Home ព័ត៌មានជាតិ សន្តិសុខ ​ឃាត់​គ្រឿងចក...

​ឃាត់​គ្រឿងចក្រ មួយគ្រឿង ករណី​ហ៊ុមព័ទ្ធ​យក​ដីព្រៃ ដោយ​ខុសច្បាប់ ជាង ៥០ ហិកតា​

ដោយៈ សុខុម / ស្ទឹងត្រែងៈ សមត្ថកិច្ច​នគរបាល ប្រឆាំង​បទល្មើស​សេដ្ឋកិច្ច ខេត្តស្ទឹងត្រែង បាន​ចុះ​ឃាត់​គ្រឿងចក្រ​មួយគ្រឿង ពាក់ព័ន្ធ​ករណី​កាយ​ប្រឡាយ​ព្រំ ដើម្បី​យក​ដីព្រៃ​រដ្ឋ អត់​ប្លង់​កម្មសិទ្ធិ ចេញ​ដោយ​សុរិយោដី​ខេត្ត មាន​ទំហំ​ជាង ៥០ ហិកតា ក្នុង​ឃុំ​ថា​ឡា​បរិ​វ៉ា​ត់ ស្រុក​ថា​ឡា​បរិ​វ៉ា​ត់ ខេត្តស្ទឹងត្រែង​។ ការបង្ក្រាប ករណីនេះ បន្ទាប់ពី​មាន​បទបញ្ជា ពី​លោក​ជេ​ត ខេមរា ព្រះរាជអាជ្ញា អម​សាលាខេត្ត​ស្ទឹងត្រែង​។​

​សូមបញ្ជាក់ថា កម្លាំង​នគរបាល ឃាត់​គ្រឿងចក្រ​មួយគ្រឿង និង​បានប្រគល់​ឲ្យ​ជំនាញ រដ្ឋបាល​ព្រៃឈើ​ស្រុក កសាង​សំណុំរឿង​បន្ត កាលពី​ថ្ងៃទី​១៨ ខែតុលា​។ រហូតមកដល់​ថ្ងៃទី​២២ ខែតុលា ឆ្នាំ​២០២០ នេះ ជំនាញ​រដ្ឋបាល​ព្រៃឈើ​ផ្នែក ស្រុក​ថា​ឡា​បរិ​វ៉ា​ត់ មិនទាន់​បានធ្វើ​ការដឹក​ជញ្ជូន គ្រឿងចក្រ មក​រក្សាទុក​នៅឡើយ​ទេ​។​

​លោក វ៉ា សុខា នាយផ្នែក​រដ្ឋបាល​ព្រៃឈើ ស្រុក​ថា​ឡា​បរិ​វ៉ា​ត់ បានបញ្ជាក់​ថាៈ គ្រឿងចក្រ ដែល​ខាង​កម្លាំង​នគរបាល ឃាត់​នោះ ពុំទាន់​បាន​យកចេញ​មក​ទេ ដោយសារ​គ្រឿងចក្រ បើក​ចេញពី​កន្លែង​ទីតាំង ចម្ងាយ​ជាង ៥០០ ម៉ែត្រ បាន​ខូច ។ ម្យ៉ាងទៀត ដោយសារ​ស្ថានភាព​ផ្លូវ ក្នុង​រដូវ​ធ្លាក់ភ្លៀង លំបាក​ខ្លាំង​។​

