Home ព័ត៌មានជាតិ សេដ្ឋកិច្ច ទឹកជំនន់​ខុសរ...

ទឹកជំនន់​ខុសរដូវ របស់​ទន្លេមេគង្គ បាន​ប៉ះពាល់​ដំណាំ​ពលរដ្ឋ​កោះ​ប៉ែន ប្រមាណ ១០ ហិកតា​

​ដោយៈ គង់​ហេង / កំពង់ចាមៈ ទឹកជំនន់​ខុសរដូវ របស់​ទន្លេមេគង្គ បាន​ហក់​ឡើង​កម្ពស់​ជាង ១២ ម៉ែត្រ​នោះ បាន​បណ្តាលឱ្យ​ប៉ះពាល់ ដល់​ផលដំណាំ ដែល​បាន​ដាំ​ដុះ ទាំង​ប្រថុយប្រថាន របស់​ប្រជាពលរដ្ឋ លើទឹក​ដី​កោះ​ប៉ែន នៃ​ឃុំ​កោះ​មិត្ត ស្រុក​កំពង់សៀម និង​ឃុំ​កោះសូទិន ស្រុក​កោះសូទិន ប្រហែល ១០ ហិកតា​។​

​លោក ឈាន ណាក់ អាយុ ៥៤ ឆ្នាំ ដែល​កំពុង​លើក​ត្រួយ​ម្រះ ដាក់​ជន្លង់ នៅ​ចំណុច​ទួល​ព្រែ​កតា​ឃ្លោក ឃុំ​កោះសូទិន បាន​ប្រាប់​កាសែត​រស្មី​កម្ពុជា នៅ​ថ្ងៃទី ២២ តុលា​ថាៈ ទឹកជំនន់​ទន្លេមេគង្គ ដែល​ជន់​ឡើង​កម្ពស់​ជាង ១២ ម៉ែត្រ នៅ​ថ្ងៃទី​២១ តុលា បាន​បង្ក​ឱ្យ​លិច​ខូច​ថ្នាំជក់ (​ថ្នាំខ្មែរ​) ជា​កូន​អស់​ជាង មួយ​ម៉ឺន​ដើម ដើម​ប៉េងប៉ោះ និង​ដើម​ឪឡឹក​មួយចំនួន ដែល​បាន​ដាំ​នៅ​ខាង​ពោះ​អូរ​។​

​បុរស​រូបនេះ បាន​បន្តថាៈ ប៉ុន្តែ​ទោះជា​យ៉ាងណា គ្រួសារ​លោក ក៏​ដូច​គ្រួសារ​កសិករ ចម្ការ​ច្រើន​គ្រួសារ​ទៀត ក្នុង​អូរ​ព្រែក​តា​ឃ្លោក​នេះ បាន​ត្រៀម​ចិត្ត ត្រៀម​កាយ​ហើយ គឺ​ត្រូវតែ​ដាំ​ដំណាំ​ទាំងអស់នេះ លិច​ខូច សល់​ប៉ុន្មាន យក​ប៉ុណ្ណឹង​។ ព្រោះ​កសិករ​ទាំងអស់ បានទទួល​ព័ត៌មាន​ជាមុន​ថា នឹងមាន​ទឹកជំនន់​ទ​ន្លេ ជន់​ឡើង ហើយ​ចំណុច​ទួល​ព្រែ​កតា​ឃ្លោក​នេះ លុះត្រាតែ​ទឹកទន្លេ​មេគង្គ ជន់​ឡើងដល់​កម្រិត ប្រកាសអាសន្ន កម្ពស់​ជាង ១៥ ម៉ែត្រ ទើប​ទឹក​មកដល់​ចម្ការ​ម្រះ​នេះ​។​

​ពាក់ព័ន្ធ​នឹង​របប​ទឹកជំនន់​ទន្លេមេគង្គ ខុសរដូវ​នេះដែរ បុរស​វ័យ ៨០ ឆ្នាំ​ម្នាក់ទៀត ដែល​កំពុង​សម្អាត​ស្មៅ ដាក់​ជី​ចម្ការឪឡឹក ជាមួយ​ភរិយា បាន​រំលឹកថាៈ បើសិនជា​ទឹកទន្លេ​នេះ ឡើង​ជន់​លិច​កោះសូទិន និង​កោះ​ប៉ែន​មែន​នោះ នឹង​ពិតជា​ដូច​កាល​លោក នៅ​អាយុ ១៣-១៤ ឆ្នាំ ប្រមាណ ៦០ ឆ្នាំមុន គឺ​កាលនោះ​ចៅអធិការ វត្ត​ចុង​កោះសូទិន​នេះ បានធ្វើ​បុណ្យ​កឋិនទាន ដង្ហែ​ជិះទូក​ឆ្លងកាត់ ទួល​ព្រែ​កតា​ឃ្លោក និង​ទួល​កោះ​ប៉ែន ឃុំ​កោះ​មិត្ត ចូល​វត្ត​អូរ​ឈ្លើង ឃុំ​កោះ​រកា ស្រុក​កំពង់សៀម​។​

