ដោយៈ ភ្នំខៀវ / បាត់ដំបងៈ ដោយសារស្ថានភាពទឹកភ្លៀង ចេះតែបន្តធ្លាក់ ជាបន្តបន្ទាប់ នៅផ្នែកខាងលើ នៃតំបន់ព្រំដែន និងស្រុកសំឡូត ចាប់តាំងពីយប់ ថ្ងៃទី២១ ខែតុលា ឆ្នាំ២០២០ មក អាជ្ញាធរខេត្តបាត់ដំបង នៅថ្ងៃទី២២ ម្សិលមិញនេះ បានចេញសេចក្តីអំពាវនាវ បន្ទាន់មួយ ដល់ប្រជាពលរដ្ឋ ដែលរស់នៅតាមដងស្ទឹង ឲ្យបង្កើនការប្រុងប្រយ័ត្ន ពីទឹកជំនន់លើកទី២។
ជាមួយគ្នានេះ អភិបាលខេត្ត លោក ងួន រតនៈ ក៏បានជំរុញដល់កងកម្លាំង គណ:បញ្ជាការ បន្តការតាមដាន ត្រង់ចំណុចទំនប់ស្តុកទឹក បាសាក់ ស្រុករុក្ខគីរី ព្រោះទឹកបានហក់ឡើង ហូរកាត់ទំនប់ ជាថ្មីម្តងទៀត។
ចំណែកឯកងកម្លាំងវិញ លោក ស្នងការនគរបាលខេត្ត បានកំណត់ឲ្យក្រុមប្រចាំបញ្ជាវេននីមួយៗ ត្រូវមានវត្តមាន នៅក្នុងមូលដ្ឋាន ស្នងការដ្ឋាននគរបាលខេត្ត ទាំងអស់ ដើម្បីត្រៀមអន្តរាគមន៍ ដោះស្រាយបញ្ហា ជូនប្រជាពលរដ្ឋ ឲ្យបានរហ័សបំផុត។
គួរបញ្ជាក់ថា កម្ពស់ទឹកស្ទឹងសង្កែ នៅថ្ងៃទី២២ តុលា មានកម្ពស់ជាង ១០ ម៉ែត្រប៉ុណ្ណោះ ប៉ុន្តែក្រោយថ្ងៃ ដែលអាជ្ញាធរខេត្ត ប្រកាសឲ្យប្រជាពលរដ្ឋ ប្រុងប្រយ័ត្ន នៅថ្ងៃទី២៣ តុលា នេះ ទឹកស្ទឹងសង្កែ ហក់ឡើងខ្ពស់រហូតដល់កម្ពស់ ១៣,៣០ ម៉ែត្រ ខណៈអាកាសធាតុ នៅក្នុងក្រុងបាត់ដំបង មេឃស្រឡះ បើកថ្ងៃ និងធ្លាក់ខ្យល់ត្រជាក់ ៕/V
