Home ព័ត៌មានអន្តរជាតិ នាយករដ្ឋមន្ត្...

នាយករដ្ឋមន្ត្រី​ថៃ​ត្រៀម​ដក​ចេញ​ច្បាប់​គ្រាអាសន្ន​និង​សុំ​ឲ្យ​គ្រប់​ភាគី​ដោះស្រាយ​គ្នា​តាមរយៈ​សភា​

​នាយករដ្ឋមន្ត្រី​លោក ប្រា​យុទ្ធ ចាន់​អូ​ចា បាន​និយាយ​កាលពី​ថ្ងៃ​ពុធ​ទី​២១​តុលា​ថា លោក​ត្រៀម​ដកចេញ​ការប្រើ​ច្បាប់​គ្រាអាសន្ន​នៅ​ក្រុង​បាងកក ដើម្បី​បន្ថយកម្ដៅនយោបាយ តែ​បាន​ស្នើសុំ​ឲ្យ​ពួក​​អ្នក​ប្រឆាំង​តវ៉ា​ដែល​បាន​មកជួបជុំ​គ្នា​រាល់ថ្ងៃ​នៅ​តាម​ដង​វិថី​នៃ​ក្រុង​បាងកក​ងាក​មក​ធ្វើ​ការដោះស្រាយ​គ្នា​តាមរយៈ​សភា​។​

​លោក​បាន​និយាយ​ដូច្នេះ​ក្នុង​សុន្ទរកថា​ដែល​ត្រូវ​បាន​ថត​ទុកជា​មុន​មួយ​ហើយ​ដែល​ត្រូវបាន​ចាក់ផ្សាយ​ក្នុង​ទូរទស្សន៍​កាលពី​យប់​ថ្ងៃ​ពុធ នៅពេល​បាតុករ​ប្រឆាំង​រដ្ឋាភិបាល​រាប់ពាន់នាក់​ដើរ​ដង្ហែ​ទៅ​​កាន់​វិមាន​រដ្ឋាភិបាល កន្លែង​ដែល​ប៉ូលិស​ដាក់​ពង្រាយ​កម្លាំង​ការពារ​។​

​បាតុកម្ម​ភាគច្រើន​ដឹកនាំ​ដោយ​ពួក​យុវជន​ដែល​ទាមទារ​ឲ្យកែប្រែ​រដ្ឋធម្មនុញ្ញ ទាមទារ​ឲ្យ​លោក​ប្រា​យុទ្ធ​ចុះចេញ​ពី​តំណែង និង​កែ​ទំរង់​របបរាជានិយម ។​ពួកគេ​បាន​មកជួបជុំ​គ្នា​ធ្វើការ​ទាមទារ​​រាល់ថ្ងៃ​នៅ​មួយ​សប្តាហ៍​មក​នេះ ទោះ​ជា​រដ្ឋាភិបាល​ចេញ​ច្បាប់​ហាមប្រាម​ការជួបជុំ​មនុស្ស​ចាប់ពី​៥​នាក់​ឡើង​និង​ផ្តល់​អំណាច​ដល់​កងសន្តិសុខ​ស្វែងរក​និង​ចាប់ខ្លួន​មនុស្ស​នៅក្នុង​រដ្ឋធានី​ក្តី​។​

​ការជួបជុំ​តវ៉ា ជា​ទូទៅ​បាន​ប្រព្រឹត្តទៅ​ដោយ​អហិង្សា​ជាមួយនឹង​ការឡើង​ថ្លែង​សុន្ទរកថា​ខ្លីៗ​ថ្កោលទោស​រដ្ឋាភិបាល និង​លើក​ម្រាមដៃ​បង្ហាញ​ការប្រឆាំង​នឹង​ភាព​ផ្តាច់ការ​។​តែ​ការចាប់ខ្លួន​មេដឹកនាំ​ចលនា​​ប្រឆាំង​តវ៉ា​នេះ​រាប់​សិប​នាក់ វា​ហាក់​កាន់តែ​ជំរុញ​ការតវ៉ា​ប្រឆាំង​ខ្លាំង​ឡើង ដោយ​ពួកគេ​មិន​ស្តាប់​បម្រាម​និង​មិន​ញញើត​នឹង​កម្លាំង​ប៉ូលិស​។​

​ពួក​បាតុករ​ក្មេងៗ​បាន​និយាយ​អំពី​តម្រូវការ​ឲ្យ​ដាក់​សិទ្ធិ​អំណាច​របស់​ស្តេច មហា វ៉េ​ច​រ៉ា​ឡុងកន ស្រប​តាម​ឋានៈ​ផ្លូវការ​របស់​ទ្រង់​ក្នុងនាម​ជា​ព្រះរាជា​នៃ​របប​រាជានិយម​អាស្រ័យ​ធម្មនុញ្ញ​។​ស្តេច​ថៃ ដែល​​ត្រូវបាន​ចាត់ទុក​ថា​ជា​ព្រះមហាក្សត្រ​មាន​បំផុត​ក្នុង​លោក​ជាមួយនឹង​ទ្រព្យសម្បត្តិ​ប្រមាណ​៤០​ពាន់​លាន​ដុល្លារ បច្ចុប្បន្ន​គ្រប់គ្រង​អង្គភាព​ទ័ព​២​ដោយផ្ទាល់​។​

