ដោយៈ មុនីរ័ត្ន / ភ្នំពេញៈ សមត្ថកិច្ចបានធ្វើការបង្ក្រាបទីតាំងស្តុក និងចែកចាយគ្រឿងសំអាង ខូចគុណភាព ជាង ២០ តោន នៅសង្កាត់ទំនប់ទឹក ខណ្ឌបឹងកេងកង និងសង្កាត់បឹងទំពុនទី១ ខណ្ឌមានជ័យ។ ការបង្ក្រាបនេះ បានធ្វើឡើង ដោយគណៈកម្មាធិការ ប្រយុទ្ធប្រឆាំង ផលិតផលក្លែងក្លាយ នៃក្រសួងមហាផ្ទៃ កាលពីថ្ងៃទី២២ ខែតុលា ឆ្នាំ២០២០ ។
ការចុះបង្ក្រាបទីតាំង ស្តុកគ្រឿងសំអាង ទាំងពីរទីតាំង ខាងលើនេះ ដឹកនាំដោយលោក ឧត្តមសេនីយ៍ឯក តាន់ សុខវិជ្ជា ប្រធានលេខាធិការដ្ឋាន នៃគណៈកម្មាធិការ ប្រយុទ្ធប្រឆាំង ផលិតផលក្លែងក្លាយ ដោយមានការសម្របសម្រួល ពីលោក សឿ ឡុងឌី ព្រះរាជអាជ្ញារង នៃអយ្យការ អមសាលាដំបូង រាជធានីភ្នំពេញ។
បន្ទាប់ពីការត្រួតពិនិត្យ គណៈកម្មាការចម្រុះ បានពិនិត្យឃើញថា ផលិតផលគ្រឿងសម្អាង មានប្រវេទន៍ ពីក្រសួងសុខាភិបាល មានចំនួន ៤ មុខ និងផលិតផល គ្រឿងសម្អាង ផ្សេងទៀត គ្មានលេខប្រវេទន៍ ពីក្រសួងសុខាភិបាល។ ទីតាំងស្ដុងផលិតផលគ្រឿងសម្អាង ខុសទីតាំងអនុញ្ញាត ពីក្រសួងសុខាភិបាល និងផលិតផលគ្រឿងសម្អាង ហួសកាលបរិច្ឆេទប្រើប្រាស់ លាយឡំជាមួយ ផលិតផលមាន សុពលភាពប្រើប្រាស់ និងពុំមានលេខប្រវេទន៍ ពីក្រសួងសុខាភិបាល៕/V
