ដោយៈ គ្រញូង / បាត់ដំបងៈ នៅព្រឹកថ្ងៃទី១៩ ខែតុលា ឆ្នាំ២០២០ លោក ទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានដឹកនាំក្រុមប្រតិភូក្រសួងពាក់ព័ន្ធ និងអមដំណើរដោយលោក ងួន រតនៈ អភិបាលខេត្តបាត់ដំបង ព្រមទាំងមន្ត្រី នៃមន្ទីរពាក់ព័ន្ធមួយចំនួនទៀត បានចុះពិនិត្យស្ថានភាពហេដ្ឋារចនាសម្ព័ន្ធផ្លូវថ្នល់ ដែលទទួលរងនូវការខូចខាត ដោយសារទឹកជំនន់ នៅខេត្តបាត់ដំបង និងចែកអំណោយដល់ជនរងគ្រោះ។
ក្នុងដំណើរចុះពិនិត្យមើលហេដ្ឋារចនាសម្ព័ន្ធផ្លូវថ្នល់ ដែលរងនូវការខូចខាត ដោយសារជំនន់ទឹកភ្លៀង លោកទេសរដ្ឋមន្ដ្រី បានចុះពិនិត្យមើលផ្លូវ
ថ្នល់ ដែលត្រូវទឹកហូរកាត់ ធ្វើឲ្យខូចខាត និងប្រព័ន្ធប្រឡាយបង្ហូរទឹក នៅចំណុចរង្វង់មូល នាងរំសាយសក់ ស្ថិតក្នុងភូមិសាលាបាឡាត់ សង្កាត់អូរម៉ាល់ រួចបន្តពិនិត្យមើលស្ថានភាពផ្លូវ នៅរង្វង់មូលយាយទេព ស្ថិតក្នុងសង្កាត់អូរចារ ក្រុងបាត់ដំបង ខេត្តបាត់ដំបង ។
លោកទេសរដ្ឋមន្ត្រី បានមានប្រសាសន៍ ណែនាំឲ្យមន្ដ្រីជំនាញ ធ្វើការកាយប្រឡាយ ដើម្បីរំដោះទឹក សម្រួលចរាចរណ៍ធ្វើដំណើរ ជូនបងប្អូនប្រជាពលរដ្ឋ និងធ្វើការពង្រីកប្រព័ន្ធលូបង្ហូរទឹក ឱ្យបានធំជាងមុន ដើម្បីងាយស្រួលរំដោះទឹក ទប់ស្កាត់កុំឱ្យទឹកហូរ កាត់ផ្ដាច់ផ្លូវ បង្កការជន់លិច ទៅដល់ខ្នងផ្ទះរបស់បង
ប្អូនប្រជាពលរដ្ឋ ដែលស្ថិតនៅខាងក្រោមផ្លូវ។
បន្តមក ប្រតិភូបានបន្តដំណើរ ចុះពិនិត្យស្ថានភាពទឹកជំនន់ នៅតាមដងផ្លូវជាតិលេខ៥ (ផ្លូវហាយវ៉េ) ស្ថិតក្នុងឃុំអូរតាគី ស្រុកថ្មគោល ខេត្តបាត់ដំបង ដែលនៅទីនោះ លោកទេសរដ្ឋមន្ត្រី បានចុះសួរសុខទុក្ខ និងចែកអំណោយ ជូនដល់ប្រជាពលរដ្ឋរងគ្រោះ ដោយទឹកជំនន់ ចំនួន ២០០ គ្រួសារ នៅឃុំអូរតាគី។
អំណោយដែលចែកជូន ប្រជាពលរដ្ឋ ដែលរងគ្រោះ ដោយទឹកជំនន់ ២០០ គ្រួសារ ដែលស្ថិតនៅលើទីទួលសុវត្ថិភាពនេះ (ឃុំអូរតាគី) ក្នុងមួយគ្រួសារ ទទួលបាន មី១កេស និងត្រីខ១យួរ ហើយលោកទេសរដ្ឋមន្ត្រី បានប្រគល់កៅស៊ូតង់ ចំនួន ១០០ ដល់រដ្ឋបាលខេត្តបាត់ដំបង ដើម្បីចែកជូនពលរដ្ឋ រងគ្រោះទឹកជំនន់ផងដែរ ៕S/
រូបថតះលោកទេសរដ្ឋមន្ត្រីស៊ុន ចាន់ថុលនិងប្រតិភូចុះពិនិត្យស្ថានភាពនិងចែកអំណោយ
