ្ធ ចុះចេញ​ពី​តំណែង ព្រមទាំង​សរសេរ​រដ្ឋធម្មនុញ្ញ​ឡើង​វិញ​មុន​ធ្វើ​ការបោះឆ្នោត​ជា​ថ្មី​។​តែ​ការទាមទារ​ប្រទូសរ៉ាយ​បំផុត​នេះ គឺ​ពួកគេ​សុំអោយ​​របប​រាជានិយម​សព្វថ្ងៃ​កែ​ទំរង់ ដោយសារតែ​ពួកគេ​យល់ថា ស្តេច​សព្វថ្ងៃ​មាន​ទ្រព្យធន​និង​អំណាច​ច្រើន​ហួសហេតុ​ពេក​។​ពួកគេ​ក៏​ចង់​អោយ​លុបចោល​ច្បាប់​ប្រមាថ​ស្តេច ដែល​ការពារ​រាជវង្ស​ពី​ការរិះគន់​ មាន​តម្លាភាព​ឡើង​អំពី​ហិរញ្ញវត្ថុ​រាជវាំង និង​សុំ​អោយ​ព្រះមហាក្សត្រ​គង់​នៅ​ផុតពី​នយោបាយ​។​

​ចលនា​នេះ​ទំនងជា​ទទួល​បាន​ការ​ទាក់ទាញ​ទូទាំងប្រទេស​ថៃ ដោយ​ការតវ៉ា​ប្រឆាំង​តូចៗ​ក៏​ត្រូវបាន​រៀបចំ​ធ្វើ​ចាប់​ពី​ខេត្ត​ភូ​កេត ដល់​ខុន​ឃែ​ន​និង​ឈៀង ម៉ៃ ឈៀង​រ៉ៃ​នៅ​ភាគ​ខាងជើង​ប្រទេស​កាលពី​ថ្ងៃ​១៨​តុលា​។​

​វា​បាន​កើន​សម្ទុះ​ចាប់តាំងពី​ខែកក្កដា តែ​កើនឡើង​និង​ប្រទូសរ៉ាយ​ខ្លាំង​កាលពី​សប្តាហ៍​មុន នៅ​ពេល​អ្នក​ប្រឆាំង​តវ៉ា​មួយក្រុម បាន​ចោមរោម​ក្បួន​រថយន្ត​ស្តេច​ហើយ​លើក​ម្រាមដៃ​៣​ជា​និមិត្តរូប​«​ប្រជា​​ធិបតេយ្យ​» ដាក់​មហាក្សត្រិយានី ស៊ូ​ធិតា​។​ឥឡូវ​ដោយសារ​លើក​ម្រាមដៃ​ដាក់​ស្តេច​បែបនេះ សកម្មជន​២​នាក់​ប្រឈម​ការចោទប្រកាន់​ពី​បទ​រំលោភ​សេរីភាព​របស់​មហាក្សត្រិយានី និង​អាច​ជាប់គុក​១​ជីវិត​។​

​ការប្រឆាំង​តវ៉ា​កាន់តែ​ប្រឈមមុខគ្នា​ឡើង​កាលពី​ថ្ងៃ​សុក្រ​សប្តាហ៍​មុន​នៅ​ពេល​ប៉ូលិស​បាញ់​ទឹក​លាយ​ជាតិគីមី​ដើម្បី​បំបែកហ្វូង​បាតុកម្ម​។​

​កាលពី​ថ្ងៃ​១៩​តុលា លោក​ប្រា​យុទ្ធ បាន​ព្រមាន​ថា រដ្ឋាភិបាល​ចាំបាច់​ត្រូវការពារ​របបរាជានិយម ដោយ​«​នេះ​ជា​ភារកិច្ច​របស់​ប្រជាជន​ថៃ​ទាំងអស់​»៕​ប្រែ​សម្រួល​៖​វាសនា​

អ្នក​ប្រឆាំង​តវ៉ា​ថៃ​រាប់ម៉ឺន​នាក់​ចេញ​មក​តវ៉ា​ប្រឆាំង​អស់​ពេល​៥​ថ្ងៃ​ជាប់​គ្នា​ចាប់តាំងពី​រដ្ឋាភិបាល​ប្រកាស​ប្រើ​ច្បាប់​ហាម​ការជួបជុំ​នយោបាយ​សំរាប់​មនុស្ស​ចាប់ពី​៥​នាក់​ឡើង

ទីតាំងផ្សាយពាណិជ្ជកម្ម

- Advertisment -

Most Popular

​ហោរាសាស្ត្រ​

​ ​ ​ ​ ​ប្រចាំថ្ងៃ​ច័ន្...

រោងភាពយន្ត លេ​ជិន ផ្អាក​ប...

​ដោយៈ សុផល / ភ្នំពេញៈ រោង...

ក្រោយ​ការធ្វើ​តេស្ត​ជំងឺ​...

​ដោយ​៖ ទេព មង្គល / ភ្នំពេ...

ថ្នាក់ដឹកនាំ​និង​មន្ត្រី​...

ដោយៈ​ដេប៉ូ​/​ភ្នំពេញៈ​ថ្ន...