​ប្រភពព័ត៌មាន បានឱ្យដឹងថា គ្រឿងចក្រ​ពីរ​គ្រឿង គ្រោង​សម្អាត​ព្រៃ យក​ដី​ពីរ​កន្លែង​ផ្សេងគ្នា មាន​ទំហំ​ប្រមាណ​ជា ៨០ ហិកតា នៅ​ភូមិសាស្ត្រ​ឃុំ​ថា​ឡា​បរិ​វ៉ា​ត់ ស្រុក​ថា​ឡា​បរិ​វ៉ា​ត់​។ នៅក្នុង​នោះ គ្រឿងចក្រ​មួយគ្រឿង កំពុងតែ​ឈួ​ស​ផ្លូវ​ចូល និង​មួយគ្រឿង​ទៀត បាន​កាយ​ប្រឡាយ​ព្រំ លើ​ផ្ទៃដី​ជាង ៥០ ហិកតា រួចរាល់​ហើយ​។ ដី​ជាង ៥០ ហិកតា ដែល​គ្រឿងចក្រ​មួយគ្រឿង កាយ​ព្រំ ដើម្បី​ឈូសឆាយ សម្អាត​ព្រៃ​នោះ ទំនង​មិនទាន់មាន​ប្លង់​កាន់កាប់ ចេញ​ដោយ សុរិយោដី​ខេត្ត នៅឡើយ​ទេ ពីព្រោះថា ដី​នៅ​ព្រៃ ពុំទាន់​មាន​ដំណាំ​សោះ​។ រីឯ​ម្ចាស់​ដី គឺជា​អ្នក​ភ្នំពេញ ជិះ​រថយន្ត​ទំនើប​មួយគ្រឿង ចេញចូល​មើលការខុសត្រូវ​។ តែ​ពេល​ឃើញ​សមត្ថកិច្ច ក៏​បើករថយន្ត​គេច​បាត់​។​

​ដំបូង មេការ​ម្នាក់ ឈ្មោះ​ឌី បាន​យក​គ្រឿងចក្រ ចំនួន​២​គ្រឿង ទៅ​សម្អាត​ព្រៃ ពីរ​កន្លែង នៅ​ចំណុច​ខាងលើ​។ ប៉ុន្តែ​សកម្មភាព​ជាក់ស្តែង គ្រឿងចក្រ​មួយគ្រឿង ទើបបាន​កាយ​ព្រំ លើ​ផ្ទៃដី​ទំហំ​ជាង ៥០ ហិកតា​ហើយ​។ ហេតុនេះហើយ កម្លាំង​សមត្ថកិច្ច ដកហូតយក​គ្រឿងចក្រ តែមួយ​គ្រឿង​ទេ ពីព្រោះថា បានធ្វើ​សកម្មភាព បទល្មើស​ជាក់ស្តែង និង​ប្រគល់​ឲ្យ​ជំនាញ​រដ្ឋបាល​ព្រៃឈើ ពិនិត្យ​បន្ត​។ ដោយឡែក មួយគ្រឿង​ទៀត មិនទាន់​ធ្វើ​សកម្មភាព​នៅឡើយ​ទេ​។ តែ​គេ​បានឃើញ​ធ្វើ​ផ្លូវ​ចូល ទៅកាន់​ដី​ទំហំ​ជាង ៥០ ហិកតា​។​

​មេការ​គ្រឿងចក្រ ឈ្មោះ​ឌី បាន​អួតខ្លួន​ថា គ្រឿងចក្រដែល​កំពុងតែ​កាយ​នោះ គឺ​ធ្វើ​ផ្លូវ​សម្រាប់​ប្រជាពលរដ្ឋ ធ្វើដំណើរ​ឆ្លងកាត់​តែប៉ុណ្ណោះ ហើយក៏​បាន​សុំអនុញ្ញាត ពី​សមត្ថកិច្ច​ពាក់ព័ន្ធ នៅក្នុង​មូលដ្ឋាន រួចហើយ​ដែរ​។ ថែមទាំង​អួតថា ម្ចាស់​ដី​មាន​ខ្នង​ធំ​ណាស់ នៅ​ក្រុងភ្នំពេញ​។ ករណីនេះ មិនមាន​ការឃាត់ខ្លួន អ្នក​ជាប់​ពាក់ព័ន្ធ​ឡើយ​៕ ​/Ha

ទីតាំងផ្សាយពាណិជ្ជកម្ម

- Advertisment -

Most Popular

លែងត្រីគល់រាំង និងត្រីផ្ស...

ដោយ:ទេព មង្គល / ព្រៃវែង: ...

​ព្រឹកស្អែក​ប្រមុខ​រាជរដ្...

​ដោយៈ​តារា​រិ​ទ្ធ​/​ភ្នំព...

អាម៉េរិក​ថា​ការ​ដែល​បញ្ជូ...

​ប្រែ​សម្រួលៈ​វាសនា/វ៉ាស៊...

ចាប់ផ្តើមយកសំណាករកមេរោគកូ...

ដោយ:ភ្នំស្វាយ  / បន្ទាយមា...