ហ្វ្រែង ឡាំផាត (Frank Lampard) បានសារភាពថា កីឡាករ អេដ្វាដ ម៉េនឌី (Edouard Mendy) ធ្វើបានល្អជាងកីឡាករ កេប៉ា អារីហ្សាបាឡាហ្គា (Kepa Arrizabalaga) ហើយបានក្លាយជា អ្នកចាំទីជម្រើសទី១របស់ក្រុម Chelsea ប៉ុន្មានសប្តាហ៍ បន្ទាប់ពីមានការអះអាងថា កីឡាករ ចំណូលថ្មីរបស់លោកនឹងប្រកួតជែងជាមួយកីឡាករផ្សេងទៀត ដើម្បីទទួលបានតំណែងអ្នក ចាំទីជម្រើសទី១ក្នុងក្រុម។
កន្លងមក លោក ឡាំផាត បានអះអាងថា ម៉េនឌី ដែលត្រូវបានផ្ទេរពីក្លឹប Rennes ក្នុងតម្លៃ២២ លានផោន នឹងត្រូវចូលជំនួសតំណែងរបស់ កេប៉ា ប៉ុន្តែលោកបានដូរចិត្ត បន្ទាប់ពីឃើញ សមត្ថភាពរបស់ ម៉េនឌី អំឡុងពេលក្រុម Chelsea ប្រកួតស្មើក្រុម Sevilla ។
នៅពេលសួរថា តើម៉េនឌី គឺជាជម្រើសទី១ឬយ៉ាងណា លោក ឡាំផាត បាននិយាយថា “នៅពេលនេះ គឺប្រាកដណាស់ បើពិនិត្យមើលគុណភាពរបស់កីឡាកររូបនេះ។ ទម្រង់លេង របស់គាត់ គឺល្អណាស់។ កីឡាកររូបនេះរក្សាបានឃ្លីនស៊ីតពីរប្រកួតរួចហើយ”។
លោកបន្តថា “ការផ្តោតការយកចិត្តទុកដាក់លើលទ្ធផលគឺជារឿងសំខាន់សម្រាប់ក្រុម។ យើងធ្វើការសម្រេចចិត្តល្អច្រើននៅយប់នេះ ដូច្នេះវាពិតជាទីតាំងល្អសម្រាប់យើង ដើម្បី កសាងក្រុម”។
ម៉េនឌី គឺជាកូនសោរសំខាន់សម្រាប់ក្រុម Chelsea ក្រោមការដឹកនាំរបស់លោក ឡាំផាត បើទោះបីជារងរបួសភ្លៅ អំឡុងពេលបំពេញភារកិច្ចសម្រាប់ការប្រកួតអន្តរជាតិ៕ ប្រែសម្រួល: ពិសិដ្ឋ
