លោក ជេសសេ ម៉ាស (Jesse Marsch) ជាអ្នកចាត់ការក្លិប RB Salzburg បានអះអាងថា លោក ហ្វ្រែង ឡាំផាត (Frank Lampard) ដំបូងឡើយមិនសូវផ្តល់តម្លៃដល់កីឡាករ គ្រីស្ទៀន ពូលីស៊ីក (Christian Pulisic) ដោយតែកីឡាកររូបនេះមានសញ្ជាតិអាមេរិក។
ខ្សែបម្រើស្លាបរូបនេះបានចុះកិច្ចព្រមព្រៀងផ្ទេរមកក្លិប Chelsea កាលពីខែមករាឆ្នាំ២០១៩ ប៉ុន្តែបានមកពហុកីឡាដ្ឋាន Stamford Bridge រហូតដល់រដូវក្តៅ ដែលគាប់ជួននឹងការតែងតាំង លោក ហ្វ្រែង ឡាំផាត (Frank Lampard) ជាអ្នកចាត់ការថ្មីផងដែរ។
ពូលីស៊ីក មិនសូវបានបង្ហាញមុខក្នុងក្រុមជម្រើសដំបូងជាប់លាប់ទេកាលពីដើមរដូវកាលមុន ស្របពេលមានបញ្ហារបួសជាបន្តបន្ទាប់។ ទោះបីជាយ៉ាងណា នៅដំណាច់យុទ្ធនាការចាស់ កីឡាករវ័យ២២ឆ្នាំរូបនេះបានបង្ហាញទម្រង់លេងដ៏អស្ចារ្យ ហើយក្លាយជាកីឡាករឆ្នើម បំផុតរបស់ក្លិប Chelsea បន្ទាប់ពីចាប់ផ្តើមរដូវកាលឡើងវិញ។
កីឡាកររូបនេះរកបាន៤គ្រាប់ និងជួយបង្កើតឱកាស៤លើកនៅក្នុង៩ប្រកួតក្នុងលីកនៅ រដូវកាលនេះ។ កីឡាកររូបនេះក៏បានជួយក្រុម Chelsea ឲ្យឈានដល់វគ្គផ្តាច់ព្រ័ត្រក្របខ័ណ្ឌ FA Cup ផងដែរមុនពេលបង្ខំចិត្តប្តូរចេញដោយសារមានបញ្ហារបួស។
ស្របពេលសមត្ថភាពរបស់ ពូលីស៊ីក ត្រូវបានគេចាប់អារម្មណ៍ជាបន្តបន្ទាប់ប៉ុន្មានខែចុង ក្រោយនេះ លោក ម៉ាស និយាយថា ដំបូងឡើយលោក ឡាំផាត ស្ទាក់ស្ទើរពីសមត្ថភាព របស់កីឡាករសញ្ជាតិអាមេរិករូបនេះសម្រាប់វិស័យបាល់ទាត់នៅក្របខ័ណ្ឌព្រីមីញ៉េលីក៕ ប្រែសម្រួល: ពិសិដ្ឋ