​តែ​ការទាមទារ​នេះ​ជួប​ការប្រឆាំង​ជំទាស់​ពី​ក្រុម​រាជានិយម និង​ខ្លះ​បាន​ចេញ​មក​ប្រវាយប្រតប់​ជាមួយ​ពួក​ប្រឆាំង​តវ៉ា​គាំទ្រ​លទ្ធិប្រជាធិបតេយ្យ​នៅ​តាម​ដងផ្លូវ​នៃ​ក្រុង​បាងកក​។​

​ប៉ូលិស​ព្យាយាម​បំបែក​អ្នកប្រឆាំង​តវ៉ា​គាំទ្រ​លទ្ធិប្រជាធិបតេយ្យ និង​អ្នករាជានិយម​(​ពាក់អាវ​ពណ៌​លឿង​)​ក្នុងការ​ប៉ះទង្គិច​គ្នា​មួយ​នៅ​ក្រុង​បាងកក​កាលពី​ថ្ងៃ​២១​តុលា​

​លោក​ប្រា​យុទ្ធ បាន​និយាយ​កាលពី​យប់​ថ្ងៃ​ពុធ​ថា​«​ឥឡូវ ខ្ញុំ​ត្រៀម​ដកចេញ​ច្បាប់​គ្រាអាសន្ន​នៅ​បាងកក ហើយ​នឹង​ធ្វើ​ដូច្នេះ​ភ្លាម​បើ​មិន​មាន​ឧបទ្ទវហេតុ​ហិង្សា​ទេ​។​អ្នក​ប្រឆាំង​តវ៉ា​បាន​បញ្ចេញ​សំឡេង​និង​​សម្តែង​មតិ​របស់់គេ​ខ្លាំង​ណាស់​រួចមកហើយ​។​ឥឡូវ​ដល់​ពេល​ពួកគេ​ទុក​ឲ្យទស្សនៈ​របស់​គេ​សម្របសម្រួល​ជាមួយ​ទស្សនៈ​របស់​ផ្នែក​ផ្សេងៗ​ទៀត​នៃ​សង្គម​ថៃ​តាមរយៈ​សភា​។​ខ្ញុំ​អំពាវនាវ​ដល់​គ្រប់​ភាគី​ថា យើង​ត្រូវតែ​ផ្សះផ្សារស្នាមរបួស​មុន​ពេល​វា​ក្លាយជា​ដំបៅ​ជ្រៅ​ខ្លាំង​»​។​

​តែ​មេដឹកនាំ​តវ៉ា​ម្នាក់​លោក តា​តេប រឿង​ប្រា​ផៃ​គិត​សេរី បាន​ប្រាប់​សារព័ត៌មាន​បរទេស​មួយ​ថា «​ប្រា​យុទ្ធ ត្រូវតែ​ចុះចេញ​ពី​តំណែង​ជា​មុន ហើយ​វា​ជា​រឿង​ងាយ​ធ្វើ​បំផុត​»​។​

​ក្នុងពេល​ជាមួយគ្នា ប៉ូលិស​បាន​ផ្សាយ​បន្ត​សេចក្តីប្រកាស​ក្នុង​ព្រឹត្តិបត្រ​ព្រះបរមរាជវាំង​មួយ​ដែល​ប្រកាស​ថា សម័យប្រជុំ​សភា​ពិសេស​មួយ​នឹង​ប្រព្រឹត្តទៅ​នៅ​ថ្ងៃ​ចន្ទ​សប្តាហ៍​ក្រោយ​ដើម្បី​ដោះស្រាយ​វិបត្តិ​ន​យោ​​បាយ​សព្វថ្ងៃ​។​

​មាន​ការព្រួយបារម្ភ​ថា ជម្លោះ​តិចៗ​តែ​ក្តៅ​ងំ​នេះ អាច​រាលដាល​ហួស​ពី​ការ​អាច​គ្រប់គ្រង​បាន ហើយ​ទីបំផុត​រុញ​ទម្លាក់​សេដ្ឋកិច្ច​ថៃ​ដែល​កំពុង​ជួប​កំណើន​អវិជ្ជមាន​ដល់​ទៅ​៧​ភាគរយ​(-៧%)​នៅ​ឆ្នាំ​នេះ​​ដោយសារតែ​វិបត្តិ​សកល​បង្កឡើង​ដោយ​វីរុស​កូរ៉ូណា​៕​ប្រែ​សម្រួល​៖​វាសនា​/Ha

​ប្រា​យុទ្ធ​៖ យើង​ត្រូវតែ​ឈាន​ថយក្រោយ​ចេញ​ពី​គែម​នៃ​ជម្រាល​ដ៏​រអិល​ដែល​ងាយ​នឹង​អោយ​យើង​ធ្លាក់​ចូល​ក្នុង​ភាពវឹកវរ​

ទីតាំងផ្សាយពាណិជ្ជកម្ម

- Advertisment -

Most Popular

​ហោរាសាស្ត្រ​

​ ​ ​ ​ ​ប្រចាំថ្ងៃ​ច័ន្...

រោងភាពយន្ត លេ​ជិន ផ្អាក​ប...

​ដោយៈ សុផល / ភ្នំពេញៈ រោង...

ក្រោយ​ការធ្វើ​តេស្ត​ជំងឺ​...

​ដោយ​៖ ទេព មង្គល / ភ្នំពេ...

ថ្នាក់ដឹកនាំ​និង​មន្ត្រី​...

ដោយៈ​ដេប៉ូ​/​ភ្នំពេញៈ​ថ្ន...