​បុរស​វ័យ​ចំណាស់​រូបនេះ បាន​បន្តថាៈ ពិសេស​បើ​ទឹកទន្លេ​មេគង្គ​ឡើង ដូច្នេះ​ប្រាកដ​មែន គឺ​គ្រួសារ​ពីរ​នាក់​ប្តី​ប្រពន្ធ នឹង​ខាតបង់​ថវិកា ប្រហែល​ជាង ៣០ ម៉ឺន​រៀល ដែល​បាន​ចំណាយ​ទុន លើ​ចម្ការឪឡឹក និង​កម្លាំង​ពលកម្ម ឥតប្រយោជន៍​។ ជាក់ស្តែង អ្នកមាន​ចម្ការ​ជិតខាង​មួយចំនួន បាន​បោះបង់ លែង​មើលថែ​ដំណាំ ក្រោយពី​ទទួល​ព័ត៌មាន​ថា នៅ​ថ្ងៃទី​២៦ ខែតុលា ខាងមុខ ទឹកជំនន់​ទន្លេមេគង្គ នឹង​ជន់​ឡើង​កម្ពស់​ជាង ១៤ ម៉ែត្រ​នោះ​។​

​លោក ឈាន សុខ​ខេង មន្ត្រី​ស្មៀនឃុំ​កោះសូទិន ស្រុក​កោះសូទិន បានឱ្យដឹង នៅ​ថ្ងៃទី​២៣ តុលា​ថាៈ ជំនន់​ទឹកទន្លេ​មេគង្គ ខុសរដូវ ដែល​ហក់​ឡើង ប៉ុន្មាន​ថ្ងៃនេះ បាន​ប៉ះពាល់​ខូចខាត ដល់​ផលដំណាំ របស់​ប្រជាកសិករ ដែល​ដាក់​ដាំ ក្នុង​ចម្ការ ទាំង​ប្រថុយ​ថា​ន ប្រហែល ប្រាំ ហិកតា គឺ​ភាគច្រើន នៅ​ពោះ​អូរ តំបន់​ព្រែ​កតា​ឃ្លោក​។​

​លោក វ៉ែន នាង មេឃុំ​កោះ​មិត្ត ស្រុក​កំពង់សៀម បាន​ប្រាប់ថាៈ ជំនន់​ទឹកទន្លេ មិន​ទៀងទាត់​នោះ បាន​ឡើង​ជន់​លិច​ខូចខាត​ដំណាំ ប្រជាពលរដ្ឋ ជា​សំណាប សន្ទូង នៅក្នុង​អូរ​ខាង​ភូមិ​ស្វាយជ្រុំ និង​ដំណាំ​ចេក នៅ​អូរ​ខាង​ភូមិ​កោះ​ប៉ែន «​ក​» សរុប​ប្រមាណ ប្រាំ ហិកតា​ដែរ ដែល​ពួកគាត់​បាន​សាប និង​ស្ទូង ដោយ​ផ្សងព្រេង​នោះ​។​

​គួរ​បញ្ជាក់ថា ទឹកជំនន់​ទន្លេមេគង្គ ខេត្តកំពង់ចាម នៅ​ថ្ងៃទី ២១ ខែតុលា ឆ្នាំ​២០២០ បាន​ហក់​ឡើង​កម្ពស់ ១២,៤៧ ម៉ែត្រ បណ្តាលឱ្យ​ប៉ះ​ដល់​ផលដំណាំ មួយចំនួន របស់​ប្រជាកសិករ ដែល​បាននាំគ្នា​ដាក់​ដាំ ទាំង​ប្រថុយប្រថាន​នោះ ខណៈ​កម្រិត​ប្រកាសអាសន្ន របស់​ទន្លេ​មួយ​នេះ កម្ពស់ ១៥,២០ ម៉ែត្រ​។ ប៉ុន្តែ​នៅ​ថ្ងៃទី ២៣ ខែតុលា​នេះ បាន​ស្រក​ចុះ​វិញ នៅត្រឹម​កម្ពស់ ១២,០៥ ម៉ែត្រ ៕S/


​ ​

ទីតាំងផ្សាយពាណិជ្ជកម្ម

- Advertisment -

Most Popular

តើ​អ្វី​ទៅជា​ទិវា​ពិភពលោក...

ដោយៈ ជា​សីហៈ​/​ភ្នំពេញៈ ថ...

តុលាការ​ឃុំខ្លួន អ្នកម៉ៅក...

ដោយៈ ស​រិ​ទ្ធ / ភ្នំពេញៈ ...

ក្នុង​ខែវិច្ឆិកា ពេល​រដូវ...

ដោយៈ គ្រញូង / បាត់ដំបងៈ ថ...

ព្រឹត្តិការណ៍​សហគមន៍ ២៨ វ...

​ដោយៈ ស​រិ​ទ្ធ / ភ្នំពេញៈ...