ដោយ: គ្រញូង / បាត់ដំបង: កាលពីព្រឹកថ្ងៃទី២៣ខែតុលាឆ្នាំ២០២០ ការិយាល័យប្រឆាំងគ្រឿងញៀនខេត្ត បានបញ្ជូនជនសង្ស័យម្នាក់ និងម៉ាទឹកកកចំនួន៣ថង់ និងរថយន្ត១គ្រឿង ទៅតុលាការខេត្ត ក្រោយពេលកម្លាំងអធិការនគរបាលស្រុកសំពៅលូន ឃាត់ខ្លួនបាននៅចំណុចក្រុមទី២ ភូមិកូភ្នំខាងត្បូង ឃុំតាស្តា ស្រុកសំពៅលូន នៅរសៀលថ្ងៃទី២១ខែតុលាឆ្នាំ២០២០។
លោកវរសេនីយ៍ឯក ពេជ្រ សារ៉ែន អធិការនគរបាលស្រុកសំពៅលូន បានឲ្យដឹងថា ជនសង្ស័យមានឈ្មោះ ទូច នន ហៅជក់ ភេទប្រុស អាយុ៥២ឆ្នាំ រស់នៅភូមិថ្នល់បត់ឃុំនិងស្រុកសំពៅលូន ខេត្តបាត់ដំបង។ ចំណែកវត្ថុតាងដែលដកហូរបានមាន៖ ថ្នាំញៀនប្រភេទមេតំហ្វេតាមីន(ម៉ាទឹកកក ICE)ចំនួន៣ថង់ទម្ងន់៧,២២ក្រាម រថយន្ត១គ្រឿងម៉ាកតូយ៉ូតាកាមរី ពណ៌ទឹកមាស សេរីឆ្នាំ១៩៩៩ ពាក់ស្លាកលេខភ្នំពេញ 2G 0302 និងទូរស័ព្ទដៃ១គ្រឿង។
លោកវរសេនីយ័ឯក សុខ និមល នាយការិយាល័យប្រឆាំងគ្រឿងញៀនខេត្ត បានបញ្ជាក់ថា ក្រោយពេលជនសង្ស័យឆ្លើយសារភាពរួច លោកឧត្តមសេនីយ៍ត្រី សាត គឹមសាន ស្នងការនគរបាលខេត្ត បានបញ្ជាឲ្យកម្លាំងជំនាញកសាងសំណុំរឿនបញ្ជូនជនសង្ស័យ និងវត្ថុតាងមួយចំនួន ទៅតុលាការចាត់ការតាមផ្លូវច្បាប់៕ ល
